"ސަންގު ޓީވީ"އިން އިންތިޒާމުކޮށްގެން ބާއްވާ ރިޔާސީ ބަހުސަށް އަމިއްލަ ކެންޑިޑޭޓުންނަށް ދައުވަތު ނުދޭތީ ގިނަ ބަޔެއްގެ ފާޑުކިޔުން އަމާޒުވުމާ ގުޅިގެން، އެ ބަހުސްގައި ހުރިހާ ކެންޑިޑޭޓުން ބައިވެރިކުރަން ނިންމައިފިއެވެ.
ސަންގު ޓީވީން އެންމެ ފުރަތަމަ ބުނި ގޮތުގައި އެ ބަހުސްގައި ބައިވެރިވާނީ ސިޔާސީ ޕާޓީތަކުން ވާދަކުރާ ފަސް ކެންޑިޑޭޓުންނެވެ. ނަމަވެސް ބަހުސްގައި ބައިވެރިވުމުގެ ފުރުސަތު ހުރިހާ ކެންޑިޑޭޓުންނަށް ވެސް ހަމަހަމަކަމާ އެކު ލިބެން ވާނެ ކަމަށް ބުނެ ސޯޝަލް މީޑިއާގައި ބައެއް މީހުން ވަނީ ކަންބޮޑުވުން ފާޅުކޮށްފައެވެ.
އެ ކަމާ ގުޅިގެން، އަމިއްލަ ގޮތުން ވާދަކުރައްވާ ކެންޑިޑޭޓް ހަސަން ޒަމީލް ކުރެއްވި ޓްވީޓެއްގައި ވަނީ، ޕީއެސްއެމުން ބޭއްވުމަށް ހަމަޖައްސާފައިވާ ރިޔާސީ ބަހުސް ބާތިލުކޮށް، ސަންގު ޓީވީގެ ރިޔާސީ ބަހުސްގައި ޕާޓްނަޝިޕް ހަދާފައިވާއިރު، ސަންގު ޓީވީގެ ބަހުސްގައި މިނިވަން ކެންޑިޑޭޓުންނަށް ފުރުސަތު ދީފައި ނުވުމަކީ ގާނޫނީ ހައްގެއް ގެއްލޭ ކަމެއް ކަމަށް ވިދާޅުވެއެވެ.
ޒަމީލް ވަނީ އެ މައްސަލަ އީސީއަށް ހުށަހަޅާފައެވެ. އަދި، އަމިއްލަ ކެންޑިޑޭޓު ފާރިސް މައުމޫން ވެސް ވަނީ ޒަމީލް ދެއްކެވި ވާހަކައަށް ތާއިދު ކުރައްވައި، އީސީއަށް މައްސަލަ ހުށަހަޅާފައިވާތީ ޝުކުރު އަދާކުރައްވާފައެވެ.
އެއާ އެކު އީސީން ވަނީ ރިޔާސީ ކެންޑިޑޭޓުންނާ މެދު ހަމަހަމަކަން ގެންގުޅުމަށް ގޮވާލާފައެވެ.
އޭގެ ފަހުން ސަންގު ޓީވީން ވަނީ އާންމުންގެ އެދުމާ އެއްގޮތަށް، ހުރިހާ ކެންޑިޑޭޓުން ބަހުސްގައި ބައިވެރިކުރަން ނިންމާފައިވާ ކަމަށް ބުނެފައެވެ. އަދި، ޕީއެސްއެމްއިން ނެރުނު ބަޔާނެއްގައި ވަނީ، އަމިއްލަ ކެންޑިޑޭޓުންނަށް ބަހުސްގައި ބައިވެރިވާން ދިން ދައުވަތު ގަބޫލުކޮށްފައިވާ ކަމަށް ވެސް ބުނެފައެވެ.
އެ ބަހުސްގައި އަމިއްލަ ގޮތުން ވާދަކުރައްވާ ޒަމީލް އާއި ފާރިސް އަދި ކުރީގެ ހޯމް މިނިސްޓަރު އުމަރު ނަސީރުގެ އިތުރުން ފެންނާނީ:
- ރައީސް އިބްރާހީމް މުޙައްމަދު ޞާލިޙު - އެމްޑީޕީ
- ޑރ. މުޙައްމަދު މުއިއްޒު - ޕީއެންސީ
- އިލްޔާސް ލަބީބު - ދަ ޑިމޮކްރެޓްސް
- ގާސިމް އިބްރާހީމް - ޖުމްހޫރީ ޕާޓީ
- މުޙައްމަދު ނާޒިމް - އެމްއެންޕީ
އެ ބަހުސް އޮންނާނީ އަންނަ ހޮނިހިރު ދުވަހުގެ ރޭ 21:00އިން 23:00އަށެވެ.