މިދިޔަ އަންގާރަ ދުވަހު ތާޖުއްދީން ސްކޫލް ތެރެއަށް ބަޔަކު ވަދެ ގްރޭޑް 10 ގެ ކުއްޖަކަށް ދަގަނޑު ބުރިއަކުން ހަމަލާދީ ޒަހަމްކޮށްލި މައްސަލައިގައި ހައްޔަރު ކުރި 18 އަހަރުން ދަށުގެ ދެ ކުޑަކުދިންގެ ތެރެއިން އެއް ކުއްޖަކު ދޫކޮށްލާފައިވާ ކަމަށާއި، މިހާރު ހައްޔަރުގައި ހުރީ 15 އަހަރުގެ ކުއްޖެއް ކަމަށް ފުލުހުން ބުނެފިއެވެ.
އެޑިއުކޭޝަން މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ފުލުހުންގެ ތަރުޖަމާނު ސުޕަރއިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ ތާޖުއްދީން ސްކޫލުގައި ހިނގައި ދިޔަ ކަންކަމަކީ ސްކޫލު ތެރޭގައި ކުދިންތަކެއްގެ ދެމެދުގައި ހިނގައި ދިޔަ ކަންތައްތަކެއް ކަމަށާއި، މި މައްސަލައިގައި ދެ ކުއްޖަކު ފުލުހުންގެ ބެލުމުގެ ދަށަށް ގެނައި ކަމަށެވެ.
ތާޖުއްދީން ސްކޫލުގައި ހިނގައިދިޔަ މާރާމާރީގެ މައްސަލައިގައި ފުލުހުންގެ ބެލުމުގެ ދަށަށް ގެނައީ 14 އަހަރުގެ ކުއްޖަކާއި 15 އަހަރުގެ ކުއްޖެކެވެ. މީގެ ތެރެއިން 14 އަހަރުގެ ކުއްޖާ މިހާރު އޭނާގެ މައިންބަފައިންނާ ހަވާލު ކޮށްފައިވާއިރު، 15 އަހަރުގެ ކުއްޖާ ހުރީ 10 ދުވަހުގެ މުއްދަތަކަށް ފުލުހުންގެ ބެލުމުގެ ދަށުގައި ކަމަށް ޝިފާން ވިދާޅުވިއެވެ.
"މިކަންކަމަކީ ސްކޫލު މާހައުލުގެ ތެރޭގައި އެކަހަލަ ކަންކަން އެބަހުރި ކަމަށް މާނަކުރެވޭ ގޮތަށް ހިނގާފައި ހުރި ކަންކަން ކަމަކަށް ނުބެލެވޭ. އަދި އިއްޔެ ދަރުމަވަންތަ ސްކޫލުގައި ހިނގާދިޔަ ހާދިސާ އަކީ އޭގެ ތެރޭގައި އެހެނިހެން ކަންތައްތަކެއް އެކުލެވޭ މައްސަލައެއް ކަމަށް އަޅުގަނޑުމެނަށް ބެލެވޭ،" ޝިފާން ވިދާޅުވިއެވެ.
ޝިފާން ވިދާޅުވީ މި ފުލުހުންގެ އަތުގައި ހުރި އެންމެ ފަހުގެ ވަސީލަތްތައް ބޭނުންކޮށްގެން މި ދެ މައްސަލަވެސް ސީރިއަސް ދެ މައްސަލައިގެ ގޮތުގައި ތަހުގީގު ކުރަމުންދާ ކަމަށެވެ.
އަދި ދެ ހާދިސާގެ ސަބަބުން ސްކޫލު މާހައުލުގައި ކިޔަވާ ދަރިވަރުންނާއި މުދައްރިސުންނަށް ނުރައްކަލެއް ހުރި ކަމަށް ގަބޫލުކުރެވޭނެ އެއްވެސް ކަމެއް ފެނިފައި ނުވާކަމަށް ޝިފާން ވިދާޅުވިއެވެ.