ސަރުކާރު ހިންގާ ޕާޓީ، ޕީޕީއެމްގެ ރައީސް މައުމޫން އަބްދުލް ގައްޔޫމް އެ ޕާޓީގެ އާންމު މެމްބަރުންނާ ބައްދަލު ކުރައްވަން މިރޭ ބާއްވަން އުޅުއްވި ހަފްލާ ކެންސަލް ކުރައްވައިފި އެވެ.
"ޕީޕީއެމްގެ ދިރުން - ރައްޔިތުންގެ ހިޔާލު" މި ނަމުގައި ރައީސް މައުމޫން މިރޭ ބާއްވަން އުޅުނު ހަފްލާ ކެންސަލް ކުރީ، އެ ހަފްލާ ނުބޭއްވޭނެ ކަމަށް ފުލުހުން އަންގާފައި ވާތީ ކަމަށް ރައީސް މައުމޫންގެ ދަރިކަނބަލުން ޔުމްނާ މައުމޫން ވިދާޅުވި އެވެ. ޔުމްނާ އެހެން ވިދާޅުވީ ހ. ތެމާގައި ހިންގާ މައުމޫންގެ އޮފީހުގައި މިރޭ ބޭއްވި ޕްރެސް ކޮންފަރެންސެއްގައި ވާހަކަފުޅު ދައްކަވަމުންނެވެ.
މައުމޫން ފެކްޝަނުން މިރޭ ވަނީ މައުމޫން ބާއްވަން އުޅުނު ހަފްލާ ނުބޭއްވޭނެ ކަމަށް އެންގި ދެ ފުލުހުންގެ ނަން ވެސް އާންމުކޮށްފަ އެވެ. އެ ދެ ފުލުހުންނަކީ އިންސްޕެކްޓަރު އަހްމަދު އިބްރާހިމާއި ސުޓާފް ސާރޖެންޓް އިބްރާހިމް ފަލާހެވެ.
އެ ނަންތައް އާންމު ކުރީ މައުމޫން ފެކްޝަންގެ ނައިބު ރައީސް އައިމިނަތު ނާދިރާ އެވެ. މިރޭގެ ހަފްލާ ބާއްވަން ފުލުހުން ފުރުސަތު ނުދޭ ސަބަބެއް ނާދިރާ ވިދާޅެއް ނުވެ އެވެ.
ފުލުހުންގެ މީޑިއާއަށް ގުޅާލުމުން ވެސް އެ ސުވާލަކަށް އަދި ޖަވާބެއް ނުލިބެ އެވެ.
ޕީޕީއެމްގެ އާންމު މެމްބަރުންނާ ބައްދަލު ކުރައްވަން މައުމޫން ބާއްވަން އުޅުއްވި ހަފްލާ ކެންސަލް ކުރަންޖެހުނު ސަބަބު މީޑިއާއަށް ހާމަކޮށްދެއް ވަނީ--- ސަން ފޮޓޯ/ މުހައްމަދު އަފްރާހު
މިރޭ ބޭއްވި ޕްރެސް ކޮންފަރެންސްގައި ނާދިރާ ވިދާޅުވީ މައުމޫން ބާއްވަން އުޅުއްވި ހަފްލާއަށް ޕާޓީގެ އާންމު މެމްބަރުންނަށާއި ނޫސްވެރިންނަށް ވެސް ނުވަދެވޭނެ ކަމަށް ފުލުހުން އަންގާފައިވާ ކަމަށެވެ.
އެ ޕްރެސް ކޮންފަރެންސްގައި ޔުމްނާ ވިދާޅުވީ މިރޭގެ ހަފްލާ ކެންސަލް ކުރަން ރައީސް މައުމޫން ނިންމެވީ ޕީޕީއެމްގެ އާންމު މެމްބަރުންނާއި ފުލުހުންނާދެމެދު ހަމަނުޖެހުމެއް ހިނގާފާނެތީ ކަމަށެވެ.
"ޕާޓީގެ ރައީސް ބޭނުންފުޅެއް ނުވޭ ޕާޓީގެ މެމްބަރުންނަށް އަނިޔާވެ ޕާޓީގެ މެމްބަރުން ހައްޔަރުވާކަށް،" ޔުމްނާ ވިދާޅު ވިއެވެ.
ޕާޓީގެ ކޮންމެ ކަމެއްގައިވެސް އާއްމު މެންބަރުންގެ ހިޔާލު ހޯދުމަށް ރައީސް މައުމޫން އިސްކަން ދެއްވާ ކަމަށާއި އެގޮތުން ޕީޕީއެމްގެ އާންމު މެމްބަރުންނާ ބައްދަލު ކުރެއްވުމަށް "ކޮންމެ ވެސް އެހެން ގޮތަކަށް" ބައްދަލުވުމެއް ބާއްވާނެ ކަމަށް ޔުމްނާ ވިދާޅުވި އެވެ.
ރައީސް މައުމޫނާ ބައްޔަތު ހިއްޕަވާފައިވާ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ލޯޔަރު ވައްޑެ) މިރޭގެ ޕްރެސްކޮންފަރެންސްގައި ވިދާޅުވީ، ޕީޕީއެމް އިން ބާއްވަން އުޅުނު ބައްދަލުވުމަށް ފުލުހުން ހުރަސް އެޅި ކަމުގައި ވިޔަސް، ފުލުހުންނަށް އިހްތިރާމް ކުރާނެ ކަމަށެވެ.
"އަޅުގަނޑުމެންނަށް ވުރެން ބޮޑަށް ވަކި، ރައީސް މައުމޫނަށް ވުރެން ބޮޑަށް ވަކި ފުލުހުންދެކެ ލޯބިވާނެ ސިފައިން ދެކެ ލޯބިވާނެ ރައްޔަތުން ދެކެ ލޯބިވާނެ މީހަކު ހުންނާނެ ކަމަށް އަޅުގަނޑެއް ނުދެކެން" ވައްޑެ ވިދާޅުވި އެވެ.
އެކަމާ ގުޅޭ ގޮތުން ފުލުހުންގެ ބަހެއް އަދި ވަނީ ލިބޭ ގޮތް ނުވެފަ އެވެ.