ރާއްޖޭގެ ފޮރިން މިނިސްޓަރު މޫސާ ޒަމީރާއި، އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރު ބައްދަލުކުރައްވައިފިއެވެ.
މި ބައްދަލުކުރެއްވުން އޮތީ މިހާރު ޔުގަންޑާގައި ކުރިއަށްދާ ނޮން އެލައިންޑް މޫވްމަންޓް (ނާމް)ގެ މިނިސްޓަރުންގެ ބައްދަލުވުމުގެ ހަވާސާގައެވެ.
ދެ ގައުމުގެ މިނިސްޓަރުން އެކުގައި ބައްދަލުކުރެއްވިއިރު މިހާރު، ދެ ގައުމުގެ ގުޅުމާ ގުޅޭ މުހިންމު ގިނަ ކަންތައްތަކެއްގެ މަޝްވަރާ ވެސް ރާއްޖޭގައި އަންނަނީ ހިނގަމުންނެވެ.
އެގޮތުން އެންމެ ބޮޑަށް ހިނގަމުން އަންނަ މަޝްވަރާއަކީ ރާއްޖޭގައި ތިބި އިންޑިއާ އަސްކަރީ ސިފައިން ބޭލުމާ ގުޅޭ ގޮތުން ހިނގަމުން އަންނަ މަޝްވަރާތަކެވެ.
މި ހަފުތާގައި ވެސް އިންޑިއާ ސިފައިން ގުޅޭ މަޝްވަރާތައް ފޮރިން މިނިސްޓްރީގައި ކުރިއަށް ގެންގޮސްފައިވެއެވެ.
އެންމެ ފަހުގެ މަޝްވަރާގެ ތެރެއިން އެކި އަސްކަރީ އެއްބަސްވުންތަކުގެ ދަށުން ރާއްޖޭގައި ހަރަކާތްތެރިވަމުން އަންނަ އިންޑިއާ ސިފައިން އަނބުރާ ގެންދިޔުމުގެ މަސައްކަތް އަވަސް ކުރަން އެ ގައުމުން އެއްބަސްވެފައިވާކަމަށް ސަރުކާރުން ވަނީ ހާމަކޮށްފައެވެ.