ރައްޔިތުންގެ މަޖިލީހުގެ އިންތިހާބުގައި އިލެކްޝަންސް ކޮމިޝަނުގެ ފަރާތުން ހަރާކާތްތެރިވާނެ އޮފިޝަލުން ބޭނުންވާ އަދަދަށް ހަމަވެއްޖެ ކަމަށް އެ ކޮމިޝަނުން ބުނެފި އެވެ.
މަޖިލިސް އިންތިހާބަށް އޮފިޝަލުން ހޯދުމަށް ފުރަތަމަ އިއުލާނު ކުރި އިރު އޮފިޝަލުން ލިބުމުގައި ދަތިތަކެއް ހުރި ކަމަށް އެ ކޮމިޝަނުން އޭރު ފާހަގަ ކުރި އެވެ. އެ ކޮމިޝަނުގެ މެމްބަރު އަދި ތަރުޖަމާނު އަހުމަދު އަކްރަމް ވިދާޅުވީ މަޖިލިސިް އިންތިހާބަށް ބޭނުންވާ ވަރަށް އޮފިޝަލުން މިހާރު ލިބިފައިވާ ކަމަށެވެ.
"އިންތިހާބަށް ބޭނުންވާ 4634 އޮފިޝަލުން މިހާރު ވަނީ ހަމަވެފައި. އިރާދަކުރެއްވިޔާ މިމަސް ނިމުމުގެ ކުރިން އޮފިޝަލުން ތަމްރީނުކޮށް ނިމޭނެ." އަކްރަމް ވިދާޅުވި އެވެ.
މަޖިލިސް އިންތިހާބު އޮންނަނީ އެޕްރީމް ހައެއްގަ އެވެ. އޭގެ ކުރިން އޮފިޝަލުން ތަމްރީނު ކުރުމާއި ވާން ޖެހޭ ހުރިހާ ތައްޔާރީއެއް ނިމޭނެ ކަމަށް އަކްރަމް ވިދާޅުވި އެވެ.
މަޖިލިސް އިންތިހާބުގެ ފައިނަލް ވޯޓާސް ލިސްޓު އާދިއްތަ ދުވަހު އާންމު ކުރުމަށް އެ ކޮމިޝަނުން ވަނީ ނިންމާފަ އެވެ.
އިންތިހާބުގައި ވާދަ ކުރަން 408 ފަރާތަކުން ވަނީ ހުށަހަޅައިފަ އެވެ.
އެންމެ ގިނަ ކެންޑިޑޭޓުން އެއް ޕާޓީއަކުން ވާދަކުރަނީ ސަރުކާރު މައި ޕާޓީ އެމްޑީޕީންނެވެ. އަދި ޖުމްހޫރީ ޕާޓީން 42 މެމްބަރުން ކުރިމަތިލާ އިރު އަދާލަތު ޕާޓީން މަޖިލިސް އިންތިހާބުގައި ވާދަކުރަނީ ހަ ދާއިރާއަކަށެވެ.
ކުރީގެ ރައީސް މައުމޫނު އަބްދުލްގައްޔޫމުގެ ތާއީދާ އެކު ކުރިމަތިލަނީ 24 ކެންޑިޑޭޓުންނެވެ. އޭގެ އިތުރުން އިދިކޮޅު މައި ޕާޓީ ޕީޕީއެމް، ޕީއެންސީ އިން 46 މެމްބަރުން ވާދަކުރާ އިރު އެމްޑީއޭ އިން އަށް ދާއިރާއަކަށް ވާދަކުރެ އެވެ. އަދި އެމްޓީޑީންނާއި ލޭބަ ޕާޓީން ވެސް ކޮންމެ ޕާޓީއަކުން އަށް ދާއިރާއަކަށް ވާދަކުރެ އެވެ.