ރައީސްކަން ލިބޭނެ ކަމުގެ ޔަގީންކަމާ އެކު ރިޔާސީ ރޭހަށް ނުކުމެތިބިތަން ފެންނަނީ ވަރަށް މަދު ކެންޑިޑޭޓެކެވެ. ދެން ތިބި ބައެއް ކެންޑިޑޭޓުންނަކީ ވެރިކަން ހޯދާ ކޯލިޝަނުން ބައި ހޯދުމަށް ނުކުމެ އުޅޭ ބައެއް ކަމަށް ވާހަކަދެކެވެއެވެ. އަދި، އަނެއްބައި ކެންޑިޑޭޓުންގެ މަގުސަދަކީ 2028ގެ އިންތިޚާބަށްޓަކައި ލީޑަރެއްގެ ގޮތުގައި ތައާރަފުވުން ކަމަށް ވެސް ވާހަކަ ދެކެވެއެވެ. ސުވާލަކީ މީގެ ތެރެއިން ދަ ޑިމޮކްރެޓްސްގެ ކެންޑިޑޭޓު އިލްޔާސް ލަބީބްގެ ހަގީގީ މަގުސަދަކީ ކޮބާތޯއެވެ؟
ރައީސް މުޙައްމަދު ނަޝީދަށް އެމްޑީޕީގެ ރިޔާސީ ޕްރައިމަރީ ނާކާމިޔާބު ވުމުން އެ ނަތީޖާ ގަބޫލު ނުކުރަންވެގެން ޕާޓީން ވަކިވި ބޭފުޅުންތަކާ އެކު ނަޝީދު އިސްވެ އުފެއްދެވި ޑިމޮކްރެޓްސްއަކީ ވަރަށް ކުޑަ ޕާޓީއެކެވެ. އެމްޑީޕީން އުސޫލުގެ ބޭރުން 30،000 އެއްހާ މެންބަރުން ވަކިކޮށްފައިވާ ކަމަށާއި އޭގެ ތެރޭގައި ގިނައީ ރައީސް ނަޝީދުގެ ސަޕޯޓަރުން ކަމަށް ޑިމޮކްރެޓްސްގެ ބޭފުޅުން އޭރު ވިދާޅުވިއެވެ. އެއަށް ފަހު އެ ޕާޓީއަށް މެންބަރުން އިތުރު ކުރުމަށް ނަޝީދާއި އެ ޕާޓީގެ ލީޑާޝިޕް އިސްވެ އެތައް މަސައްކަތެއް ކުރެއްވިއެވެ. އަދިވެސް އަންނަނީ ކުރައްވަމުންނެވެ. ނަމަވެސް އިލެކްޝަންސް ކޮމިޝަން (އީސީ)ގެ ތަފާސްހިސާބުތައް ދައްކާގޮތުން އެ ޕާޓީގައި އަދި ރަޖިސްޓްރީވެފައި ތިބީ އެންމެ 3280 މެންބަރުންނެވެ.
ރިޔާސީ އިންތިޚާބުގައި ވާދަ ކުރައްވާ އެހެން ޕާޓީތަކާއި ކޯލިޝަންތަކާ އަޅާބަލާއިރު މި ފަހުން އުފެއްދި ޑިމޮކްރެޓްސްއަކީ އަދި ވަރަށް ކުޑަ ޕާޓީއެކެވެ. އެހެންކަމުން ވެރިކަމާ ވާދަކޮށްލެވޭނެތޯ މިއީ މުހިންމު ސުވާލެކެވެ.
ދަ ޑިމޮކްރެޓްސްގެ ރިޔާސީ ކެންޑިޑޭޓު އިލްޔާސް ލަބީބްގެ ކެންޑިޑެސީ ހުށަހެޅުން -- ފޮޓޯ/ އިލެކްޝަންސް ކޮމިޝަން
ޑިމޮކްރެޓްސްގެ އަމާޒަކީ ވޯޓު ބައިބައި ކުރުންތަ؟
މިދިޔަ ހޮނިހިރު ދުވަހު ބޭއްވި ރިޔާސީ ބަހުސްގައި ވެސް ޑިމޮކްރެޓްސްގެ ކެންޑިޑޭޓް އިލްޔާސްގެ އަމާޒަކަށް ވެފައިވަނީ ރައީސް އިބްރާހީމް މުޙައްމަދު ޞާލިޙްގެ ސަރުކާރަށް ފާޑުވިދާޅުވުމެވެ. ބަހުސްގައި ވެސް އިލްޔާސްގެ ހުރިހާ ޖަވާބެއްހެން، ފެއްޓެވީ ސަރުކާރަށް ރައްދު ދެއްވަމުންނެވެ. ސަރުކާރު ގޯސްކަން ކިޔައިދެއްވަމުންނެވެ.
