ރިޔާސީ އިންތިޚާބުގައި ލިބުނު ބޮޑު ނާކާމިޔާބީއާ އެކު އެންމެ ބޮޑު ޕާޓީ، އެމްޑީޕީން މިހާރު އަމާޒު ހިފާފައި ހުރީ އެ ޕާޓީގެ ކުރީގެ ރައީސް މުޙައްމަދު ނަޝީދުގެ ޒަމާންވީ ހުވަފެން ކަމަށްވާ ބަރުލަމާނީ ނިޒާމް، ރާއްޖެ ގެނައުން ނިމުމަކަށް ގެންނަން ކަމަށް ޕާޓީގެ އިސް ބޭފުޅުން ވިދާޅުވެއްޖެއެވެ.
ރައީސް އިބްރާހީމް މުޙައްމަދު ޞާލިޙާއި ރައީސް ނަޝީދުގެ ޒަމާންވީ ގުޅުން ގޯސްވެގެން ދިޔައީ މި ވެރިކަމުގެ ވަކި ހިސާބަކުން ރައީސް ނަޝީދު ބޮޑުވަޒީރަކަށް ވެވަޑައިގަންނަވަން ބޭނުންފުޅުވެގެން އެކަން ރައީސަށް ހުށަހެޅުއްވުމުން ރައީސް އެ ފުރުސަތު ނުދެއްވި ހިސާބުންނެވެ. އެއާއެކު މި އަހަރުގެ ރިޔާސީ އިންތިޚާބު އަންނަން ނުހަނު ކައިރިވެފައިވަނިކޮށް ރައީސް ނަޝީދު ވަނީ އެމްޑީޕީން ވަކިވެވަޑައިގެން ދަ ޑިމޮކްރެޓްސްގެ ނަމުގައި ވަކި ޕާޓީއެއް އުފައްދަވާފައެވެ. އަދި، އެ ޕާޓީން ރިޔާސީ އިންތިޚާބަށް ކުރިމަތިލެއްވި ކެންޑިޑޭޓުން ވަނީ ރިޔާސީ އިންތިޚާބުގެ ފުރަތަމަ ބުރުގައި ވާދަ ކުރައްވާ ތިންވަނަ ހޯއްދަވާފައެވެ.
އެމްޑީޕީ ދެބައި ވުމަކީ މި ފަހަރުގެ ރިޔާސީ އިންތިޚާބު ކާމިޔާބު ކުރެއްވުމަށް ރައީސް ޞާލިޙަށް ކުރިމަތިވެ ވަޑައިގެންނެވި އެންމެ ބޮޑު އެއް ގޮންޖެހުމެވެ.
ރިޔާސީ އިންތިޚާބަށް ޑިމޮކްރެޓްސްގެ ތާއީދު ހޯއްދެވުމަށް ރައީސް ޞާލިޙް ވެސް އެއްބަސްވެވަޑައިގަތީ އިންތިޚާބުގެ ފަހު ބުރަށް ފަހު، ނިޒާމީ ވޯޓެއް މި މަހުގެ ތެރޭގައި ބޭއްވުމަށެވެ. ނަމަވެސް ނިޒާމީ ވޯޓުގައި ތާއީދު ކުރައްވާނެ ގޮތެއް އެމްޑީޕީއަކުން ވެސް އަދި ރައީސެއް ވެސް ހާމައެއް ނުކުރައްވައެވެ.
އެމްޑީޕީގެ ވެރިން ތިއްބަވާ ވަޓްސްއަޕް ގޫރޫޕަށް އެ ޕާޓީގެ ޗެއާޕާސަން ފައްޔާޒް އިސްމާއިލް މިއަދު ފޮނުއްވި މެސެޖެއްގައި ވިދާޅުވީ ޑރ. މުޙައްމަދު މުއިއްޒު ރައްޔިތުން އިންތިޚާބު ކުރީ ފަސް އަހަރަށް ކަމަށާއި އެހެންކަމުން އެ މަނިކުފާނަށް ވެރިކަން ކުރުމަށް އޮތް ހުރަހަކަށް އެމްޑީޕީ ވެގެން ނުވާނެ ކަމަށެވެ.
އެހެންކަމުން ބަރުލަމާނީ ނިޒާމަށް ބުނެބޭނީ ނޫނެކޭ ކަމަށް ފައްޔާޒް ވިދާޅުވިއެވެ.
