އެމްޑީޕީއާ އަލުން ގުޅެން ތައްޔާރު: ނަޝީދު

އެމްޑީޕީގެ ގައުމީ މަޖިލީހުގެ ތާއީދު އޮތް ނަމަ، އަލުން އެ ޕާޓީއާ ގުޅެން ތައްޔާރު ކަމަށް އެ ޕާޓީގެ ރައީސްކަމުން އިސްތިއުފާ ދެއްވި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.

އެގޮތަށް ނަޝީދު ހުށަހެޅުއްވީ އެމްޑީޕީގެ ޗެއާޕާޝަން އަދި އިކޮނަމިކް މިނިސްޓަރު ފައްޔާޒު އިސްމާއީލަށް ފޮނުއްވި މެސެޖެއްގައެވެ. އެ މެސެޖް ފައްޔާޒު ވަނީ އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް ފޮނުވާފައެވެ.

ފައްޔާޒަށް ނަޝީދު ފޮނުވި މެސުޖުގައި ވިދާޅުވެފައިވަނީ, އެމްޑީޕީގެ ގައުމީ މަޖިލީހުގެ 50 އިންސައްތަ މެންބަރުންގެ ތާއީދު އޮތް ނަމަ އެ މަނިކުފާނު އެމްޑީޕީއާ ގުޅިވަޑައިގަތުމަށް ތައްޔާރަށް ހުންނެވި ކަމަށެވެ.

އެ މެސަޖަށް ފައްޔާޒު ޖަވާބު ދެއްވާފައިވާކަން ކަށަވަރު ނުވި ނަމަވެސް އޭނާ ވަނީ އެ މެސެޖް ގައުމީ މަޖިލިސް ގްރޫޕަށް ފޮނުވީ މެންބަރުންނާ ހިއްސާ ކުރުމަށް ކަމަށް ވިދާޅުވެފައެވެ.

ރާއްޖޭގައި އެންމެ ފުރަތަމަ ސިޔާސީ ޕާޓީއެއް އުފެއްދުމަށް އެންމެ ބުރު މަސައްކަތްތަކެއް ކުރައްވައި އެ ޕާޓީގެ ޓިކެޓްގައި ވެރިކަމަށް ވަޑައިގަތް ނަޝީދު އެމްޑީޕީން ވަކިވެވަޑައިގަތީ މިދިޔަ ޖޫން މަހުގެ 21 ވަނަ ދުވަހުއެވެ. އެ މަނިކުފާނު އެމްޑީޕީން ވަކިވެވަޑައިގަތީ ރައީސް އިބްރާހިމް މުހައްމަދު ޞާލިހާ ދެމެދު އުފެދުނު ހިޔާލު ތަފާތުވުންތަކަށް ފަހު އެއްގަލަކަށް ނޭރި ދެ ބޭފުޅުންގެ ގުޅުން ވަރަށް ބޮޑަށް ހީނަރުވެފައިވަނިކޮށެވެ.

ނަޝީދު އެމްޑީޕީން ވަކިވެވަޑައިގަތް އިރު އެ މަނިކުފާނަށް ތާއީދުކުރައްވާ މަޖިލިސް މެންބަރުން އިސްވެ ވަނީ 'ދަ ޑިމޮކްރެޓްސް' ގެ ނަމުގައި ސިޔާސީ ޕާޓީއެއް އުފައްދާފައެވެ.

ނަޝީދު ވަނީ ޑިމޮކްރެޓްސްއަށް ސޮއި ކުރެއްވުމަށް ފަހު، "އެމްޑީޕީ ރޫޅައިލާނެ" ކަމަށް ވިދާޅުވެ، އެމްޑީޕީއާއި ރައީސް ޞާލިޙަށް ވަރަށް ބޮޑަށް ފާޑު ވިދާޅުވެފައެވެ.

ނިމިގެން ދިޔަ ރިޔާސީ އިންތިހާބުގައި ނަޝީދު ތާއިދު ކުރައްވާފައި ވަނީ ވެސް ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބަށެވެ. އަދި، ދެވަނަ ބުރުގައި ނަޝީދާއި ޑިމޮކްރެޓްސްގެ ތާއީދު ހޯދުމަށް އެމްޑީޕީން މަސައްކަތް ކުރި ނަމަވެސް އެކަން ކާމިޔާބުވާ ގޮތް ނުވެ އިއްޔެ ބޭއްވި ރިޔާސީ އިންތިހާބުން ރައީސް ޞާލިހް ވަނީ ނާކާމިޔާބުވެވަޑައިގަންނަވާފައެވެ.

ނަޝީދަކީ އެމްޑީޕީ އުފެއްދުމުގައި ވެސް ބުރަ މަސައްކަތްތަކެއް ކުރެއްވި ބޭފުޅެކެވެ. އަދި، ރައީސް އިބްރާހިމް މުހައްމަދު ޞާލިޙަށް ޓިކެޓު އެރުވުމާ ހަމައަށް ވެސް އެ ޕާޓީގައި އެންމެ މަގުބޫލު ބޭފުޅާއެވެ.