ސަރުކާރުގެ އިސްވެރިންނާއި ރައްޔިތުންގެ މަޖިލީސް މެންބަރުން ހިމެނޭހެން މަޖިލީހުން ކަނޑައަޅަން ޖެހޭ މުސާރަތައް ބޮޑުކުރަން ނިންމީ ކޮމިޓީގައި މަޝްވަރާކުރުމަށް ފަހުގައި އެންމެން ވެސް ރުހިގެން ކަމަށާއި މިހާރު އެ ބޭފުޅުން ދެކޮޅު ހައްދަވަނީ ސިޔާސީ ސަބަބުތަކަކަށްޓަކައި ކަމަށް އެމްޑީޕީން މިއަދު ބުނެފިއެވެ.
މަޖިލީސް މެންބަރުންނާއި ރައީސުލްޖުމްހޫރިއްޔާގެ މުސާރަ ހިމެނޭހެން މުސާރަތައް ބޮޑުކުރަން އިއްޔެ މާލިއްޔަތު ކޮމިޓީން ފާސްކުރުމާ އެކު ގިނަ ބައެއްގެ ނުރުހުން ވަނީ އަމާޒުވެފައެވެ. އާންމުން ނުރުހުންވުމުން ސަރުކާރުން ވަނީ އެއީ އާ ސަރުކާރުން އެދިގެން ގެނައި ބަދަލެއް ނޫންކަން ކަށަވަރުކޮށްދީފައެވެ.
އެ މައްސަލައިގައި ކަން ހިނގާދިޔަގޮތް ސާފުކޮށްދެއްވަން އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޕާލިމަންޓްރީ ގްރޫޕުގެ ލީޑަރު މުހައްމަދު ރަޝީދު ހުސައިން (ބިގޭ) ވިދާޅުވީ، މި ދައުރުގައި ގިނަ ދުވަސްތަކެއް ވަންދެން މަޖިލީހުގައި މުހިއްމު މަސައްކަތްތަކެއް ނުހިނގާ އޮތުމަށް ފަހު، މަޖިލީހުގެ މަސައްކަތްތައް ރަނގަޅަށް ހިނގަން ފަށާފައިވަނީ މި ފަހުން ކަމަށެވެ.
"ޕޭ ހާމަނައިޒްކުރުމަށް ކަނޑައެޅިފައި އޮންނަ ހާއްސަ ކޯޑަކަށް ދިރާސާކުރުމުގެ ތެރޭގައި އަޅުގަނޑުމެން ވާނެ 500 މިލިއަން، އެ ކަމަށް ހާއްސަކޮށްފައި. އެ ކޯޑަކީ އެއީ ހަމައެކަނި މަޖިލީހުން މުސާރަ ބޮޑުކުރާ ފަރާތްތަކަށް އެކަންޏެއް ނޫން،" ބިގޭ ވިދާޅުވިއެވެ.
އޭނާ ވިދާޅުވީ، މުސާރަތައް ބޮޑުކުރަން ހަމަޖެއްސި 500 މިލިއަންގެ ތެރެއިން 90 މިލިއަން ކަނޑައަޅަން ކޮމިޓީން ލަފާދީފައިވާ ކަމަށެވެ.
މުސާރަތައް ބޮޑުކުރަން މާލިއްޔަތު ކޮމިޓީން އިއްޔެ ނިންމުމާ އެކު އާންމުންގެ ނުރުހުން އަމާޒުވުމުން ބައެއް މެންބަރުން ވަނީ މުސާރަ ބޮޑުކުރަން ތާއީދުނުކުރާކަން ހާމަކުރައްވައިފައެވެ. އަދި، ދަ ޑިމޮކްރެޓްސްއިން ވެސް ވަނީ މުސާރަތައް ބޮޑުކުރުމާ ދެކޮޅަށް ތްރީލައިން ރެޑްވިޕެއް ނެރެފައެވެ.
