ރާއްޖޭގައި މަސައްކަތް ކުރާ ޑޮކްޓަރުންގެ ޑިއުޓީ ބަލާލެވޭ ގޮތަށް "ކޮބާ ޑޮކްޓަރު؟" ގެ ނަމުގައި ވެބްސައިޓެއް އެމްވީ މެޑިކަލްސްއިން ތައާރަފްކޮށްފި އެވެ.
ބުރާސްފަތި ދުވަހު ފެށިގެން މިރޭގެ ނިޔަލަށް ކުރިއަށްދާ މެޑިކަލް އެކްސްޕޯގައި މިއަދު ހަވީރު އެ ވެބްސައިތް ތައާރަފްކޮށް ވެބްސައިޓުގެ ތަފްސީލެއް އެމްވީ މެޑިކަލްސްއިން ވަނީ ދީފަ އެވެ.
އެ ވެބްސައިޓަށް ވަނުމަށް ފަހު ޑޮކްޓަރަށް ދައްކަން ބޭނުންވާ ހޮސްޕިޓަލުގައި ޑިއުޓީގައި ތިބި ޑޮކްޓަރުންގެ ޑިއުޓީ ގަޑިތަކާ އެއްކޮށް ބަލާލެވެ އެވެ. އަދި ކްލިނިކުތަކުގެ ޑޮކްޓަރުންގެ ޑިއުޓީވެސް ބަލާލެވެ އެވެ.
" ބަލާލަންވި ވަދެފަ މިސާލަކަށް އޭޑީކޭ ހޮސްޕިޓަލުގެ މިއަދު ޑިއުޓީގައި ތިބީ ކޮން ޑޮކްޓަރުންނެއްތޯ. މި ވެބްސައިޓުން އެކަމަށް އެހީވެދޭނެ" އެމްވީ މެޑިކަލްސްއިން ބުންޏެވެ.
އޭގެ އިތުރުން ވަކި ވަކި ޑޮކްޓަރުންގެ ޑިއުޓީ ޝްޑިއުލް ބަލައިލެވެ. އެ ޑޮކްޓަރުން ބައްލަވާ ކްލިނިކުތަކާއި ގަޑިތަކާ އެއްކޮށް ބަލާ ލެވޭގޮތަށް ވެބްސައިޓް ވަނީ ފަރުމާކޮށްފަ އެވެ.
ޑޮކްޓަރުންގެ ޑިއުޓީ ކުރިއަށް އޮތް މަހެހާ ދުވަހަށް ބަލާލާ އެޕޮއިންޓްމެންޓް ހައްދަން ބެނުންވިޔަސް ޑިއުޓީ މި ވެބްސައިޓުން ބަލާލެވޭގޮތަށް ވަނީ ފަރުމާކޮށްފަ އެވެ.
އޭގެ އިތުރުން ދައްކަން ބޭނުންވާ ވަކި ވަކި ޑިޕާޓްމެންޓްތައް ބަލާލައި އެ ޑިޕާޓްމެންޓްގެ ދަށުން ފަރުވާ ދެނީ ކޮން ކޮން ޑޮކްޓަރުންނެއްތޯ ބަލާ ލެވޭނެ ކަމަށް އެމްވީ މެޑިކަލްސްއިން ބުންޏެވެ.