އެލައިޑް އިންޝުއަރެންސް ވޮލީބޯޅަ ލީގުގައި އެންމެ ފަހުގެ ޗެމްޕިއަން ޕޮލިސް ކްލަބު އަތުން މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބު މޮޅުވެއްޖެ އެވެ.
ޒުވާނުންގެ މަރުކަޒު އެތެރޭ ކޯޓުގައި ރޭ ކުޅުނު މެޗުގައި ޕޮލިސް އަތުން މޯލްޑިވިއަން މޮޅުވެފައި ވަނީ ފަސޭހަކަމާއެކު ސީދާ ތިން ސެޓުންނެވެ.
މޯލްޑިވިއަންގެ ފަރާތުން މޮޅު ކުޅުމެއް ފެނިގެންދިޔަ އެ މެޗުގެ ސެޓުތައް އެ ޓީމުން ގެންގޮސްފައި ވަނީ 25-18، 25-21 އަދި 25-21 އިންނެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވިފައި ވަނީ މޯލްޑިވިއަންގެ އިސްމާއިލް ސާޖިދު(ކުޑަކާއްޓޭ) އެވެ.
އެންމެ ފަހުގެ ރަނަރަޕް ދިވެހި ސިފައިންގެ ކްލަބު އިއްޔެ ގުޑީސް ސްޕޯޓްސް ކްލަބު އަތުން ވެސް ވަނީ މޮޅުވެފަ އެވެ. މުބާރާތުގައި މިހާތަނަށް ކުޅުނު އެއްވެސް މެޗުތަކުން ސިފައިން ބަލިވެފައެއް ނުވެ އެވެ. އިއްޔެ ކުޅުނު މެޗުގެ ސެޓުތައް ސިފައިން ގެންދިޔައީ 25-14، 25-7 އަދި 25-13 އިންނެވެ. މެޗުގެ މޮޅު ކުޅުންތެރިޔާގެ މަގާމަށް ހޮވިފައި ވަނީ ސިފައިންގެ މުރާދް ޖީހާން އެވެ.
އިއްޔެ ކުޅުނު މެޗުގައި ސްޕޯޓްސް ކްލަބު ސިޓީ އަތުން 3-1 ސެޓުން ސްޓެލްކޯ ރެކްރިއޭޝަން ކްލަބު ވަނީ މޮޅުވެފަ އެވެ. އެ މެޗުގެ ސެޓުތައް ސްޓެލްކޯ އިން ގެންދިޔައީ 25-23، 25-19، 21-25 އަދި 27-25 އިންނެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވިފައި ވަނީ ޕިޗާއީ ރަމާސުބްރަމަނިއަން އެވެ.
އެ މުބާރާތުގައި މިއަދު ވެސް ކުޅުމަށް ހަމަޖެހިފައި ވަނީ ފިރިހެން ޑިވިޝަންގެ ތިން މެޗެވެ. މިއަދު ކުޅޭ ފުރަތަމަ މެޗުގައި ސްޕޯޓްސް ކްލަބު ސިޓީ އާއި ދިވެހި ސިފައިންގެ ކްލަބު ބައްދަލުކުރާ އިރު، ދެ ވަނަ މެޗުގައި ބައްދަލުކުރާނީ ޕޮލިސް ކްލަބާއި ސްޓެލްކޯ ރެކްރިއޭޝަން ކްލަބެވެ. އަދި މިއަދުގެ ފަހު މެޗުގައި ބައްދަލުކުރާނީ ގުޑީސް ސްޕޯޓްސް ކްލަބާއި މޯލްޑިވިއަން ރެކްރިއޭޝަން ކްލަބެވެ.
އެ މުބާރާތުގެ ފިރިހެން ޑިވިޝަނުގައި ހަ ޓީމެއް ވާދަކުރާ އިރު، އަންހެން ޑިވިޝަނުގައި ފަސް ޓީމެއް ވާދަކުރެ އެވެ. ފިރިހެން ޑިވިޝަންގައި ވާދަކުރާ ޓީމުތަކަަކީ ސްޕޯޓްސް ކްލަބު ސިޓީ، ޕޮލިސް ކްލަބު، ގުޑީސް ސްޕޯޓްސް ކްލަބު، ސްޓެލްކޯ ރެކްރިއޭޝަން ކްލަބު، ދިވެހި ސިފައިންގެ ކްލަބު އަދި މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބެވެ.
އެ މުބާރާތުގެ އަންހެން ޑިވިޝަންގައި ވާދަކުރާ ޓީމުތަކަކީ މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބު، މިސްކިތްމަގު އެންމެންގެ ގުޅުން، ޕޮލިސް ކްލަބު، ކްލަބު ޕޯލް ސްޓާ އަދި ފުވައްމުލައް ޔޫތު ސްޕޯޓްސް ޑިވެލޮޕްމަންޓް (އެފްވައިއެސްޑީ) އެވެ.
މި މަހުގެ 18 ވަނަ ދުވަހު ލީގު ނިމުމާ އެކު ގައުމީ މުބާރާތުގެ ފިރިހެން އަދި އަންހެން ޑިވިޝަން ފަށާނެ އެވެ. ގައުމީ މުބާރާތަށް ހޮވޭނީ ދެ ޑިވިޝަނުން ވެސް އެންމެ ކުރި ހޯދާ ހަތަރު ޓިމެވެ. ގައުމީ މުބާރާތް ކުޅޭނީ ތިން ސެމީގެ އުސޫލުންނެވެ.