ޕާކިސްތާނުގެ "ސްކޫލްގާލް އެކްވިސްޓް" އަދި ނޯބަލް ޕްރައިޒް އެވޯޑް ވިނާ، މަލާލާ ޔޫސަފްޒައީގެ ބަޔޮޕިކްގައި އޭނާގެ ރޯލުން ފެނިގެންދާނެ އެކްޓަރު ހާމަކޮށްފި އެވެ.
ރިޕޯޓުތައް ބުނާގޮތުން ފިލްމުގައި މަލާލާގެ ރޯލުން ފެނިގެން ދާނީ ޓީވީ އެކްޓްރެސް، ރީމް ޝެއިޚް އެވެ. ރީމް އަކީ ގިނަ އަދަދެއްގެ ޓީވީ ޑްރާމާތަކުން ފެނިގެން ގޮސްފައިވާ އަދި ގިނަ އެވޯޑުތަކެއް ވެސް ހޯދާފައިވާ ފަންނާނެކެވެ.
ރީމް ފެނިގެން ދިޔަ ބައެއް ޑްރާމާ ސިލްސިލާތަކުގެ ތެރޭގައި، ސްޓާޕްލަސްގެ މަގުބޫލު ޝޯ، 'ޔޭ ރިޝްތާ ކިޔާ ކެހެލާތާ ހޭ'، މޭ އާޖީ އޯރް ސާހެބް' އަދި 'ނަ ބޯލޭ ތުމް ނަ މޭނޭ ކުޗް ކަހާ' ހިމެނެ އެވެ.
މަލާލާގެ ބަޔޮޕިކް ވެގެންދާނީ ރީމް ބޮލީވުޑަށް ތައާރަފުވާ ފިލްމަށެވެ. ރީމް ވަނީ މީގެ ކުރިން އަމީތާބް ބައްޗަން އަދި ފަރްހާން އަޚްތަރުގެ ފިލްމު 'ވަޒީރް' އިން ފެނިގެން ގޮސްފައެވެ. ނަމަވެސް ލީޑު ރޯލަކުން ރީމް ފެނިގެން ދާނީ މަލާލާގެ ބަޔޮޕިކް އިންނެވެ.
ފިލްމުގައި ފެނިގެން ދާނީ ޕާކިސްތާނުގައި މަލާލާގެ ދިރިއުޅުން ކުރިއަށް ދިޔަ ގޮތާއި ނޯބަލް ޕްރައިޒް ލިބެން މެދުވެރިވި ގޮތެވެ. ފިލްމުގެ 50 ޕަސެންޓު މިހާރު ވަނީ ޝޫޓުކޮށް ނިމިފައެވެ. މިހާރު ނުނިމި ވަނީ ކަޝްމީރުގައި ނަގަން ޖެހޭ މަންޒަރުތަކެވެ.
ރީމްގެ އިތުރުން ދެން ފިލްމުން ފެނިގެން ދާނީ އޯމް ޕޫރީ އަދި ދިވްޔާ ދައްތާ ފަދަ ތަރިންނެވެ.