ކްރިސްޓިއާނޯ ރޮނާލްޑޯ ރޭ ނިއުޒި ލެންޑް ކޮޅަށް ކާމިޔާބުކުރި ލަނޑާއެކު އޭނާ ޕޯޗުގަލަށް ކާމިޔާބުކުރި ލަނޑުގެ އަދަދު 75އަށް އަރައިފިއެވެ. މި ލަނޑުތަކާއެކު ރޮނާލްޑޯ ވަނީ ހަންގޭރީގެ ކުރީގެ ފުޓްބޯޅަ ތަރި ފެރެންކް ޕުސްކާސް ޔޫރަޕްގައި ގާއިމުކޮށްފައިވާ، ގައުމީ ޓީމަށް އެންމެ ގިނަ ލަނޑު ޖެހިކުޅުންތެރިޔާގެ ރެކޯޑާ ގާތްކޮށްފިއެވެ.
ކޮންފެޑެރޭޝަންސް ކަޕްގައި ރޭ ނިއުޒީ ލެންޑު އަތުން 4-0 ލަނޑުން މޮޅުވެ ޕޯޗްގީޒް ޓީމުން އެ މުބާރާތުގެ ސެމީން ޖާގައެއް ކަށަވަރުކޮށްފައި ވާއިރު، އެމެޗުގައި ފެނިގެން ދިޔަ ފުރަތަމަ ލަނޑު، ޕެނަލްޓީއަކުން ކާމިޔާބުކުރީ ރޮނާލްޑޯއެވެ.
ރޮނާލްޑޯ ވަނީ، ވޯލްޑޮ ކަޕް ކޮލިފައިންގައި އެންމެ ފަހުން ލެތުވިއާއާ ދެކޮޅަށް ޕޯޗްގަލް ކުޅުނު މެޗުގައި ދެ ލަނޑު ކާމިޔާބުކޮށްފައެވެ. އަދި ކޮންފެޑެރޭޝަންސް ކަޕްގައި ރަޝިއާ އަދި ނިއުޒި ލޭންޑު ކޮޅަށް އޭނާ ވަނީ ލަނޑު ޖަހައިފައެވެ.
ރޮނާލްޑޯ އެކޭ އެއްފަދައިން ރެއާލް މެޑްރިޑަށް ގިނަ ކާމިޔާބީތަކެއް ހޯދައިދީފައިވާ، ޕުސްކާސް ވަނީ، 1945އާއި 1956 އާ ދެމެދު ހަންގޭރީ ޓީމަށް 84 ލަނޑު ކާމިޔާބުކޮށްދީފައެވެ. އެއީ ގައުމީޓީމަށް އޭނާ ކުޅުނު 85 މެޗުންނެވެ.
ވިލާތުބައްރުގައި އަދި މިހާތަނަށް އެއްވެސް ކުޅުންތެރިއަކަށް ޕުސްކާސްގެ ލަނޑުގެ ރެކޯޑާ އަރައި ހަމަކުރެވިފައެއް ނުވެއެވެ.
ރީތި އަދި އެހާމެ މޮޅު ލަނޑުތަކެއް ކާމިޔާބުކޮށްފައިވާ ޕުސްކާސްއަށް ނިސްބަތްކޮށް ފީފާއިން ވަނީ 2009 ވަނަ އަހަރު، "އަހަރުގެ އެންމެ ރީތި ލަނޑު" ފާހަގަކޮށް އެ ލަނޑު ޖެހިކުޅުންތެރިއާއަށް ދިނުމަށް "ފީފާ ޕުސްކާސް އެވާޑް"ގެ ނަމުގައި އެވޯޑެއް ތައާރަފްކޮށްފައެވެ.