ބާރަށު ދާއިރާގެ އެމްޑީޕީ މަޖިލިސް މެންބަރު އަޙްމަދު އަބްދުﷲ ވެސް މިއަދު ވިދާޅުވީ މި ރާއްޖެއަށް ބަރުލަމާނީ ނިޒާމެއް ގެނައުމާ ދެކޮޅަށް ކުރެވެންހުރި މަސައްކަތެއް ކުރުމަށް އަޒުމު ކަނޑައަޅައިފައިވާ ކަމަށެވެ.
ރައީސް ޞާލިޙާއި އެމްޑީޕީއަށް ސަޕޯޓް ކުރާ އާއްމުން ވެސް އަންނަނީ ބަރުލަމާނީ ނިޒާމު ގެނައުމަށް ރައީސް ނަޝީދު ކުރައްވަމުން އަންނަ ހުވަފެން، ވޯޓުން ނިމުމަކަށް ގެންނާނެ ކަމަށް ބުނަމުންނެވެ.
އިންތިޚާބުން އެމްޑީޕީއަށް ލިބުނު ނާކާމިޔާބީއަށް ފަހު ރައީސް ނަޝީދުގެ ރަސްމީ ޓްވިޓާ އެކައުންޓުން ވަނީ ޕާޓީގެ މެންބަރުންނާ ދިމާ ނުކުރުމަށް އެދިވަޑައިގެންފައެވެ. އެއަށް ފަހު މިއަދު ނަޝީދު ވަނީ އެމްޑީޕީގެ ގައުމީ މަޖިލީހުގެ ތާއީދު އޮތް ނަމަ، އަލުން އެ ޕާޓީއާ ގުޅެން ތައްޔާރުކަން ހާމަ ކުރައްވާފައެވެ.
އެއާ އެކު ވެސް ނަޝީދާ ދެކޮޅު ޝުއޫރުތަކެއް ޕާޓީގެ ތެރޭގައި އަންނަނީ ފެތުރެމުންނެވެ. އެމްޑީޕީގެ ޗެއާޕާސަންގެ ނައިބު އަދި ރައީސް އޮފީހުގެ މިނިސްޓަރު އިބްރާހީމް ވަހީދު (އިބްރޭ) ވިދާޅުވި ގޮތުގައި ނަޝީދު އަނބުރާ އެމްޑީޕީއާ ގުޅުމަށް ޕާޓީގެ ގައުމީ މަޖިލީހުން ތާއީދު ކުރި ނަމަވެސް އޭނާ އަމިއްލަ ގޮތުން އެކަމަށް ތާއީދު ނުކުރައްވާނެ ކަމަށެވެ.
ބަރުލަމާނީ ނިޒާމެއް ގެނައުމުގެ ޒަމާންވީ ހުވަފެން ހަގީގަތަކަށް ހެއްދެވުމަށް ރައީސް ނަޝީދާއި އެ މަނިކުފާނަށް ތާއީދު ކުރައްވާ ފަރާތްތަކުން އަންނަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ޕީޕީއެމާއި އެމްޑީޕީގެ ތާއީދާ އެކު ބަރުލަމާނީ ނިޒާމާ ގުޅޭ ގޮތުން ރައްޔިތުންގެ ފެންނަ ނުފެންނަ ވޯޓަކަށް ދިއުމަށް މަޖިލީހުން ގަރާރެއް ފާސްކޮށް އިލެކްޝަންސް ކޮމިޝަނަށް ވަނީ އެ އިންތިޚާބު މި މަހު 30 ގެ ކުރިން ބާއްވަން އަންގާފައެވެ.
ނަމަވެސް މި ހުވަފެން ހަގީގަތަކަށް ވުމަކީ ވަރަށް ދުރުކަމެކެވެ. އެއީ، ރާއްޖޭގައި އެންމެ ގިނަ މީހުން ތާއީދު ލިބިފައިވާ ރައީސް އަބްދުﷲ ޔާމީނާއި ރައީސް ޞާލިޙްގެ އިތުރުން ޖުމްހޫރީ ޕާޓީގެ ލީޑަރު ގާސިމް އިބްރާހީމް ވެސް ބަރުލަމާނީ ނިޒާމެއް ރާއްޖެއަށް ގެންނަން ތާއީދު ނުކުރައްވާކަން ކުރިން ވަނީ ހާމަކުރައްވާފައެވެ. ބަރުލަމާނީ ނިޒާމެއް ގެނައުމުގެ މަޝްވަރާއަށް ރައީސް ޔާމީން ޖަލުގައި ހުންނަވަނިކޮށް ނަޝީދު ބައްދަލުކުރައްވަން އެދިވަޑައިގަތުމުން، ޔާމީން އެ ފުރުސަތު ވެސް ނުދެއްވިއެވެ.