ބޭންކުތައް ފިޔަވައި ސަރުކާރު ހިއްސާވާ ކުންފުނިތަކުގެ އެންމެ އިސް ވެރިންގެ މުސާރަ 90،000އަށް ކުޑަކުރަން ޕްރައިވެޓައިޒޭޝަން އެންޑް ކޯޕްރޮޓައިޒޭޝަން ބޯޑު (ޕީސީބީ)އިން ކުންފުނިތަކަށް މިއަދު އަންގައިފިއެވެ.
ޕީސީބީން މިގޮތައް އަންގާފައި ވަނީ ސަރުކާރު ހިއްސާވާ ކުންފުނިތަކުގެ މުސާރައާއި އިނާޔަތްތަކާ ގުޅޭގޮތުން ނެރުނު ސާކިއުލާއެއްގައެވެ.
މި ސާކިއުލާގައި ވާގޮތުން މިއީ ސަރުކާރުގެ އިގުތިސާދީ އަދި އިސްލާހީ އެޖެންޑާގެ ދަށުން ދައުލަތުގެ ޚަރަދުތައް ކުޑަކުރުމުގެ މަގުސަދުގައި މުސާރައާ ގުޅޭ ގޮތުން ކުރިއަށް އޮތް ދެ އަހަަރު ދުވަހަށް އެޅުމަށް ރައީސް ނިންމަވާފައިވާ ފިޔަވަޅުތަކެކެވެ.
އެގޮތުން މުސާރައާއި އިނާޔަތްތަކުގެ ގޮތުގައި 90،000އަށްވުރެ އިތުރަށް ލިބޭ ޑިރެކްޓަރުންގެ މުސާރައާއި އިނާޔަތްތައް 90،000އަށްވުރެ އިތުރު ނުވާނޭހެން މުސާރައާއި އިނާޔަތްތައް ދިނުމަށް ވަނީ އަންގާފައެވެ. ނަމަވެސް، މި ފިޔަވަޅުތަކުން ރާއްޖެއިން ބޭރުގެ ޑިރެކްޓަރުން އިސްތިސްނާވެއެވެ.
ޓެކްނިކަލް މުވައްޒަފުން ފިޔަވައި އެހެން މުވައްޒަފުންގެ މުސާރަ 90،000އަށްވުރެ އިތުރުވާނަމަ، އިތުރުވާބައި ޑިޑަކްޝަންގެ ގޮތުގައި އުނިކުރުމަށްފަހު 90،000 ރުފިޔާއަށްވުރެ އިތުރުނުވާނޭހެން މުސާރައާއި އިނާޔަތްތައް ދިނުމަށާއި އެކަމާ ގުޅިގެން ގާނޫނީ ގޮތުން މުވައްޒަފުންނާ އެކު ހަދާފައިވާ އެއްބަސްވުންތަކަށް ގެންނަންޖެހޭ ބަދަލުތައް ގެނައުމަށް ވެސް ވަނީ އަންގާފައެވެ.
އެހެންކަމުން މިހިނގާ ޖަނަވަރީ މަހުން ފެށިގެން ކުރިއަށް އޮތް ދެ އަހަރު ދުވަހުގެ މުއްދަތަށް ބޭންކުތައް ފިޔަވައި ސަރުކާރުގެ މެޖޯރިޓީ ހިއްސާވާ ކުންފުނިތަކުން މިގޮތަށް އަމަލުކުރުމަށް ޕީސީބީއިން ވަނީ އެދިފައެވެ.
ޕީސީބީން މިއަދު މިފަދައިން ކުންފުނިތަކަށް އަންގާފައި ވާއިރު، މިއަހަރު ރައީސް ޑރ. މުޙައްމަދު މުއިއްޒުގެ މުސާރައިގެ 50 ޕަސެންޓާއި ރައްޔިތުންގެ މަޖިލީހުގެ މެންބަރުންނާއި ސިޔާސީ މަގާމުތަކުގެ މުސާރަ ކުޑަކުރަން އެމަނިކުފާނު ވަނީ މީގެ ކުރިން ނިންމަވައިފައެވެ.
މިއީ ވެސް ދެ އަހަރު ދުވަހަށް އަޅަން ނިންމާފައިވާ ފިޔަވަޅުތަކެކެވެ.