ޑިމޮކްރެޓްސްގެ އިސް ބޭފުޅުންނާއި އެކްޓްވިސްޓުން ސޯޝަލް މީޑިއާގައި ވެސް ކުރަމުން އަންނަނީ އެ މަސައްކަތެވެ. އެ ބޭފުޅުންގެ ނަފުރަތާއި ރުޅިވެރިކަމާ އެކު ހުރިހާ ޓާގެޓަކަށް ވެފައިވަނީ މި ސަރުކާރާއި ރައީސް އިބްރާހިމް މުހައްމަދު ޞާލިޙެވެ. އިދިކޮޅު އެހެން ކެންޑިޑޭޓުންގެ ވާހަކައެއް ވަރަށް މަދުން ނޫނީ ނުދައްކައެވެ.
ސިޔާސީ ދާއިރާގައި ކުރިން ވަރަށް ބޮޑަށް ހަރަކާތްތެރިވި ބޭފުޅަކު ނަން ނުޖަހަން ޝަރުތުކޮށް ވިދާޅުވި ގޮތުގައި ޑިމޮކްރެޓްސްގެ އަމާޒެއްގެ ގޮތުގައި މި އިންތިޚާބުގައި އެ ބޭފުޅާއަށް ފެންނަނީ އެމްޑީޕީ ފިކުރުގެ ވޯޓުތައް ބައިބައި ކުރުމެވެ. އެއީ، ރައީސް ޞާލިޙަށް އިންތިޚާބު ކާމިޔާބު ކުރުމުގެ ފުރުސަތު ނުދޭން ކުރެވޭ މަސައްކަތެއް ކަމަށް އޭނާ ވިދާޅުވިއެވެ.
"ކޮންމެ ގޮތެއް ވިޔަސް އެމްޑީޕީގެ ތެރެއިން ރައީސް ނަޝީދަށް ތާއީދު ކުރާ ބައެއް މެންބަރުން އެ މަނިކުފާނު ނުކުމެ އިލްޔާސަށް ވޯޓް ދޭން ވިދާޅުވީމަ ދޭނެ. އެއީ އެއްގޮތަކަށް ވެސް އިލްޔާސް އިންތިޚާބު ކާމިޔާބު ކުރަން ހޯދާ ވޯޓެއް ނޫން. އެއީ ރައީސް ޞާލިޙަށް އިންތިޚާބު ކާމިޔާބު ކުރިޔަ ނުދޭން ހޯދާ ވޯޓު،" އެ ބޭފުޅާ ވިދާޅުވިއެވެ.
ރިޔާސީ އިންތިޚާބު ކާމިޔާބު ކުރަން ރައީސް ޞާލިޙަށް ކުރިމަތިވާނެ އެންމެ ބޮޑު ގޮންޖެހުމަކަށް ވާނީ އެމްޑީޕީގެ ފިކުރުގެ ވޯޓުތަކެއް އެ މަނިކުފާނަށް ގެއްލުމެވެ. ޑިމޮކްރެޓްސްއިން ކުރަމުން އަންނަ މަސައްކަތަކީ އެއީ ކަމަށް އެ ބޭފުޅާ ވިދާޅުވިއެވެ.
ހޮވޭނެނަމަ ނުކުންނަވާނީ ނަޝީދު!
އިންތިޚާބާ ހަމައަށް މަޖިލީހުގެ ނައިބު ރައީސް، އަދި ރައީސް ނަޝީދުގެ ކޮއްކޯފުޅު އީވާ އަބްދުﷲ ވިދާޅުވަމުން ގެންދެވީ މި ފަހަރުގެ ރިޔާސީ އިންތިޚާބުގައި ނަޝީދު ވާދަކުރައްވާނެ ކަމަށެވެ. ވޯޓު ކަރުދާހުގައި ނަޝީދުގެ ނަން އޮންނާނެ ވާހަކައެވެ. ނަމަވެސް ފަހުން ފެނިވަޑައިގަތީ ޖުމްހޫރީ ޕާޓީ (ޖޭޕީ)ގެ ލީޑަރު ގާސިމް އިބްރާހީމް ވެރިކަމަށް ގެނައުމަށް ނަޝީދު އުޅުއްވިތަނެވެ. ރައީސް އިބްރާހީމް މުޙައްމަދު ޞާލިޙްގެ ކޯލިޝަނުގައި ޖޭޕީ އޮއްވައި ނަޝީދު، ގާސިމަށް ވިސްނައި ދެއްވީ މިއީ ގާސިމް ވެރިކަމަށް ވަޑައިގަންނަވަން އެންމެ ރަނގަޅު ފުރުސަތު ކަމަށެވެ. ދެ ޕާޓީ އެކީގައި އެތައް މަޝްވަރާއެއް ކުރިއެވެ. ނަމަވެސް ބަރުލަމާނީ ނިޒާމު ގެނައުން ހިމެނޭގޮތަށް ނަޝީދު ކުރެއްވި ޝަރުތުތައް ގާސިމަށް ކަމު ނުދިޔައެވެ.
