ގައުމީ އެއާލައިން މޯލްޑިވިއަންގެ ޓިކެޓު ރިޒަވޭޝަންސް އޮފީސް، މާފަންނު ހުޅަނގު ކޮޅުގައި ހުންނަ ދާރުލްއީމާން އިމާރާތަށް ބަދަލުކޮށް، އެ އޮފީސް މިއަދު ހުޅުވައިފިއެވެ.
ދާރުލްއީމާން އިމާރާތް ހުންނަނީ ރަސްފަންނު ކުރިމަތީގައި ހުންނަ މޯލްޑިވިއަންގެ ހެޑް އޮފީހާ ޖެހިގެންނެވެ.
އެ އޮފީސް ހުޅުވުމަށް މިއަދު ބޭއްވި ޚާއްސަ ރަސްމިއްޔާތެއްގައި، ޓިކެޓިންގް އޮފީސް ރަސްމީކޮށް ހުޅުވައިދެއްވީ ޕަބްލިކް ސާވިސް މީޑިއާގެ މެނޭޖިންގް ޑިރެކްޓަރު އިބްރާހިމް ޚަލީލެވެ.
"ސަން"އަށް މައުލޫމާތު ދެއްވަމުން، ގައުމީ އެއާލައިން ހިންގާ ކުންފުނި، އައިލެންޑް އޭވިއޭޝަން ސާވިސެސްގެ މެނޭޖިންގް ޑިރެކްޓަރު އަބްދުލްހާރިސް ވިދާޅުވީ، މިއަދު އާ ޓިކެޓިންގް އޮފީސް ހުޅުވުމާ އެކު، އެސްޓީއޯ އައިފާނު ބިލްޑިންގްގައި ކުރިން ހިންގަމުން އައި މޯލްޑިވިއަންގެ އޮފީސް ބަންދުވާނެ ކަމަށެވެ.
ހާރިސް ވިދާޅުވި ގޮތުގައި، މިއަދު ހުޅުވިގެން ދިޔައީ ކުރީގެ އޮފީހަށް ވުރެ ޒަމާނީ، އަދި އަޕްގްރޭޑެޑް އޮފީހެކެވެ.
"މިއަދު ހުޅުވިގެން ދިޔައީ ކުރިޔަށް ވުރެ މޮޑަން އޮފީހެއް، ކޯލް ސެންޓަރަކާއި އާ ސިސްޓަމްތަކާ ވެސް އެކުގައި،" އޭނާ ވިދާޅުވިއެވެ.
ހާރިސް ވިދާޅުވި ގޮތުގައި، އާ އޮފީހުގައި ހުންނާނީ އޮޓޮމޭޓެޑް ކިއު ސިސްޓަމެކެވެ. ކިއު ސިސްޓަމް އޮޓޮމޭޓުކޮށްފައި ވަނީ "ކިއު ބީ" އެޕްލިކޭޝަނުގެ ޒަރިއްޔާއިންނެވެ. އެގޮތުން، މައުލޫމާތު ހޯދުމާއި ޓިކެޓު ރީފަންޑު ހޯދުމަށާއި، ޓިކެޓު ރިޒަވޭޝަން ހެދުމަށާއި، އަދި ޚާއްސަ އެހީއަށް ބޭނުންވާ މީހުންނާއި ދުވަސްވީ މީހުންނަށް ވަކިން، ކިއު ބީ އެޕްލިކޭޝަނުން ކިއު ނަމްބަރު ނެގޭނެއެވެ. ގޭގައި ހުރެގެންވެސް ކިއު ނަމްބަރު ނެގޭނެކަމަށް ހާރިސް ވިދާޅުވިއެވެ.
މީގެ އިތުރުން ކުރީގެ އޮފީހުން ޚިދުމަތް ދެމުން ދިޔައީ އެންމެ ފަސް ކައުންޓަރުން ނަމަވެސް، އާ އޮފީސް ހުޅުވިގެން ދިޔައީ ހަތް ކައުންޓަރުން ޚިދުމަތް ދޭ ގޮތަށް ކަމަށް ހާރިސް ވިދާޅުވިއެވެ.
މޯލްޑިވިއަންގެ އާ ޓިކެޓިންގް އޮފީސް ހުޅުވިފައި ހުންނާނީ އާދީއްތަ ދުވަހުން ބުރާސްފަތި ދުވަހަށް ހެނދުނު 8:30 އިން ހަވީރު 4:30 އަށެވެ. ހޮނިހިރު ދުވަހު ހުޅުވިފައި ހުންނާނީ ހެނދުނު 9:00 އިން މެންދުރު 3:00 އަށް، އަދި އެހެނިހެން ރަސްމީ ބަންދު ދުވަސްތަކުގައި ހެނދުނު 9:00 އިން މެންދުރު 2:00 އަށެވެ.