ރައީސް އިބްރާހިމް މުހައްމަދު ޞާލިޙް ދަތުރުކުރެއްވި މޮޓޯކޭޑަށް އިދިކޮޅު ޕީޕީއެމް/ޕީއެންސީގެ ސަޕޯޓަރުން ހުރަސްއެޅުމާ ގުޅިގެން ހިނގައިދިޔަ ކަންކަން ބަލަން އެމްއެންޑީއެފް އިން ވެސް ކޮމިޓީއެއް އެކުލަވާލަން ނިންމައިފިއެވެ.
އިދިކޮޅު ސަޕޯޓަރުން ރައީސްގެ މޮޓޯކޭޑަށް ހުރަސްއެޅީ ބޮޑުތަކުރުފާނު މަގުގައި އެ ޕާޓީގެ އޮފީސް ހުންނަ ސަރަހައްދުންނެވެ. އެތަނުގައި ފުލުހުންނާއި އެމްއެންޑީއެފްއިން ހަރަކާތްތެރިވަމުން ދިޔައިރު، މޮޓޯކޭޑަށް އެތަނުން ދެވޭ ވަރުވީ 15 ވަރަކަށް މިނެޓު ފަހުންނެވެ.
މިކަމާ ގުޅިގެން އެމްއެންޑީއެފްއިން ނެރުނު ކުރު ބަޔާނެއްގައި ބުނި ގޮތުގައި މި މައްސަލަ ބަލަން ކޮމިޓީއެއް އެކުލަވާލީ ދިފާއީ ބާރުގެ ލީޑާޝިޕްގެ މަޝްވަރާގެ މަތިން، ދިފާއީ ވަޒީރު މާރިޔާ ދީދީއެވެ.
މި މައްސަލައިގައި އެމްއެންޑީއެފްއިން ވަނީ ރައީސްގެ ސެކިއުރިޓީ ޔުނިޓުގެ ކޮމާންޑަރު ކާނަލް އަބްދުﷲ އިބްރާހިމް ސަސްޕެންޑުކޮށްފައެވެ. އެ ޔުނިޓް ވަގުތީ ގޮތުން ހިންގުން ހަވާލުކޮށްފައި ވަނީ ޑެޕިއުޓީ ކޮމާންޑަރު މޭޖާ އަޙްމަދު ހަލީމާއެވެ.
މިކަމަށް ރިއާޔަތްކޮށް އެމްއެންޑީއެފްއިން ބުނީ މިފަދަކަމެއް ދިމާވުމުން އެމްއެންޑީއެފް ގައި އަމަލުކުރަމުން އަންނަ ޕްރޮސިޖާތަކާއި އެއްގޮތްވާ ގޮތުގެ މަތިން، ކާނަލް އިބްރާހިމް މަގާމުގެ ޒިންމާތަކުން އެކަހެރިކޮށްފައިވާ ކަމަށެވެ.
ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމެޓީ (241 ކޮމިޓީ)އިން ވެސް ދަނީ ރައީސްގެ މޮޓޯކޭޑަށް ހުރަސްއެޅި ސީރިއަސް މައްސަލައެއްގެ ގޮތުގައި ބަލަމުންނެވެ. އެ ކޮމިޓީން ވަނީ އެ މައްސަލައިގައި ކަން ހިނގި ގޮތް އިތުރަށް ސާފު ކުރަން، މައްސަލަ ހިނގައި ދިޔަ ގޮތުގެ އިންސިޑެންޓް ރިޕޯޓު ހޯދަން ނިންމާފައެެވެ.
ކްރިމިނަލް ކޯޓުން ވަނީ މި މައްސަލައިގައި ހައްޔަރުކުރި ހަތަރު މީހުންގެ ތެރެއިން ދެ މީހަކު ފަސް ދުވަހަށް އަދި އަނެއް ދެ މީހުން 15 ދުވަހަށް ބަންދުކުރަން އަމުރުކޮށްފައެވެ.