ސަރުކާރަށް ޕްރެޝާ ބޮޑުވެ، ސަރުކާރު ކޯލިޝަން ޕީޕީއެމް އާއި އެމްޑީއޭ އަށް ރައްޔިތުންގެ މަޖިލީހުގެ މެޖޯރިޓީ ގެއްލިފައި ވަނިކޮށް އެކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި އެކޯލިޝަންގެ 28 ބޭފުޅުން ތިއްބެވި އިރު އޭގެ ތެރެއިން ގިނަ މެމްބަރުން ތިއްބެވީ ހުދު ގަމީހުގައި މިނިވަން 50 ޓައީ އަޅުއްވައިގެންނެވެ. ސުވާލަކީ މިއީ އިއްތިފާގެއްތޯ އެވެ؟
އެޓައީތަކަކީ ރާއްޖެއަށް މިނިވަންކަން ލިބުނުތާ 50 އަހަރު ފުރުން ފާހަގަ ކުރުމަށް އެއަހަރު ބޭއްވި ރަސްމީ ހަރަކާތްތަކުގައި އެޅުމަށް ހާއްސަކުރި ރާއްޖޭގެ މިނިވަންކަން ދަށްކުވައިދޭ ޓައީތަކެކެވެ. ޓައީގެ ކުލަތަކަކީ ގައުމީ ކުލަތަކެވެ.
މެމްބަރުން މިނިވަން 50ގެ ޓައީތައް އަޅުއްވައިގެން ތިއްބެވުމާ ގުޅޭގޮތުން ސަން އިން ސުވާލުކުރުމުން ޕީޕީއެމް ޕާލަމެންޓްރީ ގުރޫޕުގެ ލީޑަރު އަހުމަދު ނިހާން ވިދާޅުވީ އެއީ ގައުމީ ކަމެއްގެ ގޮތުގައި ކުރާމަސައްކަތެއްކަން އެންގުމަށާއި އަޅުވެތި ކަމަށް ނޫނެކޭ ބުނާކަން އެންގުމަށް ކުރިކަމެއް ކަމަށެވެ.
"މިކަހަލަ ކަންކަމަށް [ސިޔާސީ] އަތް ބޭނުމަކީ ގައުމުތަކުން ކުރާކަމެއް، އެވިސްނުމާ އެކު ގައުމީ ކަމެއްގެ ގޮތުގައި މިކަން ގަބޫލްކުރާތީ މިގޮތަށް ތިބީ،" ނިހާން ވިދާޅުވި އެވެ.
އަހްމަދު ނިހާން --- ސަން ފޮޓޯ
ނިހާން ވިދާޅުވީ ލަންކާގެ ވެރިކަން ބަދަލުވި ބަދަލުވުމުން ވެސް މެސެޖެއް ލިބިގެންދާ ކަމަށެވެ. ނަމަވެސް ވަކި ގައުމަކަށް ތުހުމަތު ނުކުރާ ކަމަށް ނިހާން ވިދާޅުވި އެވެ.
ރައީސް މައުމޫން އަބްދުލްގައްޔޫމާއި ރައީސް މުހައްމަދު ނަޝީދު އެކުގައި ސިޔާސީ މަސައްކަތް ފަށާފައިވާ އިރު މަޖިލީހުގެ މެޖޯރިޓީ ވެސް އިދިކޮޅު ފަރާތްތަކުން މިހާރު ވަނީ ހޯދައިފަ އެވެ. އިދިކޮޅު ފަރާތްތަކުން އެކަމަށް ފައިސާގެ ބޮޑު ހޭދައެއް ކުރާކަމަށް ސަރުކާރުން ތުހުމަތުކުރާ އިރު އިދިކޮޅު ފަރާތްތަކާ ގުޅިފައި ވަނީ އަވައްޓެރި ގައުމެއް ކަމަށް ކުރެވޭ ތުހުމަތުތައް ވެސް ގިނަ އެވެ.
މިވަގުތު މަޖިލީހަށް ބަލާ އިރު ޕީޕީއެމްއަށް ނިސްބަތްވާ ތިއްބެވީ 34 މެމްބަރުންނެވެ. އަދި އެމްޑީއޭގެ ފަސް މެމްބަރުން ލައިގެން ޕީޕީއެމް ކޯލިޝަންގެ ހިމެނެނީ 40 މެމްބަރުންނެވެ.
އިދިކޮޅު މައި ޕާޓީ އެމްޑީޕީގައި 21 މެމްބަރުން ތިއްބެވި އިރު ޖުމްހޫރީ ޕާޓީގެ މަޖިލިސް މެމްބަރުންގެ އަދަދަކީ ހަތެކެވެ. އަދި އަދާލަތު ޕާޓީގެ އެއް މެމްބަރަކާ އެކު އިދިކޮޅު އިއްތިހާދުގައި ތިއްބެވި މަޖިލީހުގެ މެމްބަރުންގެ ރަސްމީ އަދަދަކީ 29 އެވެ. އެހެން ނަމަވެސް ވަކި ޕާޓީއަކާ ނުގުޅެ ތިއްބެވި 17 މެމްބަރުންގެ ތެރެއިން ގިނަ މެމްބަރުން މިހާރު ތިއްބެވީ ސަރުކާރާ އިދިކޮޅަށެވެ.
ކޮންމެ އަކަސް ރާއްޖޭގެ ސިޔާސީ މަޝްރަހުން މިއަދު ފެނިގެން ދަނީ ކުރިން ވެސް ހީނުކުރާ ފަދަ ކަންތައްތަކެކެވެ. ސިޔާސީ ގޭމް މޮޅެވެ. ސުވާލަކީ ހަމަ މިއީ އެތެރޭގެ ހަމަނުޖެހުމެއްތޯ އެވެ؟