ނޫސްވެރިކަމާ ނުލައި ސަރުކާރެއް އޮތުމަށް ވުރެ، ސަރުކާރަކާ ނުލައި ނޫސްވެރިކަން އޮތުން ވެސް، ރައްޔިތުންގެ ޙައްޤުތައް ކަށަވަރުކޮށްދިނުމަށްޓަކައި މާ މުހިންމުކަމަށް ދެކެވަޑައިގަންނަވާކަމަށް ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ދިވެހި ނޫސްވެރިކަމުގެ އަލިމަސް ޔޫބިލް ފާހަގަކުރުމަށާއި، އެކި ރޮނގުތަކުން މިދިޔަ އަހަރުގެ އެންމެ މޮޅު ނޫސްވެރިންނަށް އިނާމު ދިނުމަށް ދަރުބާރުގޭގައި ބޭއްވި ޖަލްސާގެ ޝަރަފުވެރި މެހެމާނެއްގެ ގޮތުގައި ވަޑައިގެން ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނުގެ ހިތްޕުޅުގައި ނޫސްވެރިންނަށް އަދި ނޫސްވެރިކަމަށް އޮތީ ވަރަށް މަތިވެރި ގަދަރަކާއި ޝަރަފެއް ކަމަށާއި އެކަން އެގޮތުގައި އަބަދުވެސް ދެމިއޮންނާނެ ކަމަށެވެ.
ދައުލަތް ހަމަ މަގުން ހިނގުމަށް އެދޭނަމަ ސަރުކާރުގެ ހުރިހާ މުއައްސަސާތަކުންވެސް މިނިވަން ނޫސްވެރިކަމަށް ޖާގަ ދޭންޖެހޭކަމަށް ރައީސް ފާހަގަކުރެއްވިއެވެ. އަދި ވިދާޅުވީ، ނޫސްވެރިން ކުރަމުން އަންނަ ބުރަ މަސައްކަތުގެ އަގު އަބަދުވެސް ވަޒަންކުރައްވާ ކަމަށެވެ.
"ނޫސްވެރިކަމާއި ނުލައި ސަރުކާރެއް އޮތުމަށް ވުރެން ސަރުކާރަކާއި ނުލައި ނޫސްވެރިކަން އޮތުން ވެސް ރައްޔިތުންގެ ހައްގުތައް ކަށަވަރުކޮށްދިނުމަށްޓަކައި އަޅުގަނޑަށް މުހިންމު،" ނޫސްވެރިކަމުގެ ދާއިރާއިން ވަޒީފާގެ މާހައުލަށް ނިކުންނެވި ރައީސް ސޯލިހު ވިދާޅުވިއެވެ.
"އަނިޔާވެރިކަމާ ދެކޮޅަށް ނޫސްވެރިން ކުރި ޖިހާދަށް ސެލިއުޓްކުރަން"
ރައީސް ސޯލިހު ވިދާޅުވީ އެމަނިކުފާނުގެ ސަރުކާރު ދެމި އޮންނާނީ ދިވެހި ނޫސްވެރިންނާ އެކުގައި ކަމަށާއި، ނޫސްވެރިންގެ ފާޑުކިޔުމަކީ ސަރުކާރުގެ ދިރުން ކަމަށެވެ. މިނިވަން ނޫސްވެރިކަމެއް ކުރުމަށް ގާނޫނީ އެއްވެސް ހުރަހެއް އެއްވެސް އިރެއްގައި ނެތްކަންވެސް ރައީސް ފާހަގަކުރެއްވިއެވެ. ނަމަވެސް ވެރިކަމުގެ ކަންކަމަށް ފާޑުކިޔާ ނޫސް މަޖައްލާތައް ޅަފަތުގައި ނައްތާލާފައިވާ ކަމަށް ރައީސް ސޯލިހު ވިދާޅުވިއެވެ.
"ނޫސްވެރިންނާ ބައްދަލުކުރީ ޖަލުގެ އަނދިރިކަން. ދިވެހި ނޫސްވެރިކަމުގެ ހަޔާތުން 75 އަހަރު ފާއިތުވެގެން ދިޔައިރު އޭގެ ތެރެއިން ދިގު މުއްދަތެއްގައި ދިވެހި ނޫސްވެރިކަން އޮތީ ސަރުކާރު ކޮންޓްރޯލުކުރާ އެއްޗެއްގެ ގޮތުގައި،" ރައީސް ވިދާޅުވިއެވެ.
ނަމަވެސް މި ސަރުކާރުން އެކަން ބަދަލުކުރައްވާނެކަމަށާއި، މައުލޫމާތު ހޯދައި ލިބިގަތުމުގެ ފަހި މާހައުލެއް ތަނަވަސްކޮށްދީ، މިނިވަންކަމާއެކު ހިޔާލު ފާޅުކުރެވޭނެ ވެއްޓެއް، މި ސަރުކާރުން ނޫސްވެރިންނަށް ގާއިމުކޮށްދެއްވާނެކަމުގެ ޔަގީންކަން ރައީސް ދެއްވިއެވެ.
ބޭއިންސާފާއި އަނިޔާވެރިކަމާ ދެކޮޅަށް، ނޫސްވެރިން ކުރި ހިތްވަރުގަދަ ޖިހާދަށް، އެމަނިކުފާނު ސެލިއުޓްކުރައްވާކަމަށް ރައީސް ވިދާޅުވިއެވެ. އަދި ކުރީގެ ސަރުކާރުގެ ފަސާދައާއި ކޮރަޕްޝަންތަކާ މެދު، ރައްޔިތުން ހޭލުންތެރިކުރުވުމަށް ނޫސްވެރިން ކުރި މަސައްކަތަށް ރައީސް ވަނީ ސާބަސް ރައްދުކުރައްވާފައެވެ.
ޒަމާނީ ޑިމޮކްރެސީތަކުގައި ނޫސްވެރިކަން އޮންނަނީ، ސެލްފް ރެގިއުލޭޓް ނިޒާމެއްގެ ގޮތުގައިކަން ފާހަގަކުރައްވަމުން ރައީސް ވިދާޅުވީ، ދިވެހި ނޫސްވެރިކަމަށް ވެސް އެންމެ މަސްލަހަތު ހުރި ގޮތަކީ، ނޫސްވެރިން އަމިއްލައަށް އެމީހުންގެ އިންތަކާއި މިންތައް ކަނޑައަޅައިގެން ކުރިއަށް ދިޔުން ކަމަށެވެ. އަދި އަހުލާގީ މިންގަނޑުތަކާއި ނޫސްވެރިކަމުގެ އުސޫލީ ހަމަތައް އެކަށައެޅުމަކީ ނޫސްވެރިންގެ އަމިއްލަ ޒިންމާއެއްކަމުގައިވެސް ރައީސް ވިދާޅުވިއެވެ.