ސަރުކާރާ އިދިކޮޅު މެންބަރުންނަށް އެކަނި، ރައީސުލްޖުމްހޫރިއްޔާ އަޒުލުކުރެވޭ ގޮތަށް ރައްޔިތުންގެ މަޖިލީހުގެ ގަވާއިދަށް އިސްލާހު ގެނައި މައްސަލަ، ބަންޑާރަނައިބުގެ އޮފީހުގެ ފަރާތުން ސުޕްރީމް ކޯޓަށް ހުށަހަޅައިފިއެވެ.
ރައްޔިތުންގެ މަޖިލީހުގެ ހަތް މެންބަރަކު ވަނީ ސަރުކާރުގެ މަގާމުތަކަށް ވަޑައިގަންނަވަން އިސްތިއުފާ ދެއްވައިފައެވެ. އެކަމަކު، މި އަހަރު 20 ވަނަ މަޖިލީސް އިންތިޚާބު އޮންނާތީ، އިލެކްޝަންސް ކޮމިޝަނުން ނިންމާފައިވަނީ އެ ހަތް ދާއިރާއަށް ބައި އިލެކްޝަނެއް ނުބާއްވާށެވެ.
އެހެން އޮއްވައި، އިދިކޮޅު އެމްޑީޕީން ވަނީ އެއްވެސް ދާއިރާއެއްގެ ގޮނޑިއެއް ހުސްވެއްޖެ ނަމަ، އެ ގޮނޑިއެއް ނުލައި މަޖިލީހުގެ ޖުމުލަ މެންބަރުންގެ އަދަދު ގުނާ ގޮތަށް ގަވާއިދަށް އިސްލާހު ގެނެސްފައެވެ.
އެހެންވެ، މިހާރު މަޖިލީހުން ރައީސް ޑރ. މުހައްމަދު މުއިއްޒު އަޒުލުކުރަން ބޭނުންވާނީ 54 މެންބަރުންގެ ވޯޓެވެ. ކުރިން ގަވާއިދު އޮތް ގޮތުން، ރައީސް އަޒުލުކުރަން 58 މެންބަރުންގެ ސޮއި ބޭނުންވާނެއެވެ.
އެކަމަކު، އަލަށް ގެނައި އިސްލާހާއެކު މަޖިލީހުގެ ޖުމުލަ މެންބަރުންގެ އަދަދު 80 އަށް ދަށްވާނެއެވެ. އެހެންވެ، 54 މެންބަރުންގެ ވޯޓުން ރައީސް އަޒުލުކުރެވޭނެއެވެ.
އިދިކޮޅު އެމްޑީޕީއާއި ދަ ޑިމޮކްރެޓްސްއިން ގުޅިގެން ސަރުކާރާ ދެކޮޅަށް މަސައްކަތްކުރަން މި ފަހުން އެއްބަސްވެފައިވާއިރު، އެ ދެ ޕާޓީގައި މިހާރު 56 މެންބަރުން އެބަތިއްބެވެ. އެހެންވެ، ދެ ޕާޓީން ބޭނުންވެއްޖެ ނަމަ ރައީސް އަޒުލުކުރެވޭ ވަރަށް ވޯޓު ހަމަވާނެއެވެ.
ބަންޑާރަނައިބު އަހުމަދު އުޝާމް މިއަދު 'ސަން'އަށް ވިދާޅުވީ، އެ މައްސަލަ މިދިޔަ އާދިއްތަ ދުވަހު ސުޕްރީމް ކޯޓަށް ހުށަހަޅާފައިވާ ކަމަށެވެ. އެކަމަކު، އެ މައްސަލަ ބަލައިގަތުމާ މެދު އެ ކޯޓުން މިހާތަނަށް ވަކި ގޮތެއް ނިންމައިފައެއް ނުވެއެވެ.
ހަމައެކަނި އިދިކޮޅު ޕާޓީތަކަށް ރައީސް އަޒުލުކުރެވޭ ގޮތަށް ގަވާއިދު އިސްލާހުކޮށްފައި އޮއްވައި، އެމްޑީޕީން އިއްޔެ ވަނީ ރައީސް މުއިއްޒު އަޒުލުކުރަން ހުށަހެޅޭ ވަރަށް ސޮއިހަމަކޮށްފައެވެ. އެކަމަކު، އެ މައްސަލަ މިހާތަނަށް މަޖިލީހަށް ހުށަހަޅައިފައެއް ނުވެއެވެ.
އިއްޔެ އިދިކޮޅު މެންބަރުންގެ ވޯޓާ އެކު ވަނީ ސަރުކާރުގެ ތިން ވަޒީރަކަށް ވެސް ރުހުންނުދޭން ވެސް މަޖިލީހުން ފާސްކޮށްފައެވެ. އެކަމަކު، ރުހުން ނުލިބުނު ތިން ވަޒީރުން އިއްޔެ ވަނީ އަލުން ވަޒީރު ކަމަށް އައްޔަންކުރައްވައިފައެވެ.
ފާހަގަކޮށްލެވޭ ގޮތުގައި ސަރުކާރު ހިންގާ ކޯލިޝަނުން ވެސް ވަނީ މަޖިލީހުގެ ރައީސް މުހައްމަދު އަސްލަމާއި ނައިބު ރައީސް އަހުމަދު ސަލީމްގެ އިތުބާރު ނެތް ކަމުގެ މައްސަލައެއް ހުށަހަޅައިފައެވެ. އެ މައްސަލައިގައި ސޮއިކޮށްފައިވަނީ 23 މެންބަރުންނެވެ.