ރައީސް އަބްދުﷲ ޔާމީންގެ އަނބިކަނބަލުން ފާތިމަތު އިބްރާހިމްގެ އިސްނެންގެވުމުގެ މަތިން، ދިވެހި އަންހެނުންގެ މަސައްކަތްތެރިކަމާއި ހުނަރު ދައްކުވައި ދިނުމަށް މި މަހު ބާއްވަން ނިންމާފައިވާ "ހީވާގި ކަނބަލުން" މައުރަޒުގައި ބައިވެރިވުމަށް އެދި 500 އަށްވުރެ ގިނަ ފޯމް ހުށަހަޅާފައިވާ ކަމަށް މައުރަޒު އިންތިޒާމްކުރާ ފަރާތުން ބުނެފިއެވެ.
ހީވާގި ކަނބަލުން މައުރަޒާ ގުޅޭ ގޮތުން މައުލޫމާތު ދެއްވަމުން މައުރަޒުގެ އެޑްމިނިސްޓްރޭޓިވް ހެޑް އައިމިނަތު މާޝާ ވިދާޅުވީ މައުރަޒުގައި ބައިވެރިވުމަށް ފޯމް ހުށަހެޅުމުގެ ފުރުސަތު އަންނަ އާދީތައް ދުވަހާ ހަމައަށް ހުޅުވާލާފައިވާއިރު، މިހާތަނަށް 500 އަށްވުރެ ގިނަ ފޯމް ހުށަހަޅާފައިވާ ކަމަށެވެ.
އޭގެ އިތުރުން ގިނަ އަދަދެއްގެ މީހުން ނަން ނޯޓްކޮށްފައިވާ ކަމަށާއި ފޯމް ހުށަހެޅުއްވި ފަރާތްތަކުގެ ތެރޭގައި ކްލަބް ޖަމިއްޔާތަކާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީތައް ވެސް ހިމެނޭ ކަމަށް އޭނާ ފާހަގަކުރެއްވި އެވެ.
ހަތަރު ކެޓަގަރީއަކުން ބައިވެރިވެވޭ ގޮތަށް ހީވާގި ކަނބަލުންގެ މައުރަޒު ބާއްވަން ހަމަޖެހިފައި ވަނީ ފެބްރުއަރީ މަހުގެ 23 އިން 27 އަށް ދަރުބާރުގޭގަ އެވެ.
މައުރަޒުގައި ބައިވެރިވުމަށް އެއްވެސް ފީއެއް ދައްކަން ނުޖެހޭއިރު މައުރަޒުގައި 15 އަހަރުން މަތީ ކޮންމެ އަންހެނަކަށް ވެސް ބައިވެރިވެވޭނެ އެވެ. އަދި މައުރަޒުގައި ބައިވެރިކުރާ ފަރާތްތަކަށް އެތަކެތި ވިއްކުމުގެ ފުރުސަތު ވަނީ ދީފަ އެވެ.
ހީވާގި ކަނބަލުންގައި ހިމެނޭ ކެޓަގަރީތައް
- ވަކިވަކި ކަނބަލުން
- އަންހެނުންގެ ކޮމިޓީތައް
- ކްލަބު ޖަމިއްޔާތައް
- ހާއްސަ އެހީއަށް ބޭނުންވާ ކަނބަލުންގެ ދާއިރާ
މާޝާ ވިދާޅުވީ މިހާތަނަށް އެ މައުރަޒުގައި 21 ދާއިރާއަކުން ތަކެތި ބައިވެރިކުރުމުގެ ފުރުސަތު އޮތް ނަމަވެސް ގިނަ އަންހެނުންގެ އެދުމުގެ މަތިން މިހާރު 25 ކެޓަގަރީއަށް އިތުރުކޮށްފައިވާ ކަމަށެވެ.
އެގޮތުން އިތުރު ކޮށްފައިވާ ގިންތިތަކަކީ:
- އުފައްދާ ތަކެތީގައި އަންހެނުން ހިއްސާ ކުރާ މިންވަރު 50 ޕަސަންޓަށް ވުރެ އިތުރުވާ އުފެއްދުންތައް
- ޑިޒައިންތަކަށް ކޭކު އުފެއްދުމުގެ ކެޓަގަރީ
- ނާށީގެ މަސައްކަތްތައް
- ލިޔެލާގެ މަސައްކަތްތައް
ކޮންމެ ކެޓަގަރީއަކުން އަދި މުޅި މައުރަޒުން އެންމެ މޮޅު އެއް ވަނަ، ދެ ވަނަ އަދި ތިން ވަނަ ހޮވަން ވަނީ ހަމަޖެހިފައެވެ.
އެގޮތުން އެއް ވަނައަށް ހޮވޭ ފަރާތަކަށް 100،000 ރުފިޔާ، ދެވަނަ އަށް 75،000ރ. އަދި ތިން ވަނަ އަށް 50،000ރ. ހުށަހަޅައިފައިވާއިރު، މުޅި މައުރަޒުން އެއްވަނަ ދެ ވަނަ އަދި ތިން ވަނައަށްދާ ފަރާތްތަކަށް ރާއްޖެ އަދި ރާއްޖެއިން ބޭރުގައި އޮންނަ މިފަދަ މައުރަޒުތަކުގައި ބައިވެރިވުމުގެ ފުުރުސަތު ދޭން ވަނީ ނިންމާފައެވެ.