ގައުމީ ވޮލީބޯޅަ ލީގުގައި ސްޓެލްކޯ ރެކްރިއޭޝަން ކްލަބާ ދެކޮޅަށް ކުޅުނު މެޗުން ވެސް އެންމެ ފަހުގެ ޗެމްޕިއަން ޕޮލިސް ކްލަބު ބަލިވެއްޖެ އެވެ.
ސޯޝަލް ސެންޓަރު އެތެރޭ ކޯޓުގައި ރޭ ކުޅުނު ލީގު މެޗުގައި ސްޓެލްކޯ އަތުން ޕޮލިސް ކްލަބު ބަލިވެފައި ވަނީ 3-1 ސެޓުންނެވެ. އިއްޔެ ކުޅުނު މެޗުގެ ކުރިން މިދިޔަ އަންގާރަ ދުވަހު މޯލްޑިވިއަން ރެކްރިއޭޝަން ކްލަބާ ދެކޮޅަށް ކުޅުނު މެޗުން ވެސް ޕޮލިސް ކްލަބު ވަނީ ބަލިވެފަ އެވެ.
އެ މެޗުގެ ފުރަތަމަ ސެޓު 23-25 އިން ސްޓެލްކޯ އިން ގެންދިޔަ ނަމަވެސް، ޕޮލިހުން ވަނީ 25-13 އިން ދެ ވަނަ ސެޓު ގެންގޮސްފަ އެވެ. ސްޓެލްކޯ އިން ފަހު ދެ ސެޓު ގެންގޮސްފައި ވަނީ 30-32 އަދި 18-25 އިންނެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވިފައި ވަނީ ސްޓެލްކޯގެ ހަސަން ނިލާމް އެވެ.
ލީގުގެ އެއްވެސް މެޗަކުން މިހާތަނަށް ބަލިވެފައިނުވާ ދިވެހި ސިފައިންގެ ކްލަބު ވަނީ އިއްޔެ ސްޕޯޓްސް ކްލަބު ސިޓީ އަތުން ސީދާ ތިން ސެޓުން މޮޅުވެފަ އެވެ. އެ މެޗުގެ ސެޓުތައް ސިފައިން ގެންދިޔައީ 22-25، 14-25 އަދި 21-25 އިންނެވެ. މެޗުގެ މޮޅު ކުޅުންތެރިޔާގެ މަގާމަށް ހޮވިފައި ވަނީ ސިފައިންގެ އާދަމް ނަސީމެވެ.
އިއްޔެ ގުޑީސް ސްޕޯޓްސް ކްލަބާ ދެކޮޅަށް ކުޅުނު މެޗުން މޯލްޑިވިއަން ރެކްރިއޭޝަން ކްލަބު މޮޅުވެފައި ވަނީ ސީދާ ތިން ސެޓުންނެވެ. މެޗުގެ ސެޓުތައް ސިފައިން ގެންދިޔައީ 10-25، 16-25 އަދި 16-25 އިންވެެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވިފައި ވަނީ މޯލްޑިވިއަންގެ އަލީ ހުޒާމް އެވެ.
ލީގުގައި މިއަދު ކުރިއަށްދާނީ އަންހެން ޑިވިޝަނުގެ ދެ މެޗެކެވެ. މިއަދު ހަވީރު ކުޅޭ މެޗުގައި ކްލަބު ޕޯލް ސްޓާ އާއި ފުވައްމުލައް ޔޫތު ސްޕޯޓްސް ޑިވެލޮޕްމަންޓް އެސޯސިއޭޝަން (އެފްވައިއެސްޑީއޭ) ބައްދަލުކުރާ އިރު، މިރޭ ކުޅޭ މެޗުގައި ބައްދަލުކުރާނީ މިސްކިތްމަގު އެންމެންގެ ގުޅުމާއި ޕޮލިސް ކްލަބެވެ.
އެ މުބާރާތުގެ ފިރިހެން ޑިވިޝަނުގައި ހަ ޓީމެއް ވާދަކުރާ އިރު، އަންހެން ޑިވިޝަނުގައި ފަސް ޓީމެއް ވާދަކުރެ އެވެ. ފިރިހެން ޑިވިޝަންގައި ވާދަކުރާ ޓީމުތަކަަކީ ސްޕޯޓްސް ކްލަބު ސިޓީ، ޕޮލިސް ކްލަބު، ގުޑީސް ސްޕޯޓްސް ކްލަބު، ސްޓެލްކޯ ރެކްރިއޭޝަން ކްލަބު، ދިވެހި ސިފައިންގެ ކްލަބު އަދި މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބެވެ.
އެ މުބާރާތުގެ އަންހެން ޑިވިޝަންގައި ވާދަކުރާ ޓީމުތަކަކީ މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބު، މިސްކިތްމަގު އެންމެންގެ ގުޅުން، ޕޮލިސް ކްލަބު، ކްލަބު ޕޯލް ސްޓާ އަދި ފުވައްމުލައް ޔޫތު ސްޕޯޓްސް ޑިވެލޮޕްމަންޓް އެސޯސިއޭޝަން (އެފްވައިއެސްޑީއޭ) އެވެ.
މި މަހުގެ 18 ވަނަ ދުވަހު ލީގު ނިމުމާ އެކު ގައުމީ މުބާރާތުގެ ފިރިހެން އަދި އަންހެން ޑިވިޝަން ފަށާނެ އެވެ. ގައުމީ މުބާރާތަށް ހޮވޭނީ ދެ ޑިވިޝަނުން ވެސް އެންމެ ކުރި ހޯދާ ހަތަރު ޓިމެވެ. ގައުމީ މުބާރާތް ކުޅޭނީ ތިން ސެމީގެ އުސޫލުންނެވެ.