ވިކްޓޯރިއާ ގިއުމަރޭސް އަތުން 5-0ގެ ނަތީޖާއަކުން މޮޅުވެ، ބެންފިކާއިން ޖެހިޖެހިގެން ހަތަރުވަނަ ފަހަރަށް، ޕޯޗްގީޒް ޕްރިމެއިރާ ލީގާ ކާމިޔާބުކޮށްފިއެވެ.
ރުއީ ވިޓޯރިއާގެ އިރުޝާދުގެ ދަށުން، ހޮނިހިރު ދުވަހުގެ ރޭ، ބެންފިކާއިން ވިޓޯރިއާއާ ދެކޮޅަށް ނުކުތްއިރުވެސް، ލީގު ތާވަލުގައި ވާދަވެރި ޕޯޓޯއާ ފަސްޕޮއިންޓް ފަރަގެއް އޮތް ބެންފިކާއަށް އެ މެޗު ކާމިޔާބުކުރެވިއްޖެ ނަމަ، ލީގު ލިބޭނޭކަން އޮތީ ކަށަވަރުވެފައެވެ.
ބެންފިކާއިން ވަނީ، އެ މެޗުގެ ފުރަތަމަ ހާފްގައި ހަތަރު ލަނޑުގެ ލީޑެއް ނަގައިފައެވެ. އެގޮތުން ފުރަތަމަ ހާފްގެ ލަނޑުތައް ކާމިޔާބުކޮށްދިނީ ފްރެންކޯ ސާވީ، ރައުލް ޖިމެނޭޒް، ޕިޒީ އަދި ޖޯނަސްއެވެ.
އެސްޓާޑިއޯ ޑަ ލޫޒްގައި ބެންފިކާއިން ޖެހިޖެހިގެން ހަތަރުވަނަ ފަހަރަށް ލީގު ކާމިޔާބުކުރުމުގެ އުފާ ފާޅުކުރާން ފެށީ، ފަހު ހާފުގައި އެޓީމަށް ލިބުނު ޕެނަލްޓީއަކުން ޖޯނަސް ކާމިޔާބުކޮށްދިން ލަނޑާއެކު 5-0ގެ ތަފާތު ބޮޑު ނަތީޖާއަކުން މެޗު ކާމިޔާބުކޮށްގެންނެވެ.
މި މޮޅާއެކު ޕޯޗްގަލްގެ އެންމެ ކާމިޔާބު ބެންފިކާއިން ވަނީ، ފާއިތުވި އަހަރުތަކުގައި ޕްރިމެއިރާ ލީގާގެ އެންމެ ނުފޫޒު ގަދަ ޓީމަކީ އެއީކަން އަނެއްކާވެސް ސާބިތުކޮށްދީފައެވެ.
އަމިއްލަ ދަނޑުގައި އެއްވެސް މެޗަކުން ބަލިނުވެ، ބެންފިކާއިން މިސީޒަންގެ ލީގު ކާމިޔާބުކުރި އިރު، އެޓީމު ލީގުގައި ބަލިވެފައި ވަނީ މިހާތަނަށް އެންމެ ދެފަހަރުއެވެ.