ތިރީސް ހަތަރު ވޯޓުގެ ތަފާތަކުން ހއ. ތަކަންދޫ ކައުންސިލްގެ ބައި އިލެކްޝަން އެމްޑީޕީން ކާމިޔާބު ކޮށްފިއެވެ.
އެމްޑީޕީގެ މެޖޯރިޓީ އޮންނަ ތަކަންދޫ ކައުންސިލްގެ ގޮނޑިއެއް ހުސްވީ ކުރީގެ މެންބަރަކަށް ހުންނެވި ޒާހިޔާ އަލީ އިސްތިއުފާ ދެއްވުމުންނެވެ. އޭނާ ވެސް އިންތިޚާބު ވެފައި ވަނީ އެމްޑީޕީގެ ޓިކެޓުގައެވެ.
މިއަދު އޮތް އިންތިޚާބުގައި އިދިކޮޅު ޕީޕީއެމް/ ޕީއެންސީ އިން މެންބަރަކު ވާދަ ކޮށްފައެއް ނުވެެއެވެ. އެ އިންތިޚާބުގައި ވާދަ ކުރީ އެމްޑީޕީގެ ފާތިމަތު ޝައުފާ އާއި އަމިއްލަ ކެންޑިޑޭޓް ފަހީމާ މުހައްމަދެވެ.
ހާހެއްހާ މީހުން ވެސް ހަމަނުވާ އެ ރަށުގައި މިއަދު ބޭއްވި އިންތިޚާބުގައި ވޯޓުލުމުގެ ހައްގު 675 މީހަކަށް ލިބިފައިވިއެވެ. މިއަދުގެ އިންތިޚާބުގެ ނަތީޖާ ދައްކާގޮތުން ސައްހަ ވޯޓުގެ އަދަދަކީ 440 އެވެ. އަދި ބާތިލު ވޯޓުގެ އަދަދަކީ އަށެެކެވެ.
ޝައުފާއަށް 237 ވޯޓު ލިބުނުއިރު ފަހީމާއަށް ލިބިފައިވަނީ 203 ވޯޓެވެ.
ތަކަންދޫ ކައުންސިލްގެ މެޖޯރިޓީ މިހާރު އޮންނަނީ އެމްޑީޕީއަށެވެ. ތިން މެންބަރުން އެމްޑީޕީގެ ޓިކެޓުގައި ހޮވިވަޑައިގެން ތިއްބެވި އިރު އަނެއް ދެ މެންބަރުންނަކީ އަމިއްލަ ގޮތުން އިންތިޚާބުވެވަޑައިގެން ދެ މެންބަރުންނެވެ.