ނ. މަނަދޫގައި އަނިޔާވެރި ގޮތަކަށް މަރާލާފައި އޮއްވާ ފެނުނު ނައީމާ މޫސާގެ މަރުގެ މައްސަލައިގައި ހައްޔަރު ކުރި މީހުންގެ ތެރެއިން، މަނަދޫން ހައްޔަރުކުރި 21 އަހަރުގެ ޒުވާނާ ޝަރީއަތް ނިމެންދެން ބަންދުކުރުމަށް އަމުރުކޮށްފިއެވެ.
މިކަމާ ގުޅޭ އެންމެ ފަހުގެ މައުލޫމާތު ހިއްސާކުރަމުން ފުލުހުން މިއަދު ބުނީ، މަނަދޫން މަސްތުވާތަކެތީގެ މައްސަލައިގައި އެންމެ ފުރަތަމަ ހައްޔަރުކުރި އަހުޒަމް އަބްދުއްޝުކޫރު 14 ދުވަހު ބަންދުގައި ބެހެއްޓިކަމަށެވެ. އެއަށް ފަހު މިދިޔަ ބުރާސްފަތި ދުވަހުން ފެށިގެން އޭނާ ބަންދުގައި ހުންނަނީ ނައީމާގެ މަރުގެ ތުހުމަތުގައި ކަމަށާއި މި މައްސަލައިގައި އޭނާގެ ބަންދަށް ފަސް ދުވަސް ޖަހާފައި ވާކަމަށް ފުލުހުން ބުންޏެވެ.
އަހްޒަމް އަބްދުއްޝަކޫރު، ވަނީ ތަހުގީގުގައި ނައީމާގެ މަރަށް އިއުތިރާފުވެފައެވެ. އޭނާއަކީ ކުރިން މާލޭގައި ދިރިއުޅުނު މީހެކެވެ. މާލޭގައި އުޅުނުއިރު އޭނާ އަކީ ގޭންގެއްގައި އުޅެފައިވާ މީހެއްކަން ވެސް "ސަން"އަށް ވަނީ އެނގިފައެވެ.
މީގެ އިތުރުން އެ މައްސަލައިގައި މާލޭން ހައްޔަރު ކުރި 21 އަހަރުގެ މީހާގެ ބަންދަށް ކޯޓުން ވަނީ 30 ދުވަސް ޖަހާފައެވެ. "ސަން"އަށް އެނގިފައި ވާގޮތުގައި އޭނާ އަކީ މަސްތުވާ ތަކެތީގެ ރިކޯޑު އޮންނަ މީހެކެވެ.