ރަޝިއާގައި ހޮނިހިރު ދުވަހުގެ ރޭ ފެށި، ފީފާ ކޮންފެޑެރޭޝަންސްގެ ކަޕްގެ ފުރަތަމަ މެޗުގައި ނިއުޒީލޭންޑް އަތުން 2-0ގެ ނަތީޖާއަކުން ފަސޭހަކަމާއެކު މޮޅުވެ ރަޝިއާއިން އެ މުބާރާތުގެ ފެށުން ރަނގަޅުކޮށްފިއެވެ.
ކޮންފެޑެރޭޝަންސް ކަޕަކީ، 2005 ވަނަ އަހަރުން ފެށިގެން، ފީފާއިން ބާއްވަމުން އަންނަ މުބާރާތެކެވެ. މި މުބާރާތް ބާއްވަނީ، ކޮންމެ ފަހަރެއްގެ ވެސް ވޯލްޑް ކަޕް ފުޓްބޯޅަ މުބާރާތް ބޭއްވުމުގެ ކުރިން، އެ މުބާރާތް ބާއްވާ ގައުމުގައެވެ.
ރަޝިއާގެ ސެއިންޓް ޕީޓަސްބާގް ސްޓޭޑިއަމްގައި މިރޭ ފެށި އެ މުބާރާތް ރަސްމީކޮށް ފައްޓަވައިދެއްވީ، ފީފާގެ ރައީސް ޖިއާނީ އިންފަންޓިނޯއެވެ. އޭނާއާއެކު އެ ރަސްމިއްޔާތުގައި ރަޝިއާގެ ރައީސް ވުލަޑްމިއަރ ޕޫޓީން އާއި ބްރެޒިލްގެ ފުޓްބޯޅަ ލެޖެންޑް ޕެލޭ ބައިވެރިވިއެވެ.
ފީފާ ކޮންފެޑެރޭޝަންސް ކަޕް 2017 ފެށުމުގެ ރަސްމިއްޔާތުގެ ތެރޭން -- ފޮޓޯ: އޭޕީ
މެޗުގެ 31 ވަަނަ މިނިޓްގައި ރަޝިއާއަށް ލީޑު ލިބުނީ، ނިއުޒިލޭންޑްގެ މައިކަލް ބޮކްސާލް އަތުން ބައިކޮޅަށް ވަން ލަނޑަކުންނެވެ.
ރަޝިއާއަށް ލީޑު ފުޅާކޮށްދިނީ، ފޯރިގަދަ ކުޅުމެއް ފެނިގެން ދިޔަ މެޗުގެ ދެވަނަ ހާފްގެ 69 ވަނަ މިނިޓްގައި އެޓީމުގެ އެޓޭކިން މިޑްފީލްޑަރު ފިޔޮދޯ ސްމޮލޯފްއެވެ.
ދެ ގްރޫޕަކަށް ބަހާލައިގެން ކުރިއަށް ގެންދާ މި މުބާރާތުގެ ގްރޫޕް އޭގައި ރަޝިއާއާއި ނިއުޒިލޭންޑުގެ އިތުރުން ހިމެނޭނި، ކްރިސްޓިއާނޯ ރޮނާލްޑޯ އެ ސްކޮޑެއްގައި ހިމެނޭ ޕޯޗްގީޒާއި މެކްސިކޯއެވެ.
ގްރޫޕް ބީގައި ހިމެނެނީ، ކެމަރޫން، ޗިލީ، އޮސްޓްރޭލިއާ އަދި ދުނިޔޭގެ ޗެމްޕިއަންސް ޖަރުމަނެވެ.
ރަޝިއާގައި މިއަދު ކޮންފެޑެރޭޝަންސް ކަޕް ފެށިގެން ދިޔައިރު، ރަޝިއާ ޓީމުގެ ސަޕޯޓަރުންގެ ލީޑަރު ޝްރައިޖިންއަށް އެ މެޗަށް ދަނޑަށްވަނުމުގެ ފުރުސަތު ނުލިބޭކަމަށްވެއެވެ.
"އެއްވެސް ފަރާތަކުން ބުނެއެއް ނުދިން ކީއްވެގެންކަމެއް އަހަންނަށް ފުރުސަތު ނުދިނީ،" ރޮއިޓަސްއަށް ޝްރައިޖިން ބުންޏެވެ.
"އެމީހުން އަހަންނަށް ފޭން_އައިޑީއެއް ދިން. އަދި މެޗު ފެށުމުގެ ދެ ގަޑިއިރު ކުރީން އެ އައިޑީ ކެންސަލްކޮށްލި. އަހަންނަށް ވަގުތެއް ނުލިބުނު ޝަކުވާ ހުށަހަޅަންވެސް."
ފްރާންސްގައި މިދިޔަ އަހަރު ބޭއްވި ޔޫރޯ 2016ގައި ވެސް ޝްރައިޖިންއަށް ވަނީ ދަނޑަށް ވަނުން މަނާކޮށްފައެވެ. އިންގްލޭންޑާ ދެކޮޅަށް ރަޝިއާ ކުޅުނު މެޗަށް އޭނާ ދަނޑަށް ވަނުން މަނާކުރީ މާރާމާރީ އާއި ހަމަނުޖެހުން ހިންގުމާގުޅިގެންނެވެ..
މި މުބާރާތުގައި މާދަމާރޭ ދެ މެޗެއް ކުޅޭނެއެވެ. ފުރަތަމަ މެޗު ރާއްޖޭ ގަޑިން 8:00ގައި ފަށާއިރު އެ މެޗުގައި ވާދަކުރާނީ، ގްރޫޕް އޭގެ ޕޯޗްގަލް އާއި މެކްސިކޯއެވެ.
ދެވަނަ މެޗުގައި ވާދަކުރާނީ، ގްރޫޕް ބީގެ ކެމަރޫން އާއި ޗިލީއެވެ. އެ މެޗު ފަށާނީ، ރާއްޖޭގެ ގަޑިން މާދަމާރޭ 11:00ގައެވެ.