ށ. ފުނަދޫ އަކީ އެއްފަސް ކުރުމުގެ މަރުކަޒަކަށް، އަދި އެ ރަށާ އިންވެގެން އެއް ފަޅުތެރޭ އޮންނަ ފަރުކޮޅަކީ އިކޯ ޓޫރިޒަމްގެ މަންޒިލަކަށް ހަދައިދޭނެ ކަމަށް ޕީޕީއެމް، ޕީއެންސީ ކޯލިޝަނުގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
މިރޭ ފުނަދޫގައި އޮތް އިދިކޮޅު ކޯލިޝަނުގެ ކެންޕޭނު ޖަލްސާގައި ވާހަކަދައްކަވަމުން މުއިއްޒު ވިދާޅުވީ ފަރުކޮޅުގައި ޓޫރިޒަމް ތަރައްގީ ކުރުމަކީ އެ އަތޮޅުގެ ރައްޔިތުންނަށް އެތައް ފުރުސަތުތަކެއް ފަހިވާނެ ކަމެއް ކަމަށެވެ.
"ފަރުކޮޅު އެއީ ހަގީގަތުގައި ތިމާވެށީގެ ގޮތުން ވަރަށް ރީތި ނާޒުކު ރަށެއް. އެހެންވެ އެ ނާޒުކު ރީތިކަން ހިމާޔަތްކުރެވޭ ގޮތަށް އިކޯ ޓޫރިޒަމްގެ މުހިއްމު މަންޒިލަކަށް އެތަން ހަދާ، އީކޯ ޓުރިޒަމް ފައްކާކުރެވޭ ތަނަކަށް އެތަން ބަދަލުކޮށްދޭނަން" މުއިއްޒު ވިދާޅުވިއެވެ.
ށ. ފަރުކޮޅު: އެރަށް އިކޯ ޓޫރިޒަމަށް ހުޅުވާލާނެ ކަމަށް މުއިއްޒު ވަނީ ވައުދުވެވަަޑައިގެންފައި --- ސަން ފޮޓޯ/ މުހައްމަދު ޝަފީއު
މުއިއްޒު އިތުރަށް ވިދާޅުވީ ފުނަދޫއަކީ އެއްފަސްކުރުމުގެ ސިޔާސަތުގެ ކާމިޔާބު ރަށެއް ކަމަށެވެ. ކުރިއަށް އޮތް ތަނުގައި ވެސް އެ ރަށަކީ އާބާދީއާ ތަރައްގީ އެއްފަސް ކުރެވޭނެ ރަށެއްކަމަށް ގަބޫލުކުރައްވާ ކަމަށް އޭނާ ވިދާޅުވިއެވެ.
"މިއީ [މިރަށް] ތަރައްގީ އެއްފަސްކުރެވޭ، އާބާދީ އެއްފަސްކުރުމުގެ މުހިއްމު ރަށެއްގެ ގޮތުގައި އަބަދު ވެސް ދެމިއޮންނާނެ ކަމަށް އަޅުގަނޑު ގަބޫލުކުރަނީ" މުއިއްޒު ވިދާޅުވިއެވެ.
އޭނާ ވިދާޅުވީ އެއްފަސް ކުރުމަކީ މަޖުބޫރުކޮށްގެން ކުރެވޭނެ ކަމެއް ނޫން ކަމަށެވެ. އެކަމަކު މީހުން ބަދަލުވާން ބޭނުންވާނެ ކަންތައްތަކެއް ގެނެސްގެން ކަމަށެވެ.
އެގޮތުން، ސިއްހީ ނިޒާމާއި، ތައުލީމީ ނިޒާމު އަދި ވަޒީފާގެ ފުރުސަތު ފަހިވެފައި އޮންނަން ޖެހޭ ކަމަށް މުއިއްޒު ވިދާޅުވިއެވެ. އެކަންކަން ފުނަދޫއަށް ފަހިކޮށްދިނުމަށް މުއިއްޒު ވައުދުވެވަޑައިގަތެވެ.
މުއިއްޒު އިތުރަށް ވިދާޅުވީ ފުނަދޫގެ ބިންހިއްކުމުގެ މަޝްރޫއު މި ސަރުކާރުން ރާވާފައިވަނީ އެންމެ ރަނގަޅަށް ނޫން ކަމަށެވެ. އެރަށުން ހިއްކެން އޮތް ވަރަށް ވުރެ ކުޑަ ބިންކޮޅެއް ހިއްކައިގެން އެ މަޝްރޫއު ހިންގުމަކީ އެންމެ ރަނގަޅު ގޮތް ނޫން ކަމުގައި މުއިއްޒު ވިދާޅުވިއެވެ.
"މިހެން މި ދަންނަވާ ސަބަބަކީ މޮބިލައިޒް ކުރަން ޚަރަދުތަކެއް ހިނގާނެ ބޮޑެތި ޑްރެޖަރުތައް ގެނެސް އެހެން އެކަންތައް ކުރަން. އެހެންވީމަ އެ ގެންނަ އިރުގައި އެ ހިއްކެން އޮތް އެންމެ ބޮޑަކަށް ހިއްކުމަކީ އެއީ އެންމެ ދެކޮޅުޖެހޭ ގޮތް،" މުއިއްޒު ވިދާޅުވިއެވެ.
މުއިއްޒު ވަނީ އެރަށުގެ ބިން ހިއްކުމުގެ ބޮޑު މަޝްރޫއެއް ހިންގަވައިދެއްވާނެ ކަމަށް ވިދާޅުވެފައެވެ. މީގެ އިތުރުން ވެސް މުއިއްޒު އެރަށަށް ގިނަ ވައުދުތަކެއް ވެވަޑައިގަތެވެ. އޭގެ ތެރޭގައި ހިމެނެނީ
-
އެއާޕޯޓު ރަންވޭ ބޮޑުކޮށް، ރޭގަނޑު ފްލައިޓުތައް ފެށުން
- ފެންވަރު ރަނގަޅު ހޮސްޕިޓަލެއް ގާއިމުކުރުން
-
ހުރިހާ މަގުތައް ރަނގަޅު ފެންވަރުގައި ހެދުން
-
ޒުވާނުންގެ މަރުކަޒު ތަރައްގީކޮށްދިނުން
-
ކުނި މެނޭޖުކުކުރުމުގެ ދާއިމީ ހައްލެއް ގެނައުން
-
އިސްލާމީ މަރުކަޒެއް ގާއިމުކުރުން
- ނޭޗާ ޕާކު ތަރައްގީ ކުރުން