ފުޓްބޯލް ރައިޓާސް އެސޯސިއޭޝަނުން ހޮވާ މި ސީޒަންގެ އެންމެ މޮޅު ކުޅުންތެރިޔާގެ އެވޯޑް، ޗެލްސީގެ މިޑްފީލްޑަރު އެންގޯލޯ ކަންޓޭއަށް ލިބިއްޖެއެވެ.
ލެސްޓާ ސިޓީއަށް މިދިޔަ ސީޒަންގެ ޕްރިމިއަރ ލީގު ހޯދައިދިނުމުގައި މުހިންމު ދައުރެއް އަދާކުރި ފްރާންސްގެ ތަރި ކަންޓޭއަށް މިދިޔަ މަހު ވަނީ، ޕްރޮފެޝަނަލް ފުޓްބޯލަރސް އެސޯސިއޭޝަން (ޕީއެއެފްއޭ) އިން ހޮވި، އިނގިރޭސި ވިލާތުގައި ކުޅޭ އެންމެ މޮޅު ފުޓްބޯޅަ ކުޅުންތެރިޔާގެ އެވޯޑުވެސް ލިބިފައެވެ.
އެންމެ މޮޅު ކުޅުންތެރިޔާގެ އެވޯޑު ހޯދުމަށް ކަންޓޭއާ އެންމެ ގާތުން ވާދަކުރީ، ދެވަނަ ހޯދި ޗެލްސީ ތަރި އެޑެން ހަޒާޑާއި ތިން ވަނަ ހޯދި މެންޗެސްޓާ ޔުނައިޓެޑްގެ ތަރި ޒްލަޓަން އިބްރަހިމޮވިޗެވެ.
މި އެވޯޑަށް ނޮމިނޭޓްވި ކުޅުންތެރީންގެ ތެރޭގައި އާސެނަލްގެ ތަރި އެލެކްސް ސަންޗޭޒާއި، ޓޮޓެންހަމްގެ ހެރީ ކޭން އަދި އަދި އެވަޓަންގެ ރޮމެލު ލުކާކޫ ހިމެނެއެވެ.
މިސީޒަންގެ ޕްރިމިއަރ ލީގު ޗެލްސީން ކާމިޔާބުކޮށްފި ނަމަ، ކަންޓޭ ވެގެން ދާނީ، ތަފާތު ދެ ކްލަބެއްގައި ޖެހިޖެހިގެން ދެއަހަރު ޕްރިމިއަރ ލީގު ކާމިޔާބުކުރި ފުރަތަމަ ކުޅުންތެރިޔާއަށެވެ.