ރައީސް ނަޝީދާއި އިލްޔާސް ލަބީބް އައްޑޫގައި -- ފޮޓޯ/ ދަ ޑިމޮކްރެޓްސް
އެހާ ހިސާބުން ދެ ބޭފުޅުންގެ ގުޅުން ގޯސްވިއެވެ. ގާސިމް ފަހުން ވިދާޅުވީ ނަޝީދު މަސައްކަތް ކުރެއްވީ އޭނާ ބޭނުން ކުރައްވައިގެން ނަޝީދު ވެރިކަމަށް ވަޑައިގަންނަވާނެ މަގެއް ކޮށުމަށް ކަމަށެވެ. އަދި، ނަޝީދު ނޫން ބޭފުޅަކު ވެރިކަން ކުރައްވަން އެ މަނިކުފާނު ބޭނުންފުޅު ނުވާނެ ކަމަށް ވެސް ގާސިމް ވިދާޅުވިއެވެ.
އެހާ ހިސާބުން ވެސް ޑިމޮކްރެޓްސްއިން ވަކިން އިންތިޚާބުގައި ވާދަ ކުރުމަށް ވުރެން މަސައްކަތް ކުރެއްވީ އެހެން ޕާޓީއެއްގެ ކެންޑިޑޭޓަކަށް ތާއީދު ކުރުމަށެވެ. އެގޮތުން ގާސިމްގެ އިތުރުން އެމްއެންޕީގެ ރިޔާސީ ކެންޑިޑޭޓް މުޙައްމަދު ނާޒިމާ އެކު އެއް ކެންޑިޑޭޓަކު ނެރުމަށް ނަޝީދު ވަރަށް މަޝްވަރާ ކުރެއްވިއެވެ.
ގާސިމްގެ އަރިސްބޭފުޅަކު ވިދާޅުވި ގޮތުގައި ނަޝީދު، ގާސިމަށް ހުށަހެޅުއްވީ އެމްޑީޕީއަށް ނިސްބަތްވާ މަޖިލީހުގެ 13 މެންބަރަކު ޑިމޮކްރެޓްސްއާ ގުޅުވައި ދިނުމަށެވެ. އެ ހަރަދު ކޮށްދީފިނަމަ ޑިމޮކްރެޓްސްއިން ވަކިން އިންތިޚާބުގައި ވާދަނުކޮށް ގާސިމަށް ތާއީދު ކޮށްދޭނެ ކަމަށް ނަޝީދު ހުށަހެޅުއްވި ކަމަށެވެ. ނަމަވެސް އެ ވަރުގެ ހަރަދެއް ކުރަން ގާސިމް ބޭނުންފުޅު ނުވީ ކަމަށް އެ ބޭފުޅާ ވިދާޅުވިއެވެ.
އެގޮތަށް ހުށަހެޅުއްވިކަން ޑިމޮކްރެޓްސްއިން ދޮގު ކުރެއެވެ. އަދި، ގާސިމާ އެކު ހަމައެކަނި ކުރި މަޝްވަރާއަކީ އެއް ކެންޑިޑޭޓަކު ނެރުމުގެ މަޝްވަރާ ކަމަށް އެ ޕާޓީން ބުނެއެވެ.
ރައީސް ނަޝީދާ ވަރަށް އަރިސްކޮށް މަސައްކަތް ކުރެއްވި މިހާރުގެ އެމްޑީޕީގެ މަޖިލިސް މެންބަރަކު ވިދާޅުވި ގޮތުގައި ސިޔާސީ ހިސާބު ޖެހުމަށް ނަޝީދަކީ ކުޅަދާނަ ބޭފުޅެކެވެ. އެ ހިސާބުތަކުން ޑިމޮކްރެޓްސްއަށް ވެރިކަމާ ހަމައަށް ކިރިއާ އާދެވޭ ނަމަވެސް ނަޝީދު އެހެން ބޭފުޅަކު އިންތިޚާބުގައި ވާދަ ކުރުމުގެ ފުރުސަތު ނުދެއްވާނެ ކަމަށް އޭނާ ވިދާޅުވިއެވެ.
"ރައީސް [ޞާލިޙް] ވެސް ނަޝީދާ ޖެހުނު މައްސަލައަކީ ވެރިކަމުގެ މައްސަލަ. އެ ނޫން ކަމެއް ނޫން. ވަރަށް ޔަގީންކަމެއް ރައީސް ނަޝީދަށް ކުރިމަތިލެއްވެން އޮވެ، ހޮވޭނެ މަންޒަރު ފެންނަ ނަމަ އެހެން މީހަކު ވެރިކަމަށް ގެންނަން ނަޝީދު ނޫޅުއްވާނެ. އެއީ އީވާ ވިޔަސް އެ ފުރުސަތު ވެސް ނުދޭނެ. އެއީ 100 ޕަސެންޓް ޔަގީންކަމެއް،" އެ ބޭފުޅާ ވިދާޅުވިއެވެ.
