މިހާރު ކުރިއަށްދާ މަޝްރޫއުތަކުގެ ތެރެއިން ހުއްޓިފައި ހުރި މަޝްރޫއުތަކަށް ބިލުކޮށްފައި ހުރި 160 މިލިއަން ރުފިޔާގެ ތެރެއިން 125 މިލިއަން ރުފިޔާ ދައްކައި ނިންމާފައިވާ ކަމަށް ސްޕޯޓްސް މިނިސްޓަރު އަބްދުﷲ ރާފިޢު މިއަދު ވިދާޅުވެއްޖެއެވެ.
މިހާރު ކުރިއަށްދާ މަޝްރޫއުތަކުގެ ތެރެއިން ހުއްޓިފައި ހުރި މަޝްރޫއުތަކަށް މިނިސްޓްރީއަށް 160 މިލިއަން ރުފިޔާ ބިލުކޮށްފައި ހުއްޓެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ރަފީޢު ވިދާޅުވީ، އެ 160 މިލިއަން ރުފިޔާގެ ތެރެއިން 125 މިލިއަން ރުފިޔާ މިހާރު ދައްކާ ނިމިފައިވާ ކަމަށެވެ. އެގޮތުން، ޖުމުލަ 64 މަޝްރޫއު ފެށިފައިވާ ކަމަށް ރާފިޢު ފާހަގަ ކުރެއްވިއެވެ.
އެހެންވެ، ފައިސާ ދައްކައި ނިންމުމުގެ ސަބަބުން މިހާރު މަޝްރޫއުތައް ފެށުމުގެ ކަންކަން ކުރިއަށް ގެންދެވޭނެ ކަމަށް މިނިސްޓަރު ވިދާޅުވިއެވެ. ވަގުތު ލިބިއްޖެއްޔާ މިހާރު ވެސް އެ މަޝްރޫއުތަކުގެ މަސައްކަތް ކުރިއަށް ގެންދެވޭނެކަން މިނިސްޓަރު ވަނީ ފާހަގަކުރައްވައިފައެވެ.
"ދަރަނީގެ އެއް ބަޔަކީ ސަޕްލިމެންޓްރި ބަޖެޓުން ހަމަޖެއްސި ބައެއް. އަނެއްބައި 2024 ވަނަ އަހަރުގެ ބަޖެޓުން ވެސް ވަނީ ހަމަޖެހިފައި،" މިނިސްޓަރު ވިދާޅުވިއެވެ.
އާ ބަޖެޓާ އެކު މަޝްރޫއުތަކަށް ބޭނުންވާ ފައިސާ ހަމަޖެހުމާ އެކު މަޝްރޫއުތައް ހުއްޓުމެއްނެތި ކުރިއަށްދާނެކަން މިނިސްޓަރު ފާހަގަކުރެއްވިއެވެ. ޕްރޮޖެކްޓުތަކަށް ޖުމުލަ 620 މިލިއަން ރުފިޔާ ޚަރަދުވެއެވެ. އެކަމަކު، މަޝްރޫއުތަކާ ގުޅޭ ތަފުސީލެއް މިނިސްޓަރު ހާމަކުރައްވައިފައެއް ނުވެއެވެ.