މާދަމާ (26 މެއި 2017، ހުކުރު ދުވަސް) އަކީ 1438 ވަނަ އަހަރުގެ ޝައުބާން މަހުގެ 30 ވަނަ ދުވަހެވެ. ފަލަކީ ހިސާބުތަކުން ދައްކާ ގޮތުގައި މިއަދުގެ އިރު ރާއްޖެއަށް އޮއްސޭއިރު، ހަނދު ފެންމަތީގައެއް ނުހުންނާނެއެވެ. އެހެންކަމުން މާދަމާއަކީ ރަމަޟާން މަހުގެ ފުރަތަމަ ދުވަސް ކަމުގައި ވުމުގެ ފުރުޞަތެއް ނެތެވެ.
ފަލަކީ ހިސާބުތަކުން ދައްކާގޮތުގައި، މިއަދު މާލެއަށް އިރު އޮއްސޭނީ ހަނދު އޮއްސުމުގެ 19 މިނެޓު ފަހުންނެވެ. ރާއްޖޭގެ އެންމެ އުތުރަށް އިރު އޮއްސޭނީ ހަނދު އޮއްސުމުގެ 20 މިނެޓު ފަހުންނެވެ. ރާއްޖޭގެ އެންމެ ދެކުނަށް އިރު އޮއްސޭނީ ހަނދު އޮއްސުމުގެ 17 މިނެޓު ފަހުންނެވެ.
އެހެންނަމަވެސް މުސްލިމުންގެ ޙަރަމްފުޅުތައް އެބިމެއްގައި ހުރި ސަޢުދީޢަރަބިއްޔާގައި ހަނދުބެލުމުގައި ބޮޑަށް އިސްކަންދެނީ ހަމަލޮލުން ފެނުމަށެވެ. ހަމަލޮލަށް ހަނދު ނުފެންނާނެ ކަމަށް ފަލަކީ ހިސާބުތަކުން ދައްކާނަމަ ހަނދު ބަލާން ދިއުމެއް ސަޢުދީޢަރަބިއްޔާގައި ވެސް ނޯވެއެވެ.
އެހެންކަމުން ސަޢުދީޢަރަބިއްޔާގައި އަމަލުކުރާ އުސޫލުން ބެއްޔަސް، އަދި ފަލަކީ ހިސާބަށް ޢަމަލު ކުރާ ތުރުކީ ފަދަ ބައެއް ގައުމުތަކުގައި އަމަލުކުރާ އުސޫލުން ބެއްޔަސް މާދަމާ އަކީ މިއަހަރުގެ ޝައުބާންމަހުގެ އެންމެ ފަހު ދުވަހެވެ. އަދި 27 މެއި 2017 ވާ ހޮނިހިރު ދުވަހަކީ 1438 ވަނަ އަހަރުގެ މުލަރޯދަ ދުވަހެވެ.