ގެރިއަށް ގަދަރު ނުކުރި ކަމަށްބުނެ އިންޑިއާގައި ފުރާވަރުގެ ދެ އަންހެން ކުއްޖަކު ހައްޔަރުކޮށްފިއެވެ.
ހައްޔަރު ކޮށްފައިވަނީ 16 އަހަރުގެ ކުއްޖަކާއި 12 އަހަރުގެ ކުއްޖެކެވެ. ގެރިއަށް އިހާނެތިކޮށް ހިތި ކަމަށްބުނެ އެ ކުދިންގެ މަންމަ އާއި އިތުރު ހަ މީހަކު ހައްޔަރުކޮށްފައިވާ ކަމަށާއި އެ މީހުންގެ މައްސަލަ ކޯޓަށް ފޮނުވާފައިވާ ކަމަށްވެސް ޚަބަރުތައް ބުނެއެވެ.
ކުޑަ ދެކުދިންގެ މައްސަލަވެސް ކޯޓަށް ވައްދާފައިވަނީ ބޮޑެތި މީހުންގެ ގޮތުގައި ކަމަށާއި ނަމަވެސް އެކުދިންގެ އުމުރުން 18 އަހަރު ނުވާކަން ޔަގީންކުރެވިފައިވާކަމަށް އިންޑިއާގެ ނޫހެއް ކަމަށްވާ ޓައިމްސް އޮފް އިންޑިއާގައި ބުނެފައިވެއެވެ.
އިންޑިއާގެ ގާނޫނުތައް ބުނާގޮތުން 18 އަހަރު ނުފުރޭ ކުދިންގެ މައްސަލައެއް ކޯޓުގައި ކުރިއަށްދާއިރު އެކުދިން ބައިތިއްބަން ޖެހޭނީ ޖުވެނައިލް ހޯމްއެއްގައެވެ. 18 އަހަރުން ދަށުގެ ކުދިންގެ މައްސަލަ ތަހުގީގުކުރަން އެކުދިން ޖަލަށް ނުލެވޭނެ ކަމަށް އެގައުމުގެ ގާނޫނުގައި ބުނެފައިވެއެވެ.
ގެރިއަށް އިހާނެތިކޮށް ހިތި ކަމަށްބުނެ ހައްޔަރުކުރި މީހުންނަކީ ގެރި ކަތިލައި އޭގެ މަސް ކެއުމުގެ ތުހުމަތުގައި ހައްޔަރު ކުރި މީހުންނެވެ. އެ މީހުންގެ ތެރޭގައި ހައްޔަރު ކުރި ދެ ކުދިންގެ ބައްޕަވެސް ހިމެނޭއިރު ކުދިންގެ ބައްޕައަކީ ގެރިއަށް އިހާނެތިކޮށް ހިތާކަމުގެ އިތުރު ރިކޯޑުތައް އޮންނަ މީހެކެވެ.
ދެ އަންހެން ކުދިން ހައްޔަރު ކުރުމުން އެކުދިންގެ އަވަށުގައި ވަނީ މުޒާހަރާކޮށްފައެވެ.
އިންޑިއާގައި ގެރި އަކީ "މަންމަ" ކަމަށް އިންޑިއާގެ ބީޖޭޕީ ޕާޓީގެ އިސް މީހަކު ދާދިފަހުން ބުނެފައިވާއިރު ގެރި ބަލަހައްޓާ ތަންތަން ހެދުމަށް ވަކި ޓެކްސް އެއް ނެގުމަށްވެސް އެޕާޓީގެ އިސްވެރިއަކު ވަނީ ގޮވާލައިފައެވެ.