ރައްޔިތުންގެ މަޖިލީހުގެ އިންތިހާބުގައި އެމްޑީޕީން ވާދަކުރާ ކެންޑިޑޭޓުން ކަނޑައެޅުމަށް ބޭއްވި އެ ޕާޓީގެ ޕްރައިމެރީގައި 60،000 އަށްވުރެ ގިނަ މީޙުން ވޯޓުލީކަން ދާއިމީ ނަތީޖާއިން ދައްކައިފި އެވެ.
އެމްޑީޕީ ޕްރައިމެރީ ބާއްވާފައިވަނީ މިމަހުގެ 18 ވަނަ ދުވަހު އެވެ. ދާއިމީ ނަތީޖާ އާންމު ކުރީ އިއްޔެ އެވެ. ދާއިމީ ނަތީޖާއިން ދައްކާގޮތުން އެ ޕާޓީގެ ޕްރައިމެރީގައި 60،034 މީހުން ވަނީ ވޯޓު ލާފަ އެވެ.
އެމްޑީޕީ ޕްރައިމެރީގައި 89،091 މީހުން ވޯޓުލުމަށް ރެޖިސްޓްރީ ކޮށްފައިވާ ކަމަށް އެ ޕާޓީން ވަނީ ބުނެފަ އެވެ. ދާއިމީ ނަތީޖާ ދައްކާ ގޮތުން އޭގެތެރެއިން 29057 މީހުން ޕްރައިމެރީގައި ވޯޓު ލާފައެއް ނުވެ އެވެ. އެމްޑީޕީ ޕްރައިމެރީގައި 77 ދާއިރާއަކަށް ޕްރައިމެރީ ބޭއްވި އެވެ. ޕްރައިމެރީގައި 270 ވޯޓު ފޮށި ވަނީ ބަހައްޓާފަ އެވެ.
އެމްޑީޕީ ރައްޔިތުންގެ މަޖިލީހުގެ ކެމްޕެއިން ލޯންޗުކުރުމަށް ހުކުރު ދުވަހުގެ ރޭ ބޮޑު ޖަލްސާއެއް ބޭއްވުމަށް އެ ޕާޓީން ދަނީ ތައްޔާރު ވަމުންނެވެ. އިންތިހާބަށް ކުރިމަތި ލުމުގެ ފުރުސަތު މިހާރު ވަނީ ހުޅުވާލާފަ އެވެ. އެ ފުރުސަތު ބަންދުވާނީ އަންނަ ފެބުރުވަރީ މަހުގެ 21 ވަނަ ދުވަހު އެވެ.
ރައްޔިތުންގެ މަޖިލީހުގެ އިންތިހާބަށް ޕްރައިމެރީއެއް ބާއްވައިގެން ކެންޑިޑޭޓުން ކަނޑައެޅީ މިހާތަނަށް އެމްޑީޕީން އެކަންޏެވެ. އަދާލަތުން ވެސް ވަނީ އެއް ދާއިރާގެ ޕްރައިމެރީ ބާއްވާފަ އެވެ.