ޒުވާން ވިޔަފާރިވެރިން އުފެއްދުމަށް ސަރުކާރުން ފަށާފައިވާ ގެޓްސެޓް ލޯނުގެ ދެވަނަ ބުރުގައި ބައިވެރިވުމުގެ ފުރުސަތު ސަރުކާރުން ހުޅުވާލައިފިއެވެ.
އިކޮނޮމިކް މިނިސްޓްރީގައި މިއަދު ބޭއްވި ޕްރެސްކޮންޕަރެންސެއްގައި ގެޓްސެޓް ލޯނު ޕްރޮމެނޭޖަރު މަހީލް އަލީ ޖަލީލް ވިދާޅުވީ އެ ލޯނުގެ ފުރަތަމަ ބުރުގައި ލޯނު ދޫކުރި ވިޔަފާރިތަކުގެ 90 ޕަސެންޓު ވިޔަފާރިތައް ހިނގަމުން އެބަދާ ކަމަށާއި އެ ވިޔަފާރިތައް ކާމިޔާބު ކަމަށެވެ. އަދި ގެޓްސެޓް ލޯނު ސްކީމުގެ ފުރަތަމަ ބުރުވެސް ކާމިޔާބު ކަމަށް އޭނާ ވިދާޅުވިއެވެ.
"ހިތް ހަމަ ޖެހޭ ވަރުގެ ސަކްސެސް ރޭޓެއްގަ އެ ވިޔަފާރިތައް އެބަ ހިނގާ،" އޭނާ ވިދާޅުވިއެވެ.
ގެޓްސެޓްގެ ފުރަތަމަ ބުރުގެ ލޯނަށް ގާތްގަނޑަކަށް 700 އެއްހާ ފަރާތްތަކުން އެދި ހުށަހެޅި އެވެ. އެ ލޯނުގެ ދެވަނަ ބުރުގެ ލޯނުގެ އެޕްލިކޭޝަންތައް މިމަހުގެ 16 ވަނަ ދުވަހުން ފެށިގެން 27 ވަނަ ދުވަހުގެ ނިޔަލަށް ބަލައިގަތުމަށް ހަމަޖައްސާފައިވާ ކަމަށާއި، އޮންލައިން މެދުވެރިކޮށްވެސް އެޕްލިކޭޝަން ފޮނުވޭނެ ކަމަށް އޭނާ ވިދާޅުވިއެވެ.
އެ ލޯން ސްކީމުގެ ދަށުން އަލަށް ވިޔަފާރިއަށް ވަންނަ 18 އަހަރާއި 25 އަހަރާ ދެމެދުގެ ޒުވާނުންނަށް ތިން ލައްކަ ރުފިޔާއާއި އަށް ލައްކަ ރުފިޔާއާ ދެމެދުގެ ލޯނު ދޫކުރާނެ އެވެ. ލޯނު އަނބުރާ ދެއްކުމަށް ގްރޭސް ޕީރިއަޑަކާ އެކު ޖުމްލަ ނުވަ އަހަރު ލިބެއެވެ.
ގެޓްސެޓް ލޯނު ސްކީމުގެ ދަށުން މިއަހަރުވެސް ދޫކުރަން ހަމަޖައްސާފައިވަނީ ޖުމްލަ 25 މިލިއަން ރުފިޔާ އެވެ.