އިނގިރޭސި ކްލަބު އާސެނަލްގެ ހުށަހެޅުން ދޫކޮށްލުމަށްފަހު ނައިޖީރިއާގެ ޒުވާން ފޯވަޑް ވިކްޓާ އޮސިމްހެން، ޖަރުމަންގެ ވޮލްފްސްބާގަށް ސޮއިކުރީ އާސަނަލަށްވުރެ ގިނަވަގުތު ކުޅުމުގެ ފުރުސަތު ލިބޭނެތީ ކަމަށް އޭނާ ބުނެފިއެވެ.
އުމުރުން 18 އަހަރުގެ އޮސިމްހެން ނައިޖީރިއާގެ އަލްޓިމޭޓް ސްޓްރައިކާސް އެކެޑަމީން، ވޮލްސްބާގްއާ ގުޅުނީ 3.5 މިލިއަން ޔޫރޯގެ އަގަކަށެވެ.
ކޮންފެޑެރޭޝަން އޮފް އެފްރިކަން ފުޓްބޯލް (ކޭފް)އިން 2015 ވަނަ އަހަރު ހޮވި އެންމެ މޮޅު ޒުވާން ކުޅުންތެރިޔާގެ މަގާމު ހޯދި އޮސިމްހެން ހޯދުމަށް އާސެނަލްގެ އިތުރުން އިޓަލީގެ ފިއޮރެންޓީނާއިން ވެސް މަސައްކަތްކޮށްފައިވެއެވެ.
"އަހަރެން ހޯދުމަށް ގިނަ ކްލަބުތަކަކުން މަސައްކަތްކުރި. އެކަމަކު އަހަރެންގެ ކުރިއެރުމަށް އެންމެ ގިނަ ފުރުސަތުތައް ލިބޭނީ ވޮލްފްސްބާގްއިން ކަމަށް އަހަރެން ދެކޭތީ މިކްލަބާ އަހަރެން ގުޅުނީ. މިސާލަކަށް އަހަރެން އާސެނަލްއާ ގުޅިއްޖެނަމަ، އަހަރެންނަށް ފުރަތަމަ ޓީމުން ޖާގަ ލިބުމުގެ ފުރުސަތު އެހާ އަވަހަށް ނުލިބިދާނެ،" އޭނާ ބުންޏެވެ.
އޮސިމްހެން ބުނީ، އޭނައަކީ ފުޓްބޯޅައަށް ވަރަށް ލޯބިކުރާ ކުޅުންތެރިއެއް ކަމަށާއި ކޮންމެ ކްލަބެއްގައި ހުރި ކަމަށްވިޔަސް ކުރިއަށްދިއުމަށް ގަދައަޅައި މަސައްކަތްކުރާނެ ކަމަށެވެ.