ސަރުކާރާ ދެކޮޅަށް ލިޔުންތައް ލިޔަމުންގެންދިޔަ ދެ ވެބްސައިޓެއް ބްލޮކް ކުރުމުން، ސަރުކާރަށް ނުރުހުން އަމާޒުވެއްޖެއެވެ.
ލަދުހުތުރު މަންޒަރުތައް ހުންނަ ވެބްސައިޓުތައް ބްލޮކްކުރުމުގެ މަސައްކަތް ސަރުކާރުން ފަށާފައިވަނީ މިދިޔަ ހަފުތާގައެވެ. އެ މަސައްކަތުގެ ތެރެއިން ހުތުރު މަންޒަރުތައް ފެންނަ ގިނަ ވެބްސައިޓުތަކެއް ވަނީ ބްލޮކްކޮށްފައެވެ.
އެކަމަކު، ރޭ ވަނީ އިތުރު ދެ ވެބްސައިޓެއް ބްލޮކްކޮށްފައެވެ. އެއީ،
އެ ދެ ވެބްސައިޓަކީ ވެސް މި ފަހުން ސަރުކާރާ ދެކޮޅަށް ބޮޑެތި ތުހުމަތުތަކެއްކޮށް ލިޔުންތައް ލިޔަމުންގެންދިޔަ ދެ ވެބްސައިޓެވެ. ނޫހެއް ގޮތަށް ލިޔުންތައް ޝާއިއުކުރަމުން ގެންދިޔަ ނަމަވެސް އެއީ ރާއްޖޭގައި ރަޖިސްޓްރީކޮށްގެން ހިންގަމުން އައި ދެ ވެބްސައިޓެއް ނޫނެވެ.
ރާއްޖޭގައި އިންޓަނެޓުގެ ހިދުމަތްދޭ ތަންތަން މޮނިޓާ ކުރާ ކޮމިއުނިކޭޝަންސް އޮތޯރިޓީ އޮފް މޯލްޑިވްސް (ކޭމް) މިހާރު އޮންނަނީ މިނިސްޓްރީ އޮފް ސިޓީސް، ލޯކަލް ގަވާނަންސް އެންޑް ޕަބްލިކް ވޯކްސްގެ ދަށުގައެވެ.
ރޭ ބްލޮކްކުރި ދެ ވެބްސައިޓާ ގުޅިގެން ސަރުކާރުން ބަހެއް ނުބުނި ނަމަވެސް، އިސް ތަރުޖަމާނު މުހައްމަދު ޝަހީބު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ގާނޫނާއި ގަވައިދުތަކުގެ ދަށުން ރާއްޖޭގައި ރަޖިސްޓްރީކޮށްގެން ހިންގާ އެއްވެސް ނޫސް/މަޖައްލާއެއް ސަރުކާރުން ބަންދެއް ވެސް އަދި ބްލޮކެއްވެސް ނުކުރާނެ ކަމަށެވެ.
"ނޫސްވެރިކަމުގެ މިނިވަންކަން އޭގެ އެންމެ ފުޅާމިނުގައި ދެމެހެއްޓުން މި ސަރުކާރުން ކަށަވަރުކުރާނެކަމުގެ ޔަގީންކަން އަރުވަން،" ޝަހީބު ވިދާޅުވިއެވެ.
ސަރުކާރާ ދެކޮޅު ދެ ވެބްސައިޓަށް ނުވަދެވޭ ގޮތަށް ބްލޮކްކުރުމާ އެކު ގިނަ ބަޔަނު އަންނަނީ ނުރުހުން ފާޅުކުރަމުންނެވެ.
އެގޮތުން، އެމްޑީޕީގެ ޗެއާޕާސަން ފައްޔާޒް އިސްމާއިލް އެކްސްގައި ކުރެއްވި ޕޯސްޓެއްގައި ވިދާޅުވީ، ދެ ވެބްސައިޓެއް ބަންދުކުރުމަކީ ވަރަށް ބޮޑަށް ކަންބޮޑުވާ ކަމެއް ކަމަށެވެ. އޭނާ ވިދާޅުވީ، އެއީ ނުރައްކާތެރި ސިގްނަލެއް ކަމަށެވެ.
ފައްޔާޒު ވިދާޅުވީ، "އަނިޔާވެރިކަން ފުޅާވާން އޮތް ހަމައެކަނި ހުރަހަކީ" ސަރުކާރަށް ރައްޔިތުންގެ މަޖިލީހުގެ މެޖޯރިޓީ ލިބިފައިނެތުން ކަމަށެވެ.
އޭނާގެ އިތުރުން، އެމްޑީޕީގެ ޗެއާޕާސަންގެ ނައިބު އިބްރާހިމް ވަހީދު (އިބުރޭ) ވެސް ވަނީ އެ ކަމާ ގުޅިގެން ވަރަށް ބޮޑަށް ކަންބޮޑުވުން ފާޅުކުރައްވައިފައެވެ.
"ބަރަހަނާ ސައިޓުތައް ނިވާފަތްގަނޑަކަށް ހަދައިގެން އަސްލު ބޭނުމަކީ ސަރުކާރަށް ފާޑުކިޔުން ހުއްޓުވުން. އަނިޔާވެރި ވެރިކަމެއްގެ ސިފަތައް ފުރިހަމަވަނީ،" އިބުރޭ ވިދާޅުވިއެވެ.
މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑޭ) ވެސް ވަނީ ދެ ވެބްސައިޓެއް ބްލޮކްކުރުމުގެ ކަންބޮޑުވުން ފާޅުކޮށްފައެވެ. އޭނާ ވިދާޅުވީ، ސަރުކާރަށް ކިރިޔާ މަހެއް ވީއިރު، ބައެއް ވެބްސައިޓުތައް ބަންދުކުރަން ފެށުމަކީ ނުހަނު ކަންބޮޑުވާ ކަމެއް ކަމަށެވެ.
އަދި، "ލިޔާހާ އެއްޗަކަށް ސަރުކާރަކުން ގުޑުގުޑުލާން ފަށައިފިނަމަ އެ ހަދައިދެވެނީ ސަރުކާރާމެދު މާ ބޮޑަށް ޝައްކުކުރާނެ ޖާގަ،" ކަމަށް އޭނާ ވިދާޅުވިއެވެ.