ކެނދިކުޅުދޫ އިން: މުއާވިޔަތު އަންވަރު
ނ. އަތޮޅުގެ ރަށްތަކަށް އަމާޒުކޮށްގެން ކުރިއަށް ގެންދާ ސިޔާމް-މައުރޫފް ސޮކާ ކަޕްގެ ފައިނަލް މެޗުގެ ސަރަފުވެރިކޮށްދިނިމަށް ބާސެލޯނާގެ ކުރީގެ ކެޕްޓަން ކާލޯސް ޕިޔޯލް ކެނދިކުޅުދު އަށް އަންނަންވާއިރަށް އޭނާއަށް މަރުހަބާކިޔުމަށް މުޅި ރަށް ތައްޔާރުވެއްޖެ އެވެ.
ކެނދިކުޅުދޫ ދާއިރާގެ މެމްބަރު އަލީ މައުރޫފް އާއި މީދޫ ދާއިރާގެ މެމްބަރު އަހުމަދު ސިޔާމްގެ އިސްނެގުމުގެ މަތިން ނ. އަތޮޅުގެ ރަށްތަކަށް އަމާޒްކޮށްގެން ބާއްވާ އެ މުބާރާތުގެ ފައިނަލްގައި ބައްދަލުކުރަނީ މުބާރާތް ބާއްވާ ރަށް ކެނދިކުޅުދޫ އާއި ހޮޅުދޫ އެވެ.
ކެނދިކުޅުދޫ، ސިޔާމް-މައުރޫފް ކަޕް
މިހާތަނަށް އަތޮޅު ތެރޭގައި ބާއްވާ އެންމެ އަގުބޮޑު ކުޅިވަރު މުބާރާތުގެ ގޮތުގައި ބެލެވިފައިވާ ސިޔާމް-މައުރޫފް ސޮކާ ކަޕްގެ ފައިނަލް މެޗު އޮންނާނީ މިއަދު ހަވީރު އެވެ.
ފައިނަލަށް ދެ ޓީމް ދަތުރުކުރި ގޮތާއި އެންމެ ފަހުގެ ތައްޔާރީތަށް
ފާއިތުވެދިޔަ ދެ އަހަރާ ހިލާފަށް މި އަހަރު އެ މުބާރާތުގައި ނ. އަތޮޅުގެ 13 ރަށުން ވެސް ވަނީ ބައިވެރިވެފަ އެވެ. ތިން ގްރޫޕަކަށް ބަހާލައިގެން ކުރިއަށް ގެންދިޔަ އެ މުބާރާތުގެ ސެމީފައިނަލަށް ދަތުރުކުރީ ކޮންމެ ގްރޫޕްކުން ވެސް އެންމެ ގިނަ ޕޮއިންޓް ހޯދި ތިން ޓީމެވެ. ފައިނަލްގެ ފުރަތަމަ ޖާގަ އެންމެ ފަހުގެ ޗެމްޕިއަން ހޮޅުދޫ ހޯދީ ފޯރިގަދަ ކުޅުމަކަށް ފަހު 2-1ގެ ނަތީޖާ އަކުން މާފަރު ބަލިކޮށްފައެވެ.
މިއަދުގެ މެޗަށް ހޮޅުދޫއިން ގާތްގަޑަކަށް 800 ސަޕޯޓަރުން ކެނދިކުޅުދޫއަށް އަންނާނެ ކަމަށް އެ ރަށުގެ ކައުންސިލް ރައީސް މާއިޒް މުހައްމަދު 'ސަން' އަށް ވިދާޅުވިއެވެ.
'ގްރޫޕް ބީ'ގެ އެއްވަނައިގެ ގޮތުގައި ސެމީން ޖާގަ ހޯދި ހޮޅުދޫ އެފްސީ --- ފޮޓޯ/ ހޮޅުދޫ އެފްސީ
"މިހާރު މިވަނީ ތިން ދޮންޏާއި ހަތަރު ސަޕޯޓް ލޯންޗް ކެނދިކުޅުދޫއަށް ދިއުމަށް ތައްޔާރުވެފައި. ހުރިހާ ސަޕޯޓަރުން ވެސް ތިބޭނީ ރަތް ކުލައިގައި ޓީމަށް ތަރުހީބް ދިނުމަށް ފުރުހަމައަށް ތައްޔާރުވެގެން،" މާއިޒް ވިދާޅުވި އެވެ.
ފާއިތުދިޔަ ދެ އަހަރު ކުޑަފަރީގައި އެ މުބާރާތް ބޭއްވި ނަމަވެސް، މިއަހަރު އެ މުބާރާތް ކުރިއަށްދަނީ ކެނދިކުޅުދޫގަ އެވެ. އެ ޓީމް ފައިނަލަށް ދަތުރުކުރީ ފުރަތަމަ ސެމީ ފައިނަލްގައި މިލަދޫ އަތުން މޮޅުވެ ފަހު ސެމީ ފައިނަލްގައި 3-1ގެ ނަތީޖާ އަކުން މާފަރު ބަލިކޮށްފަ އެވެ.
