ދޮންނަ މެޝިނެއްގެ ތެރޭގައި އިނގިލި ޒަހަމްވި މީހަކު އިތުރު ފަރުވާއަށް މާލެ ގެންނަން ނިންމައިފި އެވެ.
ށ. ގޮއިދޫގައި މިއަދު ހިނގި ހާދިސާއެއްގައި އިނގިލި ޗަސްވެފައި ވަނީ 29 އަހަރުގެ އަންހެނެއްގެ އެވެ. އޭނާއަށް ކުޅުދުއްފުށީ ރީޖަނަލް ހޮސްޕިޓަލުގައި ދަނީ ފަރުވާދެމުންނެވެ.
ޗަސްވެފައި ވަނީ އެ އަންހެން މީހާގެ ކަނާތުގެ މެދު އިނގިލިއްޔެވެ. ނަމަވެސް ހާދިސާ ހިނގަން މެދުވެރިވި ސަބަބެއް އަދި ނޭނގެއެވެ.
ކުޅުދުއްފުށީ ރީޖަނަލް ހޮސްޕިޓަލްގެ މީޑިއާ އޮފިޝަލު ފާތުމަތު ހަސަން މިއަދު ވިދާޅުވީ، އިނގިލި ޗަސްވި މީހާގެ އޮޕަރޭޝަނެއް ކޮށްފައިވާ ކަމަށެވެ. ނަމަވެސް އިތުރު ފަރުވާއަށް މާލެ ފޮނުވަން ހަމަޖެހިފައިވާ ކަމަށް އޭނާ ވިދާޅުވި އެވެ.
"ޕޭޝަންޓަށް އާސަންދަ ހަމަޖެހިފައި ވަނީ. މިރޭގެ ވަގުތެއްގައި މާލެ ފޮނުވާލެވޭނެ،" މީޑިއާ އޮފިޝަލު ވިދާޅުވި އެވެ.