މީހެެއްގެ ފަރާތުން އަނިޔާއެއް ލިބުމުން އެ ކަން ރިޕޯޓުކޮށް، ރައްކާތެރިކަން ހޯދުމަށް މަސައްކަތްކުރާ އަންހެނުންނަކީ ވަރަށް ހިތްވަރު ގަދަ ބައެއްކަމަށް ޖެންޑާ މިނިސްޓަރު އާމިނަތު ޒެނީޝާ ޝަހީދު ޒަކީ ވިދާޅުވެއްޖެއެވެ.
އަންހެނުންނަށް ކުރާ އަނިޔާއާ ދެކޮޅަށް ބައިނަލްއަގުވާމީ ގޮތުން ފާހަގަ ކުރާ ދުވަހުގެ މުނާސަބަތުގައި މިނިސްޓަރު ޒެނީޝާ ވިދާޅުވީ އަންހެނުންނަށާއި އަންހެން ކުދިންނަށް ކުރާ އެކި ބާވަތުގެ އަނިޔާއާ ދެކޮޅަށް އަޑުއުފުލަން ޖެހޭ ކަމަށޭވެ. އަދި އެގޮތަށް އަޑު އުފުލުމުގެ ތެރޭގައި ލިބޭ އަނިޔާގެ ވާހަކަ ރިޕޯޓްކޮށް ހަދާ ކަނބަލުންނަކީ ހިތްވަރުގަދަަ ކެރޭ ބައެއް ކަމަށް އެކަމަނާ ވިދާޅުވިއެވެ. އަދި އެފަދަ މީހުންގެ ކިބައިން އެހެން މީހުންނަށް އަނިޔާގެ މައްސަލަ ރިޕޯޓް ކުރުމަށް ހިތްވަރު ލިބޭ ކަމަށްވެސް ވިދާޅުވިއެވެ.
އެކަމަނާ ވިދާޅުވީ ރާއްޖޭގެ ހުރިހާ އަތޮޅަކުންވެސް އަނިޔާގެ މައްސަލަތައް ޖެންޑާ މިނިސްޓްރީއަށް ހުށަހަޅަމުންދާ ކަމަށެވެ. ރާއްޖޭގެ ތަފާސްހިސާބުތައް ދައްކާގޮތުގައި 15 އަހަރާއި 49 އަހަރާ ދެމެދުގެ ކޮންމެ ތިން އަންހެނަކީ، މަދުވެގެން އެއް ފަހަރު އަނިޔާއެއް ތަހައްމުލުކޮށްފައިވާ މީހެއްކަމަށް ޒެނީޝާ ވިދާޅުވިއެވެ.
"މިނިސްޓްރީއަށް ރިޕޯޓްކުރާ ކުޑަކުދިންނަށް ކުރާ އަނިޔާއާއި ގެވެށި އަނިޔާ ނުވަތަ ވަކި ޖިންސަކަށްވީތީ ކުރާ އަނިޔާގެ މައްސަލަތަކުގެ ތެރެއިން އަނިޔާގެ ޝިކާރައަކަށްވާ އަންހެންކުދިންނާއި އަންހެނުންގެ އަދަދު ނިސްބަތުން ގިނަ،"ޒެނީޝާ ވިދާޅުވިއެވެ.
އަންހެން ކުދިންނާއި އަންހެނުން ބާރުވެރިކުރުވުމަށް ސަރުކާރުން މަސައްކަތް ކުރަމުން ގެންދަވާކަން ފާހަގަ ކުރައްވަމުން މިނިސްޓަރު ޒެނީޝާ ވިދާޅުވީ އަންހެންކުދިންނާއި އަންހެނުން ބާރުވެރިކުރުމަކީ ސަރުކާރުގެ އެއް އަމާޒުކަމަށާއި، އިޖުތިމާއީ، އިޤްތިޞާދީ އަދި ސިޔާސީގޮތުން އަންހެނުން ބާރުވެރިކުރުމަށް މަސައްކަތްތަކެއް ކުރަމުން އަންނަ ކަމަށެވެ.
އަންހެނުންނަށާއި އަންހެން ކުދިންނަށް ކުރާ އެކި ބާވަތުގެ އަނިޔާއާ ދެކޮޅަށް އަޑުއުފުލުމުގެ ގޮތުން، ކޮންމެ އަހަރަކުވެސް ނޮވެންބަރު 25އިން ޑިސެންބަރު 10އަށް ބައިނަލްއަޤްވާމީ ގޮތުން ފާހަގަކުރާ "16 ޑޭސް އޮފް އެކްޓިވިޒަމް"ގެ ހަރަކާތްތައް ޖެންޑާ މިނިސްޓްރީން މިއަދު ވަނީ ރަސްމީކޮށްފަށާފައެވެ.