ސިޔާމް-މައުރޫފް ސޮކާ ކަޕްގައި ވާދަކުރާ ކެނދިކުޅުދޫ އެފްސީ: އެ --- ފޮޓޯ/ ކެނދިކުޅުދޫ އެފްސީ
ފައިނަލް މެޗަށާއި ޕްޔޯލަށް މަރުހަބާ ކިޔުން
ޕްޔޯލް އާއި އޭނާގެ އަންހެނުން ސްޕެއިންގެ މަޝްހޫރު މޮޑެލް ވެނެސާ ލޮރެންޒޯއާ އިއްޔެ ރާއްޖެ އައިސްފައިވާ އިރު އޭނާ މިވަގުތު ހުރީ ނ. އަތޮޅުގެ ރިސޯޓެއް ކަމަށްވާ ސަން ސިޔާމް އިރުފުށީގަ އެވެ.
ފައިނަލް މެޗުގެ ސަރަފުވެރި މެހެމާނު ޕްޔޯލް 2:45 ގައި ކެނދިކުޅުދޫއަށް އައުމަށް ހަމަޖެހިފައިވާ އިރު އޭނާ އާ އެކު، މުބާރާތުގެ އެއް ބާނީ އަހުމަދު ސިޔާމް އާއި އެފްއޭއެމްގެ ރައީސް ބައްސާމް އަދީލް ޖަލީލް ވެސް ވަޑައިގަންނަވާނެ އެވެ.
ކެނދިކުޅުދޫގައި ދިވެހިންގެ ސަގާފަތް ދައްކުވައި ދިނުމަށް ކުރީ ޒަމާނުގައި ކާބަފައިން އުޅުނު ޒާތުގެ ގެ އެއް --- ފޮޓޯ: މުއާވިއަތު
ކެނދިކުޅުދޫއިން ޕްޔޯލަށް ހާއްސަ މަރުހަބާއެއް ކިޔުމުގެ އެންމެ ފަހުގެ ތައްޔާރީތަައް އަންނަނީ ވަމުންނެވެ. އެގޮތުން ޕްޔޯލް ކެނދިކުޅުދޫއަށް އައިސް މަޑުކޮށްލުމަށް ބޯޅަ ދަނޑުކައިރީގައި ވަނީ ގިޑިގެ އަކާއި ދިވެހިންގެ ސަގާފަތް ދައްކުވައިދޭ ގޮތަށް ޒީނަތްތެރިކޮށްފަ އެވެ. ހަވީރު 4:00 ޖަހާއިރު ފެށުމަށް ހަމަޖެހިފައިވާ މެޗުގެ ކުރުން ޕްޔޯލަށް މަރުހަބާ ކިޔުމުގެ ގޮތުން ކެނދިކުޅުދޫގެ ރައްޔިތުންގެ ފަރާތުުން ހާއްސަ ސަގާފީ ހަރަކާތްތަކެއް ކުރިއަށް ގެންދިއުމަށް ވަނީ ނިންމާފަ އެވެ.
ސިޔާމް-މައުރޫފް ކަޕްގެ ފައިނަލް މެޗު ކުޅޭ ދަނޑު --- ސަންފޮޓޯ: މުއާވިޔަތު
ޗެމްޕިއަން ޓީމަށާއި ރަނަރަޕް ޓީމަށް ޓްރޮފީ އާއި މެޑަލް ދެއްވާނީ ޕްޔޯލެވެ. އެހެން ނަމަވެސް ސެކިއުރީޓީގެ ސަބަބުތަކަށް ޓަކައި ޕްޔޯލް އާ އެކު ފޮޓޯ ނެގުމުގެ ފުރުސަތު އާންމުންނަކަށް ނޯންނާނެ ކަމަށް މުބާރާތް އިންތިޒާމް ކުރުމުގައި އިސްކޮށް އުޅުއްވާ ކުރީގެ ގައުމީ ކެޕްޓަން އަސްއަދު އަބްދުލް ޢަނީ ބުންޏެވެ.
"އެގިވަޑައިގަންނަވޭނެ ޕްޔޯލް ފަދަ މަސްހޫރު ހައި ޕްރޮފައިލް ކުޅުންތެރިއަކަށް ވަރަށް ރަނގަޅަށް ސެކިއުރިޓީ ދޭން ޖެހޭނެ ކަން. އެ ސަބަބުތަކަށް ޓަކައި ސަޕޯޓަރުންނަށް ޕްޔޯލްއާ ބައްދަލު ކުރުމުގެ ފުރުސަތެއް ނޯންނާނެނެ،" އައްސަދު ބުންޏެވެ.
ކެނދިކުޅުދޫ ޕްޔޯލަށް މަރުހަބާ ކިއުމަށް ތައްޔާރުވެފައި --- ސަންފޮޓޯ: މުއާވިއަތު
ފައިނަލް މެޗު ސަން ޓީވީ އިންނާއި ޕީއެސްއެމްގެ ޔެސް ޓީވީއިން ލައިވް ކުރާނެއެވެ.