އިނގިރޭސިވިލާތުގައި އަރުވާލެވިގެން ދިރިއުޅުއްވާ ކުރީގެ ރައީސް މުހައްމަދު ނަޝީދު ސްރީލަންކާއަށް އަނެއްކާ ވެސް ވަޑައިގެންފި އެވެ.
ރޭގެ ވަގުތެއްގައި ނަޝީދު ސްރީލަންކާއަށް ވަޑައިގެންފައިވާ އިރު، އެމަނިކުފާނަށް ކޮލޮމްބޯއިން މަރުހަބާ ވިދާޅުވެފައި ވަނީ ކޮލޮމްބޯގައި ދިރިއުޅުއްވާ އެމްޑީޕީގެ އިންޓަނޭޝަނަލް ސްޕޯކްސްޕާސަން ހާމިދު އަބްދުލްގަފޫރާއި، އެމްޑީޕީ ސަރުކާރުގެ ކުރީގެ ފޮރިން މިނިސްޓަރުކަން ކުރެއްވި އަހްމަދު ނަސީމެވެ.
President Nasheed arrive Colombo. pic.twitter.com/ey5wYbn3Q5
— Hamid Abdul Ghafoor (@HamidhAG) March 19, 2017
ކްރިމިނަލް ކޯޓުގެ ކުރީގެ އިސް ގާޒީ އަބްދުﷲ މުހައްމަދު ހައްޔަރުކުރި މައްސަލައިގައި ޓެރަރިޒަމްގެ ކުށް ސާބިތުވެ 13 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވަނިކޮށް އިނގިރޭސިވިލާތަށް ބޭސްފަރުވާއަށް ވަޑައިގަތީ މިދިޔަ އަހަރުގެ ޖެނުއަރީ މަހުގެ ތެރޭގަ އެވެ. އެމަނިކުފާނު އިނގިރޭސިވިލާތަށް ވަޑައިގަތުމުގެ ކުރިން ސްރީލަންކާއަށް ވަޑައިގަތެވެ.
އެއަށް ފަހު އިނގިރޭސި ވިލާތުގެ ސިޔާސީ ހިމާޔަތް ހޯއްދަވައިގެން އުޅުއްވާ އިރު، ދާދި ފަހުން ވެސް ރައީސް ނަޝީދު ލަންކާއަށް ވަޑައިގަތެވެ. އެ ދަތުރުފުޅުގައި އެމަނިކުފާނާ އެކު އެމްޑީޕީގެ މުހިންމު ބައްދަލުވުންތަކެއް ވަނީ ކޮލޮމްބޯގައި ބާއްވައިފަ އެވެ.