ދިވެހިރާއްޖެއިން އަޅަން ނިންމާފައިވާ މާލީ އިސްލާހީ ފިޔަވަޅުތަކަށް، އިންޓަނޭޝަނަލް މަނިޓަރީ ފަންޑު (އައިއެމްއެފް)އިން އިއްޔެ މަރުހަބާ ކިޔައިފިއެވެ.
އައިއެމްއެފްގެ މިޝަންއަކުން މިދިޔަ މަހުގެ 23 އިން އިއްޔެއާ ހަމައަށް ވަނީ ރާއްޖެއަށް ޒިޔާރަތްކޮށް، އިގުތިސާދީ ހާކަތާ ގުޅޭ ގޮތުން މަޝްވަރާ ކުރައްވައި، މާލީ ސިޔާސަތުތައް ބައްޓަންކުރާ ގޮތްތަކާ ގުޅޭ ގޮތުން ބައްދަލުވުންތައް ކުރިއަށް ގެންގޮސްފައެވެ.
އެގޮތުން، އައިއެމްއެފްގެ މިޝަނުން ވަނީ ފިނޭންސް މިނިސްޓަރު މުހައްމަދު ޝަފީގާއި ގަވަރުނަރު އަލީ ހާޝިމާ އެކު ވެސް ބައްދަލުކުރައްވައިފައެވެ.
އެ ދަތުރަށް ފަހު، އައިއެމްއެފުން އިއްޔެ އާންމުކުރި ރިޕޯޓުގައި ބުނެފައިވަނީ ކޮވިޑު 19ގެ ބަލިމަޑުކަމަށް ފަހު ރާއްޖޭގެ އިގުތިސާދު ހަލުވިކަމާ އެކު ކުރިއަރަމުން އައިސްފައި މި ފަހުން މަޑުޖެހިފައިވާ ކަމަށެވެ. މި އަހަރު 5.2 އިންސައްތަ ކުރިއަރާނެ ކަމަށް ލަފައި ކުރެވޭއިރު ފަތުރުވެރިން ޒިޔާރަތްކުރާ މިންވަރު ވެސް އިތުރުވާނެކަމަށް އައިއެމްއެފުން ލަފާކުރެއެވެ.
އެކަމަކު، އެތެރެއާއި ބޭރުގެ ދަރަނި ބޮޑުވުމުގެ ސަބަބުން ސިޔާސަތުތަކަށް އަވަސް ބަދަލުތަކެއް ގެންނަން މަޖުބޫރުވެފައިވާ ކަމަށް އެ ރިޕޯޓުގައި ވަނީ ފާހަގަކޮށްފައެވެ.
"މި ވިސްނުމުގެ ތެރެއިން ކަމާ ބެހޭ ފަރާތްތަކުން އަންނަނީ މުހިއްމު އަމާޒެއް އޮތް އަމިއްލަ މާލީ އިސްލާހީ ފިޔަވަޅުތަކެއް އެކުލަވައިލައި، ވީހާ ވެސް އަވަހަށް ތަންފީޒުކުރުމުގެ މަސައްކަތް ކުރަމުން،" އެ ރިޕޯޓުގައި ފާހަގަކޮށްފައިވެއެވެ.
އައިއެމްއެފުން ވަނީ އެ ކަމަށް މަރުހަބާ ކިޔައިފައެވެ.
މޭ 22، 2021: މީހަކު ދޮންކެޔޮ ގަނޑެއް ހިފައިގެން: މާލީ ހާލަތު ރަނގަޅުކުރަން އިސްލާހީ ފިޔަވަޅުތައް އަޅަމުން އަންނަ ކަމަށް ސަރުކާރުން ވަނީ ބުނެފައި -- ސަން ފޮޓޯ/ ފަޔާޒު މޫސާ
މިގޮތުން، އާސަންދަ ސްކީމް، އޭގެ އެންމެ ހައްގުވެރިންނަށް އިސްކަންދޭ އުސޫލަށް ބަދަލުކޮށް، ސަބްސިޑީ ދޭ އުސޫލު ވެސް ހައްގުވެރިންނަށް އިސްކަންދޭ އުސޫލަކަށް ބަދަލުކުރުމަށް ސަރުކާރުން ގެންގުޅޭ ސިޔާސަތު އެ ރިޕޯޓުގައި ވަނީ ފާހަގަކޮށްފައެވެ.
އަދި، ކޮވިޑު 19އާ އެކު ކުރިމަތިވީ އިގުތިސާދީ ހާލަތުން އަރައިގަތުމަށް ފައިސާ ޗާޕުކުރަމުން އައި އައުން ހުއްޓައިލަން މި ސަރުކާރުން ނިންމި ނިންމުމަށް ވެސް އައިއެމްއެފުން ވަނީ މަރުހަބާ ކިޔައިފައެވެ.
މީގެ އިތުރުން، ރާއްޖޭގެ މޫސުމަށް އަންނަ ބަދަލުތަކަށް ބަލާއިރު، މޫސުމަށް އެޑެޕްޓޭޝަން އަދި މިޓިގޭޝަން މަސައްކަތްތަކަށް އެހީތެރިވުމަށް މުއައްސަސާތައް ހަރުދަނާކުރުމަކީ މޫސުމީ ބަދަލުތަކުން އަރައިގަތުމަށް އިތުރު މާލީ އެހީތެރިކަން ލިބި، މޫސުމީ ބަދަލުތަކުން އަރައިގަތުމަށް ވެފައިވާ ވައުދުތައް ފުއްދުމަށް އެހީތެރިވެދޭނެ ކަމެއް ކަމަށް އައިއެމްއެފުން ވަނީ ފާހަގަކޮށްފައެވެ.
އަދި، ކުރިއަށް ބަލާއިރު، ވިޔަފާރީގެ މާހައުލު ރަނގަޅުކޮށް، ވެރިކަން ހަރުދަނާކޮށް، ހުނަރު ކުރިއެރުން އިތުރުކުރުމަކީ ވެސް ހަރުދަނާ، ޝާމިލު، އަދި ދެމެހެއްޓެނިވި ކުރިއެރުމަކަށް އެހީތެރިވެދޭނެ ކަމެއް ކަމަށް އެ ރިޕޯޓުގައި ވަނީ ފާހަގަކޮށްފައެވެ.
އިގުތިސާދީ ހާލަތު ގޯސްކޮށް ފާހަގަކުރައްވައި، މާލީ އިސްލާހީ ފިޔަވަޅުތައް އެޅުމުގެ މަސައްކަތް ކުރަމުން އަންނަ ކަމަށް ރައީސް ޑރ. މުހައްމަދު މުއިއްޒު މިދިޔަ ހޯމަ ދުވަހު އިއްވެވި ރިޔާސީ ބަޔާނުގައި ވެސް ވަނީ ފާހަގަކުރައްވައިފައެވެ.
އެ މަނިކުފާނު ވިދާޅުވީ، ކުރީ ސަރުކާރުން ވާރުތަވި މާލީ ނުތަނަވަސްކަމުން އަރައިގަންނަން މާލީ އިސްލާހީ ފިޔަވަޅުތައް އަޅަމުން އަންނަ ކަމަށެވެ.