އިދިކޮޅު ރިޔާސީ ކެންޑިޑޭޓު އިބްރާހިމް މުހައްމަދު ސޯލިހު (އިބޫ) މިއަދު ގއ. ކޮލަމާފުއްޓަށް ކުރައްވަން އޮތް ކެމްޕޭން ދަތުރުފުޅު ފަސްކުރުމަށް ފުލުހުން އެދުނު ނަމަވެސް، އެކަމަށް އިޖާބަނުދީ އެ ދަތުރު ކުރިއަށް ގެންދާނެ ކަމަށް ބުނެފިއެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމެއްގައި ފުލުހުންގެ ތަރުޖަމާނު އަހްމަދު ޝިފާން ވިދާޅުވީ، އިބޫގެ ދަތުރު ފަސްކުރުމަށް އެދުނީ، މިވަގުތު ކޮލަމާފުށީގެ މާހައުލު އޮތް ގޮތަށް ބަލާފައި، ސަލާމަތީ ކަންކަމަށް ރިއާއަތްކުރުމަށްފަހު ކަމަށެވެ.
އިދިކޮޅު ކޯލިޝަންގެ ސްޕޯކްސްޕާސަން މާރިޔާ އަހްމަދު ދީދީ މިއަދު ނޫސްވެރިންނާ ބައްދަލުކޮށް ވިދާޅުވީ، ފުލުހުންގެ އެ އެދުމަކީ ވަރަށް ޒިންމާދާރުކަން ކުޑަ އެދުމެއް ކަމަށެވެ.
ރިޔާސީ ކެންޑިޑޭޓުންގެ ސަލާމަތީ ކަންކަން ބަލަހައްޓަނީ އެމްއެންޑީއެފުން ކަމަށާއި، ފުލުހުން އެހެން ބުނުމުން އެމްއެންޑީއެފްގެ އަގު ވެއްޓޭ ކަމަށް މާރިޔާ ވިދާޅުވިއެވެ. އަދި ދަތުރާ ގުޅޭގޮތުން އެމްއެންޑީއެފުން މިހާތަނަށް އެއްވެސް އިރުޝާދެއް ދީފައި ނުވާ ކަމަށް މާރިޔާ ވިދާޅުވިއެވެ.
ކޮލަމާފުށި ހަލަބޮލިވެފައިވާއިރު، ޕީޕީއެމްގެ ދިދަތަކެއް އެމްޑީޕީގެ ސަޕޯޓަރުން ކަނޑާލި ކަމަށް، ރޭ ޕީޕީއެމުން ވަނީ ބުނެފައެވެ. އަދި އެ މައްސަލާގައި ފުލުހުން މިއަދު ވަނީ 18 މީހަކު ހައްޔަރު ކޮށްފައެވެ.
މައުލޫމާތު ލިބިފައިވާ ގޮތުގައި، ޕީޕީއެމްގެ ދިދަތައް ކަނޑާލީ، އިބޫ އެ ރަށަށް ވަޑައިގެންނެވުމަށް ހަމަޖެހިފައި އޮތުމުން އެކަމަށް އެ ރަށް ތައްޔާރު ކުރުމުގެ ތެރެއިންނެވެ.
ޕީޕީއެމްގެ ދިދަތައް ކަނޑާލުމުން، ޕީޕީއެމްގެ ސަޕޯޓަރުންނާއި އިދިކޮޅު ސަޕޯޓަރުންނާ ދެމެދު ހަމަނުޖެހުން ހިނގައި، ބައެއް މީހުންނަށް އަނިޔާ ވެސް ވިއެވެ.