އަންނަ މަހު ބާއްވާ ވެކޭޝަންސް އެކްސްޕޯގެ ދެވަނަ މައުރަޒުގައި މެޑިކަލް ޓޫރިޒަމްގެ ބޮޑެތި ބްރޭންޑުތަކެއް ބައިވެރިވެއްޖެ އެވެ.
ހައިރައިޒްގެ ފައުންޑާ، އިސްމާއިލް ހަމީދު "ސަން" އަށް ވިދާޅުވި ގޮތުގައި މިއަހަރުގެ މައުރަޒުގައި ލަންކާ ހޮސްޕިޓަލުންނާއި ޑާޑެންސްއިން މިހާރު ވަނީ ބައިވެރިވެފައެވެ. އެ ފަރާތްތަކުން ބައިވެރިވެފައިވަނީ ރާއްޖެއިން ލަންކާއަށް ދަތުރުކުރާ ފަރާތްތަކަށް ހެލްތް ޗެކަޕްތަކާއި ސްޕެޝަލިޓީ ޗެކަޕްތަކުގެ ތަފްސީލާއި އިންތިޒާމު ހަމަޖައްސައިދިނުމުގެ ބޭނުމުގައެވެ.
ޗުއްޓީއަށް ބޭރު ގައުމުތަކަށް ދާއިރު ވަރަށް ގިނައިން ހެލްތް ޗެކަޕް ހަދާއިރު، މި އެކްސްޕޯއިން އެފަދަ ފަރާތްތަކަށް ޚާއްސަ އަގުތަކެއްގައި ކުރިން ބުކިން ހެދޭނެ އެވެ. އަދި ކޮންޓެކްޓް ޕޮއިންޓެއްވެސް ގާއިމް ކުރެވޭނެ އެވެ.
ވެކޭޝަންސް އެކްސްޕޯއަކީ ރާއްޖޭގައި ފުރަތަމަ ފަހަރަށް ބޭއްވި ޓްރެވަލް އިންޑަސްޓްރީ ތަމްސީލު ކުރާ ފެއާ އެވެ. އެ ފެއާގެ މަގުސަދަކީ ރާއްޖޭގައި ދިރިއުޅޭ ދިވެހިންނާއި ބޭރު މީހުންނަށް ރާއްޖެއާއި ރާއްޖެ ކައިރި ގައުމުތަކުގައި ހުރި ހޮލިޑޭ އޮޕްޝަންސްތައް ތަމްސީލު ކުރުމެވެ. އަދި ރާއްޖޭގައި ހިންގާ ފަތުރުވެރިކަމުގެ ދާއިރާގައި ހަރަކާތްތެރިވާ ކުދި ވިޔަފާރިތަކާއި ގެސްޓްހައުސްތައް އަދި ރިސޯޓުތަކުގެ ޕްރޮޑަކްޓުތައް ދައްކާލުމަކީވެސް އެ މައުރަޒުގެ މަގްސަދުތަކުގެ ތެރޭގައި ހިމެނޭ ކަމެކެވެ.