ޝެއިޚު ނަސްރުﷲ މުސްތަފާގެ އަބުރު ނަގާލިކަމަށް ބުނެ ބަދަލު ހޯދަން އޭނާ ސިވިލް ކޯޓަށް ހުށަހެޅި މައްސަލައަށް މިހާރު ނޫހުގެ ފަސް ނޫސްވެރިއަކު އަންގާރަ ދުވަހު ސިވިލް ކޯޓަށް ހާޒިރުވާން ޗިޓް ފޮނުވައިފިއެވެ.
ނަސްރުﷲ ދައުވާ ކޮށްފައި ވަނީ އަބުރާ ބެހުމުގެ ސަބަބުން ލިބޭ ގެއްލުމުގެ ބަދަލު ހޯދުމަށެވެ. މިހާރު ނޫހުގެ ފަސް ނޫސްވެރިންނަށް ކޯޓަށް ހާޒިރުވާން އަންގާފައި ވަނީ އަންގާރަ ދުވަހުގެ ހެނދުނު 10 ޖަހާ އިރަށެވެ.
ދައުވާ އުފުލާފައި ވަނީ މިހާރު ނޫހުގެ ފަޒީނާ އަހުމަދާ، އާސިމާ ނިޒާރު، މުހައްމަދު ޔާމީން، މުއިއްޒު އިބްރާހިމް އަދި އަހުމަދު އަބްދުﷲ ސައީދުގެ މައްޗަށެވެ.
އޮޅުވާލައިގެން ހަތަރު މީހަކު ހައްޖަށް ގެންދިޔަ ކަމުގެ ތުހުމަތުގައި ޝެއިހް ނަސްރުﷲ ހައްޔަރު ކުރީ މިދިޔަ ނޮވެމްބަރު މަހުގެ 28 ވަނަ ދުވަހުއެވެ. އަދި ޖެހިގެން އައި ދުވަހު ޝަރުތުތަކާ އެކު އޭނާ ވަނީ ދޫކޮށްލައިފައެވެ.
އޮޅުވާލައިގެން މީހުން ހައްޖަށް ގެންދިޔުމުގެ ތުހުމަތުގެ އިތުރުން ސިސިލްފަރު ގްރޫޕްގެ ތައްގަނޑު ފޯޖު ކުރި ކަމުގެ ތުހުމަތު ވެސް އޭނާގެ މައްޗަށް ފުލުހުން ކުރެއެވެ.
ނޫސްތަކާ ދެކޮޅަށް ނަސްރުﷲ ދައުވާކުރާއިރު މިދިޔަ އޯގަސްޓް މަހުގެ ތެރޭގައި އޭނާގެ މައްޗަށް އުފުލާފައިވާ ބޮޑެތި ދައުވާތަކެއްގެ ޝަރީއަތް ކުރިމިނަލް ކޯޓުގައި ދަނީ ހިނގަމުންނެވެ.
ޝެއިހް ނަސްރުﷲގެ މައްޗަށް އުފުލާފައި ވަނީ އަޅާނުލުމުގެ ދެ ދައުވާއަކާއި އޮރިޔާންކާޑް އުފައްދައި ގެންގުޅުމުގެ ދައުވާއާއި ގާނޫނު ހިންގުމަށް ހުރަސް އެޅުމުގެ ދައުވާއެވެ.