މި އަހަރު ބާއްވާ ރައްޔިތުންގެ މަޖިލީހުގެ އިންތިޚާބު ފަސް ކުރުމަށް ކުރާ މަސައްކަތުގައި އެންމެ ތަންފުކެއް ވެސް ދޫނުކުރާނެ ކަމަށް އެމްޑީޕީގެ ޕާލިމެންޓަރީ ގްރޫޕުން މިއަދު ބުނެފިއެވެ.
ރޯދަމަހުގައި އިންތިޚާބު ނުބޭއްވޭ ގޮތަށް އިންތިޚާބުތަކާ ބެހޭ އާންމު ގާނޫނަށް ރައްޔިތުންގެ މަޖިލީހުން އިސްލާހު ގެނެސް، މިއަދުގެ ޖަލްސާގައި ވަނީ ދެވަނަ ފަހަރަށް ފާސްކޮށްފައެވެ.
އެމްޑީޕީގެ ޕާލިމެންޓަރީ ގްރޫޕުގް ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަޖިލީހުގެ ނައިބު ރައީސް އަދި ހޯރަފުށީ ދާއިރާގެ މެންބަރު އަޙުމަދު ސަލީމް ވަނީ އިންތިޚާބު ލަސްކުރާ ބިލް ތަސްދީގުކޮށްދެއްވައި، މަޖިލިސް އިންތިޚާބު ބޭއްވޭނެ ތާރީޚާ ގުޅޭ ގޮތުން އަރާފައިވާ އޮޅުންތައް ސަރުކާރުން ރައްޔިތުންނަށް ސާފުކޮށްދިނުމަށް އެދިވަޑައިގެންފައެވެ. އަދި ރައްޔިތުންގެ އަޑު ރައްޔިތުންގެ މަޖިލީހުން އިއްވައިދީފި ކަމަށާއި، އެކަން ހާސިލް ކުރުމަށް ކުރަން ޖެހުނު ހުރިހާ ކަމެއް ކުރާނެ ކަމަށް ސަލީމް ވިދާޅުވިއެވެ.
މި ކަމާ ގުޅޭ ގޮތުން ތުޅާދޫ ދާއިރާގެ މެންބަރު ހިސާން ހުސައިން ވިދާޅުވީ ގާނޫނު އަސާސީން ބިލް ތަސްދީގު ކުރުން ލާޒިމްވާ މާއްދާގައިވާ ގޮތުން، އިންސާނީ ބާރުނުފޯރާ ކަމެއް ދިމާވެފައިނުވާ ނަމަ، ލަސްނުކޮށް ރައީސުލްޖުމްހޫރިއްޔާ ބިލް ތަސްދީގު ކުރައްވަން ޖެހިވަޑައިގަންނަވާ ކަމަށެވެ.
"އެހެންވީމާ އެއީ މިއަދުތޯ މާދަންތޯ އަނެއްދުވަހުތޯ އެ ސުވާލުގައި ތިއްބެވޭނެ ފަދަ ޒާތުގެ ކަމެއް ނޫން. އަޅުގަނޑުމެން ގަބޫލު ކުރާ ގޮތުގައި ރައީސުލްޖުމްހޫރިއްޔާ މިއަދުން މިއަދަށް އެ ބިލް ތަސްދީގުކޮށް ނިންމަވަން ޖެހިވަޑައިގަންނަވާނެ. އެއީ ގާނޫނު އަސާސީގެ ރޫހަކީ، ގާނޫނު އަސާސީ ލާޒިމް ކުރާ ގޮތަކީ، އަދި ސުޕްރީމް ކޯޓުން އެ މާއްދާ މާނަކޮށްފައި އޮތް ގޮތަކީ ވެސް،" ހިސާން ވިދާޅުވިއެވެ.
މަޖިލިސް އިންތިޚާބު ފަސް ކުރުމަށް ރައްޔިތުންގެ މަޖިލީހުން ފާސްކުރީ ރޯދަމަހުގައި އިންތިޚާބު ބާއްވަން ކަނޑައެޅުމާ ގުޅިގެން ރައްޔިތުން އެކަމުގެ ކަންބޮޑުވުން ފާޅުކުރުމާ ގުޅިގެންނެވެ. އެ އިސްލާހު ގެނެސް، ތަސްދީގުކުރަން ރައީސް އޮފީހަށް ފޮނުވީ މި މަހު 12 ގައެވެ.
ގާނޫނު އަސާސީގެ 264ވަނަ މާއްދާގައި ބަޔާންކޮށްފައި އޮންނަނީ "ގާނޫނު އަސާސީއަށް އިސްލާހެއް ގެނައުމަށް ރައްޔިތުންގެ މަޖިލީހުން ފާސްކޮށްފައިވާ ބިލެއް ތަސްދީގުކުރާން ރައީސުލްޖުމްހޫރިއްޔާއަށް ނުފެންނަ ނަމަ، އެ ބިލު ރައީސުލްޖުމްހޫރިއްޔާއަށް ފޮނުވާތާ ފަނަރަ ދުވަހުގެ ތެރެގައި ސަބަބު ބަޔާންކޮށް އެކަން ރައްޔިތުންގެ މަޖިލީހަށް އަންގަންވާނެ" ކަމަށެވެ.
ރައީސުލްޖުމްހޫރިއްޔާ ތަސްދީގު ކުރުމަށް ފޮނުވި ބިލް އަލުން އަނބުރާ މަޖިލީހަށް ފޮނުވާލެއްވީ ބިލް ފޮނުވިތާ 14ވަނައަށްވީ ދުވަހުގައެވެ.
ރައީސް އޮފީހުން ބުނީ، ޤާނޫނުއަސާސީގެ 91 ވަނަ މާއްދާގެ (ހ) އިން ރައީސުލްޖުމްހޫރިއްޔާއަށް ލިބިދީފައިވާ އިޚްތިޔާރުގެ ދަށުން، މި ބިލު، އަނބުރައި ފޮނުއްވައިލެއްވީ، މި ބިލުގައި، ޤާނޫނު އަސާސީގައި ކަނޑައަޅާފައިވާ އުޞޫލުތަކާ ތަޢާރުޟުވާ ކަންކަމާއި، ޤާނޫނު އަސާސީގައި ކަނޑައަޅާފައިވާ ގޮތުގެމަތީން އިންތިޚާބުތައް ބޭއްވުމާއި އަދި މިނިވަން އިންސާފުވެރި އިންތިޚާބެއް ބޭއްވުމަށް ހުރަސްއެޅިދާނެ ފަދަ އިޖްރާއާތުތައް ކަނޑައަޅާފައިވާކަން ދައުލަތުގެ ބަންޑާރަނާއިބު ފާހަގަކުރައްވައި، އެ ކަންކަން އިޞްލާޙުކުރެއްވުމަށްޓަކައި ބިލަށް ބަދަލުތަކެއް ގެންނަން ޖެހޭކަމަށް ރައީސުލްޖުމްހޫރިއްޔާއަށް ދައުލަތުގެ ބަންޑާރަނައިބު ލަފާދެއްވާފައިވާތީ ކަމަށެވެ.