މާލޭ ސިޓީ ސްކޫލްތަކަށް އަމާޒުކޮށްގެން ސޮކާ ވެޓެރަންސް އެސޯސިއޭޝަން އޮފް މޯލްޑިވްސްއިން އިންތިޒާމްކޮށްގެން ބާއްވާ މައިލޯ ކިޑްސް ފުޓްބޯލް ފިއެސްޓާ ފަށައިފިއެވެ.
މިއަދު ހެނދުނު ހެންވޭރު ދަނޑުގައި އެމުބާރާތް ފެށުނު ނަމަވެސް، މުބާރާތް ހުޅުވުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ މިއަދު ހަވީރު 4:00ގައެވެ.
މިއަދުން ފެށިގެން އަންނަ ހޮނިހިރު ދުވަހުގެ ނިޔަލަށް ކުރިއަށްގެންދާ އެމުބާރާތަކީ މާލެ، ހުޅުމާލެ އަދި ވިލިމާލޭގެ ގްރޭޑް ދޭއް އަދި ތިނެއްގެ ކުދިންނަށް ހާއްސަކޮށްގެން ކުރިއަށްގެންދާ މުބާރާތެވެ. މިއަހަރުގެ މުބާރާތުގައި 17 ސްކޫލަކުން 33 ޓީމު ބައިވެރިވެފައިވެއެވެ. މުބާރާތުގައި ޖުމްލަ 260 މެޗު ކުޅުމަށް ހަމަޖެހިފައިވާއިރު، އެކި ސްކޫލްތަކުން ޖުމްލަ 594 ކުދިން ބައިވެރިވެފައިވެއެވެ.
ގްރޭޑް ދޭއްގެ ބައިގެ ގްރޫޕް އެކެއްގައި ހިމެނެނީ ޖަމާލުއްދީން ސްކޫލް، މަޖީދިއްޔާ ސްކޫލް، ގޭޓްވޭ އިންޓަނޭޝަނަލް، އަމީނިއްޔާ ސްކޫލް އަދި ކަލާފާން ސްކޫލެވެ. ގްރޫޕް ދޭއްގައި ހިމެނެނީ އަހްމަދިއްޔާ އިންޓަނޭޝަނަލް ސްކޫލް، ގިޔާސުއްދީން އިންޓަނޭޝަނަލް ސްކޫލް، މުހިއްދީން ސްކޫލް އަދި އިސްކަންދަރު ސްކޫލެވެ. ގްރޫޕް ތިނެއްގައި ހިމެނެނީ އަރަބިއްޔާ ސްކޫލް، ރެހެންދި ސްކޫލް، އިމާދުއްދީން ސްކޫލް އަދި ގާޒީ ސްކޫލެވެ. ގްރޫޕް ހަތަރެއްގައި ހިމެނެނީ ހިރިޔާ ސްކޫލް، ބިލަބޮންގް އިންޓަނޭޝަނަލް، ދަރުމަވަންތަ ސްކޫލް އަދި ތާޖުއްދީން ސްކޫލެވެ.
ގްރޫޕް ތިނެއްގެ ބައިގެ ގްރޫޕް އެކެއްގައި ހިމެނެނީ ކަލާފާނު ސްކޫލް، ހިރިޔާ ސްކޫލް، ގާޒީ ސްކޫލް އަދި ދަރުމަވަންތަ ސްކޫލެވެ. ގްރޫޕް ދޭއްގައި ހިމެނެނީ އަރަބިއްޔާ ސްކޫލް، ތާޖުއްދީން ސްކޫލް، ގިޔާސުއްދީން ސްކޫލް އަދި އަހުމަދިއްޔާ ސްކޫލެވެ. ގްރޫޕް ތިނެއްގައި ހިމެނެނީ މުހިއްދީން ސްކޫލް، ބިލަބޮންގް އިންޓަނޭޝަނަލް ސްކޫލް، އިސްކަންދަރު ސްކޫލް އަދި ޖަމާލުއްދީން ސްކޫލެވެ. ގްރޫޕް ހަތަރެއްގައި ހިމެނެނީ ރެހެންދި ސްކޫލް، ގޭޓްވޭ އިންޓަނޭޝަނަލް، އިމާދުއްދީން ސްކޫލް އަދި މަޖީދިއްޔާ ސްކޫލެވެ.
އެ މުބާރާތުގައި މިހާރު ގްރޫޕް ދޭއް އަދި ގްރޫޕް ތިނަކަށް ހާއްސަކޮށްގެން ކުރިއަށްގެންދިޔަ ނަމަވެސް، ޕްރީސްކޫލް އަދި ގްރޫޕް އެކެއްގެ ކުދިންނަށް ހާއްސަކޮށްގެން މާލޭގައި އޮގަސްޓް މަހުގެ 23 އިން 26ގެ ނިޔަލަށް މުބާރާތް ކުރިއަށްގެންދިއުމަށް ހަމަޖެހިފައިވެއެވެ.
ސޮކާ ވެޓެރަންސްއިން މިއަހަރު ށ. އަތޮޅާއި ގދ. އަތޮޅުގެ ސްކޫލްތަކުގެ ކުދިންނަށް ހާއްސަކޮށްގެން ބޭއްވުމަށް ނިންމާފައިވާއިރު، މިދިޔަ އަހަރެކޭ އެއްގޮތަށް އައްޑޫ ސިޓީ އަދި ފުވައްމުލައް ސްކޫލްތަކުގެ ކުދިންނަށް ވެސް މުބާރާތެއް ބޭއްވުމަށް ހަމަޖެހިފައިވެއެވެ.
ށ. މާފަރުގެ ޕްރީސްކޫލް އަދި ގްރޫޑް އެކެއްގެ ކުދިންނަށް ހާއްސަކޮށްގެން ބާއްވާ މުބާރާތް އަންނަ މަހުގެ 30 އިން ފެށިގެން އޭޕްރީލް 1ގެ ނިޔަލަށް ކުރިއަށްގެންދިއުމަށް ހަމަޖެހިފައިވާއިރު، ގދ. ތިނަދޫ ޕްރީސްކޫލް އަދި ގްރޭޑް އެކެއްގެ ކުދިންނަށް ހާއްސަކޮށްގެން ބާއްވާ މުބާރާތް ކުރިއަށްގެންދިއުމަށް ހަމަޖެހިފައިވަނީ ޖުލައި މަހުގެ 27 އިން 29ގެ ނިޔަލަށެވެ.
އައްޑޫ ސިޓީގެ ޕްރީސްކޫލް އަދި ގްރޫޑް އެކެއްގެ ކުދިންނަށް ހާއްސަކޮށްގެން ބާއްވާ މުބާރާތް މެއި މަހުގެ 10 އިން ފެށިގެން 12ގެ ނިޔަލަށް ކުރިއަށްގެންދިއުމަށް ހަމަޖެހިފައިވާއިރު، ފުވައްމުލައް ސިޓީގެ ގްރޫޑް އެކެއް އަދި ގްރޭޑް ދޭއްގެ ކުދިންނަށް ހާއްސަކޮށްގެން ބާއްވާ މުބާރާތް ކުރިއަށްގެންދިއުމަށް ހަމަޖެހިފައިވަނީ ސެޕްޓެމްބަރު މަހުގެ 7 އިން ފެށިގެން 9ގެ ނިޔަލަށެވެ. މިދިޔަ އަހަރު އައްޑޫ ސިޓީ އަދި ފުވައްމުލައް ސިޓީގައި ބޭއްވި މުބާރާތް ވަނީ ވަރަށް ކާމިޔާބުކަމާއެކު ނިންމާލައިފައެވެ.