އިންޑިއާއާއި ދިވެހި ރާއްޖޭގެ ހީނަރުވެފައިވާ ގުޅުމަށް އައިސްފައިވާ ކުރިއެރުން ދެމެހެއްޓުމަށް އިންޑިއާއިން ރާއްޖެއަށް ކަނޑައެޅުއްވި އާ ސަފީރު ޖީ. ބަލަސުބްރަމަނިއަނާއި ފޮރިން މިނިސްޓަރު ޑރ. އަބްދުﷲ ޚަލީލް މަޝްވަރާކުރައްވައިފިއެވެ.
ފޮރިން މިނިސްޓްރީގައި ބޭއްވި މި ބައްދަލުވުމުގައި ސަފީރަށް މިނިސްޓަރު ޚަލީލް ވަނީ މަރުޙަބާ ދަންނަވާފައެވެ.
ފޮރިން މިނިސްޓްރީން ބުނީ، މި ބައްދަލުވުމުގައި ދެ ގައުމުގެ ދެމެދުގައި އޮތް ގާތް ގުޅުމަށް މިހާރު އައިސްފައިވާ ކުރިއެރުން ދަމަހައްޓައި އިތުރަށް ބަދަހި ކުރެވިދާނެ ގޮތްތަކާ ގުޅޭގޮތުން މަޝްވަރާކުރެއްވި ކަމަށެވެ.
ފޮރިން މިނިސްޓަރު ޚަލީލް (ކ) އިންޑިއާއިން ރާއްޖެއަށް ކަނޑައެޅި އާ ސަފީރު (ވ): ސަފީރު ވަނީ މިނިސްޓަރުގެ އަރިހަށް އިހުތިރާމުގެ ޒިޔާރަތެއް ކުރައްވާފައި --- ފޮޓޯ/ ފޮރިން މިނިސްޓްރީ
މި ބައްދަލުވުމުގައި މިނިސްޓަރު ޚަލީލް ވަނީ ދެެ ގައުމުގެ ދެމެދުގައި އޮތް ޒަމާންވީ ގާތް ރަހުމަތްތެރިކަން ފާހަގަކުރައްވައި، އިންޑިއާ ސަރުކާރުގެ ފަަރާތުން ރާއްޖެއަށް ފޯރުކޮށްދެއްވާފައިވާ އެހީތެރިކަމަށްޓަކައި ދިވެހި ރައްޔިތުންނާއި ދިވެހި ސަރުކާރުގެ ފަރާތުން ޝުކުރު އަދާކުރައްވާފައެވެ.
މި ބައްދަލުވުމުގައި އިންޑިއާގެ ސަފީރު ދެއްކެވި ވާހަކަފުޅުގައި ދެ ޤައުމަށް ފައިދާހުރި ކަންތައްތައް ހާސިލްކުރުމަށްޓަކައި ސަރުކާރާއެކު ގާތުން މަސައްކަތްކުރައްވާނެ ކަމުގެ ޔަގީންކަން ވަނީ ދެއްވާފައެވެ.
އިންޑިއާއިން ރާއްޖެއަށް ކަނޑައެޅި އާ ސަފީރު ވަނީ ފޮރިން މިނިސްޓަރުގެ އަރިހަށް ކުރެއްވި އިހުތިރާމުގެ ޒިޔާރަތުގެ ތެރެއިން --- ފޮޓޯ/ ފޮރިން މިނިސްޓްރީ
މި ބައްދަލުވުމުގައި މިނިސްޓަރުގެ އަރިހުގައި ފޮރިން ސެެކްރެޓަރީ ފާތިމަތު އިނާޔާއާއި އެމްބެސެޑާ އެޓް ލާޖް މުހައްމަދު ފަހުމީ ހަސަންއާއި އިންޑިއާ ޑިވިޝަންގެ ޖޮއިންޓް ސެކްރެޓަރީ ޑރ. އިބްރާހިމް ޒުހުރީއާއި ޑިރެކްޓާ އަޙްމަދު ސުޒިލް އަދި ޑިރެކްޓާ އާއިޝަތު ޝަހުލާ ބައިވެރިވެވަޑައިގެންނެވިއެވެ. އިންޑިއާއިން ރާއްޖެއަށް ކަނޑައެޅުއްވި ސަފީރުގެ އަރިހުގައި ޑެޕިއުޓީ ހައިކޮމިޝަނާ ކުމާރް ގޯރަވް ވަނީ ބައިވެރިވެވަޑައިގެންފައެވެ.
ރާއްޖެއާއި އިންޑިއާގެ ގުޅުން ގޯސްވީ ސަރުކާރުގެ ތިން ޑެޕިއުޓީ މިނިސްޓަރަކު އެ ގައުމުގެ ބޮޑުވަޒީރު ނަރެންދުރަ މޯދީއަށް ސޯޝަލްމީޑިއާގައި ކުޑައިމީސްކުރި މައްސަލައިގައެވެ.
މިކަމުގެ ސަބަބުން ރާއްޖެ އަންނަ އިންޑިއާ ފަތުރުވެރިންގެ އަދަދު ވެސް ވަރަށް ބޮޑަށް ދަށްވެގެން ދިޔައެވެ.