ރ.އުނގޫފާރުގައި ކަރަންޓު ޖެހިގެން، އިތުރު ފަރުވާ ދިނުމަށް މާލެ ގެނައި ޒުވާނާގެ ހާލު އަދިވެސް ސީރިއަސް ކަމަށް އިންދިރާ ގާންދީ މެމޯރިއަލް ހޮސްޕިޓަލުން ބުނެފިއެވެ.
"ސަން" އަށް މައުލޫމާތު ދެމުން އައިޖީއެމްއެޗުން ބުނީ 18 އަހަރުގެ އެ ޒުވާނާ މިހާރު ފަރުވާ ހޯދަމުން ދަނީ އެ ހޮސްޕިޓަލުގެ އައިސީޔޫގައި ވެންޓިލޭޓަރުގައި ކަމަށެވެ.
ކަރަންޓުގައި ޖެހި އެންމެ ބޮޑު އަނިޔާއެއްވީ އޭނާއަށެވެ. އެގޮތުން ސީޕީއާރް ދިނުމަށްފަހު އޭނާގެ ހިތް މަސައްކަތްކުރާ ގޮތްވީ ވެސް ބައިގަޑިއިރުފަހުންނެވެ. އެ ރެއިން ފެށިގެން އޭނާއަށް ފަރުވާ ދެމުން އަންނަނީ އެ ހޮސްޕިޓަލުގެ ވެސް އައިސީޔޫގައި ވެންޓިލޭޓަރުގައެވެ.
އޭނާ އިތުރު ފަރުވާއަށް މާލެ ގެނެސްފައި ވަނީ މިދިޔަ ހޮނިހިރު ދުވަހުގެ ރެއެވެ.
މިގޮތުން އުނގޫފާރު ރީޖަނަލް ހޮސްޕިޓަލުގެ މެނޭޖަރު ހުސައިން އާސިފް ވިދާޅުވީ ވެއްޓުމުގެ ސަބަބުން މޫނަށް ބޭރުފުށުން ކުޑަ އަނިޔާއެއް ލިބިފައިވިއަސް، ބޮޑަށް އަނިޔާވެފައިވަނީ ޒުވާނާގެ އެތެރެހައްޓަށް ކަމަށެވެ.
މި ހާދިސާގައި ދެން އަނިޔާވި ދެކުދިން ވަނީ ފަރުވާ އަށްފަހު ދޫކޮށްލައިފައި ކަމަށް ވެސް އުނގޫފާރު ހޮސްޕިޓަލުން ވަނީ ބުނެފައެވެ.