ބިގޭ މިއަދު ވިދާޅުވީ، މުސާރަތައް ބޮޑުކުރުމުގެ މަސައްކަތް ކުރިއަށްދިޔައިރު ފަނޑިޔާރުންގެ ޖަމިއްޔާއިންނާއި ކައުންސިލްތަކުން ވެސް ބައްދަލުކޮށް މުސާރަތަކަށް ހެޔޮ ބަދަލެއް ގެނައުމާ ގުޅޭ ގޮތުން މަޝްވަރާ ކޮށްފައިވާ ކަމަށެވެ. އެގޮތުން، ފަނޑިޔާރުންނަކީ އެހެން މަސައްކަތެއްގައި ނޫޅުއްވޭ ދާއިރާއެއް ކަމުން އެ ބޭފުޅުންގެ މުސާރައަށް 13 އަހަރު ވަންދެން ނާއިސް އޮތް ކުރިއެރުން ގެނެސްދޭން އެދިފައިވާ ކަމަށް އޭނާ ވިދާޅުވިއެވެ.
"މި ވަގުތު އެ ފާޑުވިދާޅުވަމުންދާ މެންބަރުން ހިމެނިވަޑައިގަންނަވާ ގޮތަށް، މާލިއްޔަތު ކޮމިޓީގައި ހިމެނިވަޑައިގަންނަވާ ބޭފުޅުން ވެސް މި ދިރާސާކުރަމުންދިޔަ ވަގުތު ކޮމިޓީގައި ތިއްބެވި ބޭފުޅުންގެ ފަރާތުން މައުލޫމާތު ލިބުން ގޮތުގައި ވަރަށް އެއްބާރުލުން ދެއްވައި، އެކަން ކުރުމުގެ ބޭނުމުގައި ވާހަކަދައްކަވާފައި ހުރީ،" އޭނާ ވިދާޅުވިއެވެ.
"އެކަމަކު، ސިޔާސީ ބޭނުމަށްޓަކައި މީޑިއާތަކުގައި ތަފާތު ގޮތްގޮތަށް ވާހަކަދެކެވިގެން ދިޔަ ނަމަވެސް މި ކަންކަން މިގޮތަށް ކުރުމަށްޓަކައި އަޅުގަނޑުމެންނާ ހަމައަށް ބަޖެޓު ދިރާސާކުރި ދުވަސްވަރު ވެސް އަދި އެހެން ގޮތްގޮތުން ވެސް މަޖިލީހަށް ލިބިފައިހުރި ހުށަހެޅުންތަކުގެ މައްޗަށް ރިއާޔަތްކޮށް މުސާރަތަކަށް މި ގެނައި ކުރިއެރުން ގެންނަން މަޖިލީހުން ނިންމީ،"
އޭނާ ވިދާޅުވީ ހަމައެކަނި މަޖިލީސް މެންބަރުންގެ މުސާރަތަކަށް ބަދަލު ގެނައި ނޫން ކަމަށާއި ޕޭހަމަނައިޒޭޝަންގެ ތެރެއިން މަޖިލީހުން މުސާރަ ކަނޑައަޅަން ޖެހޭ ހުރިހާ ބޭފުޅުންގެ މުސާރައަށް ވެސް އެއް މިނެއްގައި އެ ބަދަލު ގެންނަން ކޮމިޓީން ނިންމީ ކަމަށެވެ. ކޮމިޓީން މުސާރަތައް ބޮޑުކުރަން ނިންމި ނަމަވެސް އެ ނިންމުން ތަންފީޒުކުރަން ފަށާނީ މަޖިލީހުގެ ތަޅުމުން އެ ނިންމުން ފާސްވުމުންނެވެ.
އިންތިޚާބީ މަގާމުތަކާއި ޖުޑިޝަރީގެ މުސާރަތައް ބޮޑުކުރަން އިއްޔެ މާލިއްޔަތު ކޮމިޓީން ނިންމީ، އެ ކޮމިޓީއަށް އިއްޔެ ހާޒިރުވެވަޑައިގެން ތިއްބެވި މެންބަރުންގެ އަޣުލަބިއްޔަތުންނެވެ.