"ރައީސް [ޞާލިޙް]އަށް 2018 ގެ ޓިކެޓް ދެއްވީ ވެސް ނަޝީދަށް އެ ނޫން ގޮތެއް ނެތިގެން. އެމްޑީޕީއިން ކެންޑިޑޭޓަކު ނުނެރެން ވަރަށް މަސައްކަތް ކުރެއްވި. ޖޭޕީއަށް ޓިކެޓު ދޭން ވެސް އުޅުއްވި. އެކަމަކު ލީޑާޝިޕް އެއްބަސް ނުވީމަ މަޖުބޫރުވީ އިބޫ ދައްކަން އެ ފަހަރު ވެސް."
އޭނާ ވިދާޅުވި ގޮތުގައި ނަޝީދު އިލްޔާސަށް ވާދަ ކުރުމުގެ ފުރުސަތު ދެއްވަނީ، މަޖިލީހުގެ ދެވަނަ ދައުރެއް ފުރުއްވަމުން ދިޔަ ނަމަވެސް އެ ބޭފުޅާއަކީ ސިޔާސީގޮތުން އެހާ މަގުބޫލު ބޭފުޅަކަށް ނުވާތީއެވެ. މުސްތަގުބަލުގައި ނަޝީދާ ވާދަކުރެވޭފަދަ ބޭފުޅަކަށް އިލްޔާސް ވާނަމަ އެ ފުރުސަތު އޭނާއަށް ނަޝީދު ނުދެއްވާނެ ކަމަށް ވެސް ވިދާޅުވިއެވެ.
އިލްޔާސް ޔަގީން ކަމުގައި
ރައީސް ނަޝީދުގެ ސިޔާސީ މުސްތަގުބަލަށްޓަކައި އިލްޔާސް ގުރުބާން ކުރަނީ ކަމަށް ވާހަކަ ދެކެވުނު ނަމަވެސް އިލްޔާސް ވިދާޅުވަނީ އޭނާ ހުންނެވީ ސާބިތުކަމާ އެކު ކަމަށެވެ.
އިލްޔާސަށް އެންމެ ބޮޑަށް އަމާޒުވާ ސުވާލަކީ އޭނާ އިންތިޚާބުގައި ވާދަކުރެއްވުމުގެ ފަހަތުގައި އިތުރު ސަބަބެއް އޮތްތޯއެވެ. އެއަށް ސާފުކޮށް އިލްޔާސް ވިދާޅުވީ، އޭނާ ހުންނެވީ ދެވަނަ ބުރެއްގައި ކަމަށެވެ.
"އިރާދަކުރެއްވިއްޔާ މި އިންތިޚާބުގައި އަޅުގަނޑު މިއަންނަ ނޮވެމްބަރު މަހު ދިވެހިރާއްޖޭގެ ރައީސުލްޖުމްޙޫރިއްޔާކަމުގެ ހުވާ ކުރާނަން. އަޅުގަނޑުމެން މި ކުރަނީ ސިޔާސީ މަސައްކަތް. އަޅުގަނޑުމެން ފެށިއިރު ވެސް ތިބީ މޮޅުވެގެން،" އިލްޔާސް ވިދާޅުވިއެވެ.
ރައީސް ޞާލިޙަށް މި ފަހަރުގެ ރިޔާސީ އިންތިޚާބު ކާމިޔާބު ވެއްޖެ ނަމަ އެންމެ ބޮޑު ދެރައެއް އޮތީ ރައީސް ނަޝީދަށެވެ. އެ މަނިކުފާނަށް އަނބުރާ އެމްޑީޕީ ނުލިބޭނެކަން ގާތްގަނޑަކަށް ޔަގީންވީއެވެ. ޑިމޮކްރެޓްސްގެ އަމާޒާއި ކެމްޕެއިން ކުރަމުން އަންނަ ގޮތަށް ބަލާއިރު ފެންނަނީ އެކަން ވިޔަ ނުދޭން މަސައްކަތް ކުރާތަނެވެ. އެގޮތުން އެ ކުޑަ ޕާޓީން ރިޔާސީ އިންތިޚާބުގައި މި ފަހަރު ވާދަކުރާ މަގުސަދު ކަމަށް ފެންނަނީ އިންތިޚާބު ކާމިޔާބު ކުރުމަށް ވުރެން ރައީސް ޞާލިޙަށް ވޯޓު މަދުކުރުމަށެވެ.