ތިން ވަނަ ފަހަރަށް ރިޔާސީ އިންތިޚާބުގައި ވާދަކުރައްވާ ޖުމްހޫރީ ޕާޓީގެ ލީޑަރު، ގާސިމް އިބްރާހީމްގެ ހަގު އަނބިކަނބަލުން ފާތިމަތު ރާނިޔާ ވެސް ގާސިމްގެ ކެމްޕެއިންގައި ރަށްރަށަށް ވަޑައިގަންނަވަން ފައްޓައިފިއެވެ.
ގާސިމްގެ ހަތަރު އަނބިކަނބަލުން ތިއްބަވާއިރު މިހާތަނަށް ސިޔާސީ ކަންކަމުގައި އެކުގައި އުޅުއްވަމުން ގެންދެވީ، ޓްރާންސްޕޯޓް މިނިސްޓަރު އައިޝަތު ނަހުލާ އެކަންޏެވެ. އޭނާ އަންނަނީ މި ކެމްޕެއިންގައި ވެސް އިސްކޮށް ހަރަކާތްތެރިވަމުންނެވެ.
ރާނިޔާ އިއްޔެ ވަނީ އދ. ދަނގެއްޗަށް ވަޑައިގެން އެ ރަށުން ގާސިމަށް ވޯޓް ހޯއްދެއްވުމަށް މަސައްކަތް ކުރައްވާފައެވެ. އޭނާ ދަނގެއްޗަށް ވަޑައިގަތުމުން ހޫނު މަރުހަބާއެއް ވަނީ ކިޔައިފައެވެ. މިއީ ރާނިޔާ މިފަދަ ހަރަކާތަކުން ފެނުނު ފުރަތަމަ ފަހަރެވެ.
ގާސިމްގެ ހަގު އަނބިކަނބަލުން ރާނިޔާ(ދިގު ހުދު ހެދުމެއްގައި) ކެމްޕެއިންގައި-- ފޮޓޯ: ޖޭޕީ
ޖުމްހޫރީ ޕާޓީގެ ތަރުޖަމާން ޢަލީ ޞާލިޙް މިއަދު "ސަން" އަށް ވިދާޅުވީ ނަހުލާ އާއި ރާނިޔާގެ އިތުރުން ވެސް ގާސިމްގެ އިތުރު އަނބިންނާއި ދަރިން ވެސް އެމަނިކުފާންގެ ކެމްޕެއިންގައި ހަރަކާތްތެރިވަމުން އަންނަ ކަމަށެވެ.
އދ. މާމިގިއްޔަށް ނިސްބަތްވާ ރާނިޔާއާއި ގާސިމް ކައިވެނި ބައްލަވައިގަތީ 2020 ވަނަ އަހަރުއެވެ. އޭރު ގާސިމްގެ އުމުރުން 70 އަހަރު ވެފައިވާއިރު ރާނިޔާގެ އުމުރަކީ 21 އެވެ.