އައްޑޫ ސިޓީގެ ހިތަދޫ ވިޔަފާރިވެރިއެއް ކަމުގައިވާ އަލީ އަބްދުﷲ މަރާލުމުގައި ބައިވެރިވި ކަމުގެ ތުހުމަތުގައި ތިން މީހެއްގެ މައްޗަށް ދައުވާ އުފުލައިފިއެވެ.
އެނގިހުރެ މީހަކު މަރާލުމުގައި ބައިވެރިވުމުގެ ދައުވާ އުފުލާފައި ވަނީ ސ. ހިތަދޫ، އަތަމާވިލާ މަޢޫޒު މުހައްމަދާއި އެރަށު އައްޒާ، މުބާރިކް މުހައްމަދުގެ އިތުރުން ހަމަ އެރަށު ނަޝީދީގޭ މުހައްމަދު ޝިފާޒުގެ މައްޗަށެވެ.
ޕީޖީ އޮފީހުގެ އޮފިޝަލަކު މިއަދު ސަން އަށް ވިދާޅުވީ އެ ތިން މީހުންގެ މައްޗަށް ދައުވާ އުފުލާފައި ވަނީ ގާނޫނުލް އުގޫބާތުގެ 110 ވަނަ މާއްދާގެ (ހ) އާ ހަވާލާދީ 30 ވަނަ މާއްދާގެ (ރ) ގެ ދަށުން ކަމަށެވެ.
އެ ތިން މީހުންގެ މައްސަލަ ކްރިމިނަލް ކޯޓަށް ފޮނުވާފައި ވަނީ މި މަހުގެ 20 ވަނަ ދުވަހުއެވެ. އެ މީހުންގެ ފުރަތަމަ އަޑުއެހުން މިއަދު ބާއްވަން ވަނީ ތާވަލްކޮށްފައެވެ.
އަލީ އަބްދުﷲ މަރާލި ކަމުގެ ތުހުމަތުގައި އޭނާ އަށް ބޮޑުބޭކިޔާ މީހެއް ކަމަށްވާ ސ. ހިތަދޫ ހެޕީފިއުޗާ، އަހުމަދު އިބްރާހީމް ދީދީ،39، ގެ މައްޗަށް މީގެކުރިން ވަނީ އެނގިހުރެ މީހަކު މަރާލި ކަމުގެ ދައުވާ އުފުލައިފައެވެ.
އޭނާ މާރާލާފައި އެއްލާލާފައި އޮއްވައި ފެނުނީ މިދިޔަ މާޗް މަހުގެ ދެވަނަ ދުވަހުގެ ވަގުތެއްގައެވެ.
ނޫސްވެރިންނަށް މައުލޫމާތު ދެއްވަމުން ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުގެ ހެޑް، ސުޕްރިންޓެންޑެންޓު އޮފް ޕޮލިސް އަބްދުﷲ ޝަތީހު ވިދާޅުވެފައި ވަނީ ސ. ހިތަދޫ އެޅެދީދީ މަގުގައި ހުންނަ ހެޕީފިއުޗާ ގޭގައި އަލީ އަބްދުﷲ ހިންގާ ހިތަދޫ ޓޫވޭ ނަމަކަށް ކިޔާ ފިހާރައަކީ އޭނާގެ އަމިއްލަ ވިޔަފާރިއެއް ކަމަށެވެ.
އޭނާ މަރާލާފައި ވަނީ ފައިސާ އާއި މުދަލުގެ ދަހިވެތި ކަމުގައި ކަމަށާއި އެ މައްސަލާގައި ތުހުމަތު ކުރެވޭ މީހެއްގެ ގޭގައި ވަޅުލާފައި ހުއްޓައި 40،000 އަށް ވުރެ ގިނަ ފައިސާ ފެނިފައިވާ ކަމަށް ވެސް ޝަތީހު ވިދާޅުވިއެވެ.
ޝަތީހު ވިދާޅުވީ، މިދިޔަ މާޗް މަހުގެ ދެވަނަ ދުވަހު އަލީ އަބްދުﷲ ގެއްލިގެން އޭނާގެ އާއިލާގެ ފަރާތުން ފުލުހުންނަށް ރިޕޯޓު ކުރުމާ ގުޅިގެން ހޯދަމުން ދަނިކޮށް، އުމުރުން ދުވަސްވީ އަންހެނަކަށް ވަލުތެރެއަށް އަލީ އަބްދުﷲގެ ސައިކަލް އެއްލާފައި އޮއްވައި ފެނުނު ކަމަށެވެ. އެ ސައިކަލް އޮތް ސަރަހައްދާއި ތިން ފޫޓު ދުރުގައި އަލީ އަބްދުﷲގެ ހަށިގަނޑު އޮއްވައި ފެނުނު ކަމަށް ވެސް އޭނާ ވިދާޅުވިއެވެ.
"އެއިރު ހަށިގަނޑުގެ އެއްބައި މޭކަށިގަނޑުން މަތި އޮތީ އޮޅުތެރޭގައި. އަނެއްބައި އަލައޮޅުތައް ކައިރީ ހުރި ވިނަތައް މަތީގައި އޮތީ،" ޝަތީހު ވިދާޅުވިއެވެ.
އަލީ އަބްދުﷲގެ ހަށިގަނޑަށް ލިބިފައިވާ އަނިޔާތަކުގެ ތެރޭގައި ދެ އަތުގެ އުޅަނބޮށީގެ ތެޔޮހަން ގޮސްފައިވުމާއި، ދޫ ބޭރަށް ނުކުމެފައި ހުރުމުގެ އިތުރުން ކަރުގައި އެއްޗެއް އޮޅާލާފައި ހުރި ކަމުގެ ނިޝާންތަކެއް ފެންނަން ހުރިއިރު، ދެ ލޯ ވަރަށް ބޮޑަށް ހުޅުވި، ދެލޮލުގެ ކަޅި މައްޗަށް ހުރިކަން ފާހަގަ ކުރެވުނުކަމަށް ވެސް ޝަތީހު ވިދާޅުވިއެވެ.
އޭނާ ވިދާޅުވީ، އަލީ އަބްދުﷲގެ ހަށިގަނޑު ބިންމަތީގައި ދަމާފައި ގެންދިޔަ ކަމުގެ ނިޝާންތަކެއް ވެސް ހުރިކަން ފާހަގަ ކުރެވުނު ކަމަށާއި އަލީ އަބްދުﷲގެ ހަށިގަނޑު އޮތް ސަރަހައްދު ފާސްކުރި އިރު، އެތަނުން އޭނާގެ ފޯނު ފެނިފައިވާ ކަމަށް ވެސް ޝަތީހު ވިދާޅުވިއެވެ.
އެ ސަރަހައްދުން ފެނުނު އަލީ އަބްދުﷲގެ ފިހާރައިގައި ރީލޯޑު ކުރަން ބޭނުންކުރާ ފޯނުގައި ހުރި ހުރިހާ ފައިސާތައް އެހެން ފޯނަކަށް ޓްރާންސްފާ ކޮށްފައިވާ ކަމަށް ވެސް އޭނާ ވިދާޅުވިއެވެ.
ތަފާތު އެކި ދުވަސްމަތިން އެ މައްސަލައާ ގުޅިގެން ހަތަރު މީހަކު ހައްޔަރުކޮށްފައިވާ ކަމަށް ވެސް އޭނާ ވިދާޅުވިއެވެ.