ރާއްޖޭގައި ފެތުރެމުންދާ ހުމާއި ރޯގާ، ބާރު މިނެއްގައި ފެތުރެމުންދާތީ، ކޮންސްޓްރަކްޝަން ސައިޓުތަކުގައި އެޗްޕީއޭގެ ގައިޑްލައިނާ އެއް ގޮތްވާ ގޮތުގެ މަތިން ފިޔަވަޅު އެޅުމަށް ކޮންސްޓްރަކްޝަން ކުންފުނިތަކުގެ ޖަމިއްޔާ، މޯލްޑިވްސް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީން އިލްތިމާސްކޮށްފި އެވެ.
ރާއްޖޭގައި ފެތުރެމުންދާ އެޗްވަންއެންވަން ވައިރަސް ރާއްޖޭގެ އެކި ސަރަހައްދުތަކުގައި ފެތުރެމުންދާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އިއުލާންކޮށް، ރާއްޖޭގެ ލެވެލް ތިނަކަށް ގޮސްފައިވާކަން އިއުލާންކޮށްފައި ވުމާ ގުޅިގެން އެ އެސޯސިއޭޝަނުން ނެރުނު ބަޔާނެއްގައި ބުނެފައި ވަނީ އެ އެސޯސިއޭޝަންގެ މެންބަރު ކުންފުނިތަކުން ވޯކް ސައިޓްތަކުގައި މަސައްކަތް ކުރަމުންދާއިރުގައި އާއި މުވައްޒަފުންގެ އެކޮމަޑޭޝަންތަކުގައި ރައްކާތެރިވުމުގެ ގޮތުން އަޅަން ޖެހޭ ފިޔަވަޅުތައް އެޗްޕީއޭ އިން ނެރެފައިވާ އިންސްޓްރަކްޝަންތަކާ އެއްގޮތަށް އެޅުމަށް އިލްތިމާސްކުރާ ކަމަށެވެ.
އެޗްޕީއޭ އިން ނެރުނު ގައިޑްލައިންގައި ބުނެފައި ވަނީ ރޯގާ ފެތުރެމުންދާތީ މި ދުވަސްވަރު އެއްވެ އުޅުމުގެ އެއްވެސް ހަރަކާތެއް ނުބޭއްވުމަށް އިލްތިމާސްކުރާ ކަމަށެވެ. އަދި އާންމުކޮށް ދިވެހިން ގޮސް އުޅޭ ގައުމުތަކުގައި ވެސް ރޯގާ ފެތުރެމުންދާތީ ރައްކާތެރިކަމުގެ ފިޔަވަޅު އަޅައިގެން ދަތުރު ކުރުމަށް ވެސް ވަނީ އިލްތިމާސްކޮށްފަ އެވެ. އަދި ކޮންމެހެން ދާން ޖެހިއްޖެ ހާލަތެއްގައި ނޫނީ ހޮސްޕިޓަލް އަދި ކްލިނިކްތަކަށް ޒިޔާރަތް ނުކުރުމަށް ވެސް ވަނީ އިލްތިމާސްކޮށްފަ އެވެ.
އެޗްވަންއެންވަން ނުވަތަ ސްވައިން ފްލޫ ރާއްޖެއިން ޖެހުނު މީހުންގެ އަދަދު 51 އިތުރުވެފައިވާއިރު، ރޯގާ ޖެހިގެން މިހާތަނަށް އައިޖީއެމްއެޗްގެ ފްލޫ ކްލިނިކުން 1098 މީހުން ވަނީ ޚިދުމަތް ހޯދައިފަ އެވެ. އަދި ވައިރަސްއަށް ޕޮޒިޓިވް ވި މާބަނޑު އަންހެން މީހާގެ ސިޒޭރިއަން ހަދައި، ދަރިފުޅު ނަގާފައިވާ އިރު އެ އަންހެން މީހާގެ ހާލު ސީރިއަސް އެވެ.
ބަލީގެ އަލާމާތްތައް
- ހުން އައުން
- ކަރުގައި ރިހުން
- ބޮލުގައި ރިހުން
- ގައިގައި ރިހުން
- ހީކަރުވާފައި ވަރުދެރަވުން
- ބޭރަށް ހިންގުން، ހޮޑުލުން
ސަލާމުކަން ދޭންޖެހޭ ކަންތައްތައް
- އަރިދަފުސް ރޯގާޖެހިއްޖެ ނަމަ ކެއްސައި ކިބިހި، އަޅާއިރު އަގަމަތީގައާއި ނޭފަތުގައި ކުޑަރުމާލެއް ނުވަތަ ޓިޝޫއެއް ފަދަ އެއްޗެއް އެޅުން. އަދި ބޭނުންކޮށްފައިވާ ޓިޝޫ ފަދަ ތަކެތި ހާމައަށް އެއްލާނުލުން
- އާއްމު ސާފުތާހިރުކަމަށް، ހާއްސަކޮށް ސައިބޯނިލައިގެން އަތްދޮވުން ފަދަ ކަންކަމަށް ސަމާލުކަންދިނުން
- ރޯގާޖެހި ކެއްސާ ނަމަ، މީހުން އެއްވެ އުޅޭ ތަންތަނަށް ދިއުން މަދުކުރުމާއި، ޚާއްސަކޮށް އެފަދަ ތަންތަނަށް ކުޑަކުދިން ނުގެންދިއުން
- ރޯގާ ޖެހިފައިވާ ނަމަ ކުޑަކުދިން ކައިރިއަށް ނުދިއުމަށާއި އެކުދިން އުރާ ނެހެދުން
- ދުންފަތުގެ ދުމުން ކުޑަކުދިން ރައްކާތެރިކުރުމަށް ގޭތެރޭގައި ދުންފަތުގެ އިސްތިއުމާލު ނުކުރުން
ހުމާއި ރޯގާ ޖެހިއްޖެ ނަމަ، ގޭގައިދެވިދާނެ ފަރުވާ
- ގިނައިން ދިޔާތަކެތި ބޭނުންކުރުން
- އަރާމުކުރުން
- ކަޅުސައި، ލުނބޯ، އިނގުރު އަދި މާމުއި ފަދަ ބުއިންތައް ބޭނުންކުރުން
- ހުންގަދަ ނަމަ ގައިގައި ފެން ހޭކުން (އާދައިގެ ތާފެނާ ފެން)
- ޕެރެސިޓަމޯލް ފިޔަވައި ބޭހެއް ބޭނުން ނުކުރުން
- ހުން އައިސް ރޯގާޖެހި ތިން ދުވަހަށް ވުރެ އިތުރުވާ ނަމަ ޑޮކްޓަރެއްގެ ލަފަ އާއި އިރުޝާދު ހޯދުން
އޭގެ އިތުރުން ހޮސްޕިޓަލު ފަދަ ތަންތަނަށް ކޮންމެހެން ދާންޖެހިއްޖެ ހާލަތެއްގައި ނޫނީ ނުދިއުމަށް ވެސް އެޗްޕީއޭއިން ވަނީ އިލްތިމާސްކޮށްފަ އެވެ.