އދ. މާމިގިލީގައި ޒުވާނަކު ދަންޖެހިގެން މަރުވެއްޖެ އެވެ.
އެނގިފައިވާ ގޮތުގައި ދަންޖެހިގެން މަރުވެފައި ވަނީ 23 އަހަރުގެ ޒުވާން ފިރިހެނެކެވެ.
އޭނާ ދަންޖެހިފައި ހުއްޓައި ފެނުނީ މިރޭ 7:30 އެހާކަންހާއިރު ކަމަށް "ސަން" އަށް މައުލޫމާތު ދިން ފަރާތަކުން ބުންޏެވެ. އެކަމާ ގުޅިގެން މާމިގިލީ ކައުންސިލްގެ ރައީސް ޖުނައިދު އިބްރާހީމް ވިދާޅުވީ، އޭނާ ދަންޖެހުނު ސަބަބެއް ނޭނގޭ ކަމަށެވެ. އަދި އޭނާ މިހާރު ހޮސްޕިޓަލަށް ގެންގޮސްފައިވާ ކަމަށް ޖުނައިދު ވިދާޅުވި އެވެ.
ޖުނައިދު ވިދާޅުވި ގޮތުގައި އެ ޒުވާނާ ދަންޖެހިފައި ހުރީ އޭނާ ދިރިއުޅޭ ކޮޓަރީގަ އެވެ. ފުލުހުން ބުނީ އެނާ މަރުވެފައި ހުރިކަން ފުލުހުންނަށް ރިޕޯޓް ލިބުނީ 7:50 ހާއިރު ކަމަށާއި މައްސަލަ ތަހުގީގު ކުރާނެ ކަމަށެވެ.
އަމިއްލަ އަށް މަރުވުމުގެ މައްސަލަތައް އިންތިހާ އަށް އިތުރުވަމުން އަންނަ އިރު މިއީ އަހަރެމެންގެ މާތްވެގެންވާ އިސްލާމްދީނުގައި ވަރަށް ބޮޑު ހަރާމް ކަމެކެވެ. އައްޝެއިޚް އަހުމަދު ފަހުމީ ދީދީ ވިދާޅުވި ގޮތުގައި އަމިއްލަ އަށް މަރުވުން ނުވަތަ މަރުވާ ފަދަ ކަމެއް ކުރުން ނުވަތަ އަމިއްލަ ހަށިގަނޑަށް ގެއްލުންދިނުމަކީ އިސްލާމް ދީނުގައި ހަރާމް ކުރައްވާފައިވާ ބޮޑު ފާފައެއް ކަމަށެވެ.
އާ ގާނޫނުލްއުގޫބާތުގައި ބުނެފައިވާ ގޮތުން އަމިއްލައަށް މަރުވާން އުޅުމަކީ ވެސް ކުށެކެވެ. އަދި އަމިލަޔަށް މަރުވާން އުޅުނުކަން ސާބިތުވެއްޖެ ނަމަ ދެވޭ އެންމެ ބޮޑު އަދަބެއްގެ ގޮތުން ގާނޫނުލް އުގޫބާތުގައި ކަނޑައަޅާފައި ވަނީ އެއް އަހަރު ދުވަހުގެ ޖަލު ހުކުމެކެވެ.